മഞ്ജുള ശിവദാസ്‌ റിയാദ്
വിഭിന്ന സംസ്കൃതിയുള്‍ക്കൊള്ളുന്നവര്‍
വിശുദ്ധിയോടെ വസിച്ചീടുന്നിട-
മശുദ്ധമാക്കും കളകള്‍ക്കെതിരേ
തൂലിക നമ്മളെടുത്തീടും.
ഒരിക്കലുള്ളൊരു മരണമതെന്നും
പ്രതീക്ഷ വച്ചു നടക്കുമ്പോള്‍,
ഭയപ്പെടില്ലൊരുനാളും നമ്മള്‍
വാള്‍മുനവന്നു പതിക്കുകിലും.
അരിഞ്ഞുതള്ളും ശിരസ്സുകളോരോ-
ന്നുയിര്‍ത്തെണീക്കുമൊരായിരമായ്,
പക്ഷം ചേരാത്തക്ഷരമെയ്തു തളക്കും
നന്മകള്‍ വിളയിക്കും.
വിശാല മനസ്സിന്‍ വീക്ഷണമല്‍പ്പം
വിഷമം സൃഷ്ടിച്ചീടുകിലും,
ആശയമാണിവിടായുധമതിനെ
തിരാശയമെയ്തു തടുത്തീടൂ.
തൂലികകൊണ്ടു വിരോധം തീര്‍ക്കാന്‍
തുനിഞ്ഞിറങ്ങിയതല്ല,നമ്മുടെ
കാഴ്ച്ചപ്പാടുകള്‍ കച്ചവടത്തിനു
തെരുവിലിറക്കുകയില്ല.
പരതന്ത്രതയുടെ വിലങ്ങു ഭേദി-
ച്ചനീതിതന്‍ വേരറുത്തിടാന്‍,
നേരിനെ നേരായ് മാത്രമുരക്കും
സത്യത്തിന്‍ സഹയാത്രികര്‍ നാം.
