ഹൂസ്റ്റണ്‍: തിരുവനന്തപുരം റീജണല്‍ കാന്‍സര്‍ സെന്ററില്‍ ഔട്ട് പേഷ്യന്റ് മുറി നിര്‍മ്മിച്ചു നല്‍കുന്ന ഫോമയുടെ പ്രൊജക്ട് ഓരോ അമേരിക്കന്‍ മലയാളിക്കും അഭിമാനം പകരുന്നതാണെന്നു ഫോമാ സ്ഥാപക പ്രസിഡന്റ് ശശിധരന്‍ നായര്‍ പറഞ്ഞു. ഇതിന്റെ വിജയത്തിനായി പ്രവര്‍ത്തിക്കുന്ന ഫോമാ നേതൃത്വവും, പ്രൊജക്ട് സഫലമാക്കാന്‍ പ്രയത്‌നിച്ച പി.ആര്‍.ഒ ജോസ് ഏബ്രഹാമും പ്രത്യേകം അഭിനന്ദനം അര്‍ഹിക്കുന്നു.
ഫോമ രൂപംകൊടുത്തപ്പോള്‍ ഏറെ ആശങ്കകളുണ്ടായിരുന്നു. എന്നാല്‍ തുടക്കംമുതല്‍ തന്നെ മലയാളി മനസ്സില്‍ ഫോമാ ആധിപത്യം നേടി. ഓരോ വര്‍ഷവും പുതുമയാര്‍ന്ന പദ്ധതികളിലൂടെ ഫോമാ നേതാക്കള്‍ സംഘടനയുടെ യശസ്സും പ്രസക്തിയും ഉറപ്പാക്കുന്നു. ഈ മികവില്‍ തികഞ്ഞ അഭിമാനമുണ്ട്. അവയ്‌ക്കെല്ലാം തിലകക്കുറിയാണ് കാന്‍സര്‍ പ്രൊജക്ട്. ഫോമയുടെ പേര് കാന്‍സര്‍ സെന്റര്‍ ഉള്ളിടത്തോളം കാലം അവിടെയുണ്ടാകും.
കാന്‍സര്‍ ബാധിതരെല്ലാം വേദനാജനകമായ അവസ്ഥയിലൂടെ കടന്നുപോകുന്നവരാണ്. കുട്ടികളാണ് അവരില്‍ ഏറ്റവും ദയനീയാവസ്ഥ നേരിടുന്നത്. അവരുടെ മാതാപിതാക്കളാകട്ടെ പിഞ്ചുമനസ്സുകളുടെ ദുരന്തം കണ്ട് നീറിനീറി കഴിയുന്നു . അങ്ങനെയുള്ളവര്‍ക്ക് സ്വസ്ഥമായി കാത്തിരിക്കാനും പ്രാഥമികാവശ്യങ്ങള്‍ക്കും സൗകര്യം നല്‍കുന്ന വെയ്റ്റിംഗ് റൂം പണിതു നല്‍കുന്നത് എന്തുകൊണ്ടും മഹത്തായ ജീവകാരുണ്യ പ്രവര്‍ത്തിയാണ്. ഇതിനു നല്‍കേണ്ട ഒരുലക്ഷം ഡോളറില്‍ ഇനിയും സമാഹരിക്കേണ്ട തുക നല്‍കി ഭാരവാഹികള്‍ക്കൊപ്പം പ്രവര്‍ത്തിക്കാന്‍ അദ്ദേഹം ജനങ്ങളോടഭ്യര്‍ത്ഥിച്ചു.
കാന്‍സര്‍ പ്രൊജക്ടിന്റെ അഡൈ്വസറി ബോര്‍ഡ് അംഗംകൂടിയാണ് ശശിധരന്‍ നായര്‍. നാട്ടില്‍ സൗകര്യങ്ങള്‍ വര്‍ദ്ധിച്ചതുകൊണ്ട് ചാരിറ്റി പ്രവര്‍ത്തനങ്ങളൊന്നും വേണ്ട എന്നു കരുതുന്നതു ശരിയല്ല. ഇത്തരം പ്രവര്‍ത്തനങ്ങള്‍ ഇനിയും ധാരാളമായി നാട്ടില്‍ ആവശ്യമുണ്ട്. വരുംകാല ഭാരവാഹികള്‍ക്ക് ഇതുപോലുള്ള പദ്ധതികള്‍ ഏറ്റെടുത്ത് നടത്താനുള്ള പ്രചോദനവും ഇതില്‍ നിന്നു ലഭിക്കട്ടെ എന്നദ്ദേഹം പറഞ്ഞു.
ഇവിടെ ലഭിക്കുന്ന കാന്‍സര്‍ ചികിത്സയും മരുന്നുകളും അവിടെയും ലഭ്യമാക്കാനുള്ള ശ്രമവും ഉണ്ടാകണമെന്നദ്ദേഹം നിര്‍ദേശിച്ചു. ഇവിടെ നമുക്ക് ഒട്ടേറെ കാന്‍സര്‍ ചികിത്സാ വിദഗ്ധരുണ്ട്. അവരെ കേരളത്തിലെ വിവിധ ആശുപത്രികളുമായി അഫിലിയേറ്റ് ചെയ്യിക്കാന്‍ കഴിഞ്ഞാല്‍ അതും ഗുണപ്രദമാകും.
കാന്‍സര്‍ പ്രൊജക്ട് സാക്ഷാത്കരിക്കാന്‍ പ്രവര്‍ത്തിക്കുന്ന ആനന്ദന്‍ നിരവേല്‍- ഷാജി ഏഡ്വേര്‍ഡ് ടീമിനു അദ്ദേഹം പ്രത്യേകം നന്ദി പറഞ്ഞു.
യുവജനതയ്ക്ക് മാതൃകയായി പ്രവര്‍ത്തിക്കുന്ന ജോസ് ഏബ്രഹാമിനു അദ്ദേഹം വിജയാശംസകള്‍ നേര്‍ന്നു. യുവജനത സംഘടനയിലേക്ക് വരുന്നതിനും മികച്ച പ്രവര്‍ത്തനം നടത്താനും ജോസ് ഏബ്രഹാമിന്റെ മാതൃക മറ്റുള്ളവര്‍ക്ക് പ്രചോദനമാകുമെന്ന് അദ്ദേഹം പറഞ്ഞു.
