*വരണ്ട തലമുടിക്ക് നല്ല ഹെയർ കണ്ടീഷണറാണ് തൈര്. ഇത് പുരട്ടി അരമണിക്കൂറിന് ശേഷം വൃത്തിയായി കഴുകിയാൽ മുടി നന്നായി തിളങ്ങും.
*എപ്പോഴും കൈ കഴുകുന്നത് ചർമ്മത്തിന്റെ സ്വാഭാവികമായ സ്‌നിഗ്ദ്ധത നഷ്‌ടപ്പെടുത്തും. അതുകൊണ്ടുതന്നെ വെള്ളവുമായി ബന്ധപ്പെട്ട ജോലികൾ ചെയ്യുമ്പോൾ കൈയുറകൾ ധരിക്കാൻ ശ്രദ്ധിക്കുക.
* കണ്ണിന്റെ നീർവീക്കവും ക്ഷീണവുമകറ്റാൻ വെള്ളരിക്ക മുറിച്ച് കൺതടത്തിൽ വയ്‌ക്കാവുന്നതാണ്.
* മുട്ടയുടെ വെള്ള ത്വക്കിന് വളരെ ഗുണകരമാണ്. വെള്ള പ്രത്യേകം മാറ്റിയെടുത്ത് മുഖത്ത് പുരട്ടുന്നത് പ്രായമാകുന്നത് തടയും.
* ആപ്പിളും ചർമ്മത്തിന് നല്ലതാണ്. ആപ്പിളിന്റെ നീര് ഫേസ് പാക്കായി ഉപയോഗിച്ചാൽ തിളക്കം കൂടും.
* കണ്ണുകൾക്ക് ഉന്മേഷവും കുളിർമ്മയും നൽകാൻ കുമ്പളങ്ങാ നീര് കണ്ണിന് താഴെ പുരട്ടുന്നത് ഉത്തമമാണ്. പക്ഷേ, കുമ്പളങ്ങാ നീര് ത്വക്കിന് വരൾച്ചയുള്ളതാക്കും. അതുകൊണ്ട് തന്നെ ഇത് ഉപയോഗിച്ചാൽ തൊട്ടുപിന്നാലെ പാൽപ്പാടയും പുരട്ടണം.
* ചുണ്ടുകൾക്ക് നിറവും നനവും കിട്ടാൻ തേനും ഗ്ലിസറിനും ചേർത്ത് പതിവായി ചുണ്ടിൽ പുരട്ടുക. വരൾച്ച തടയാനും ഇത് നല്ലതാണ്.
* ഒരു സ്‌പൂൺ തേൻ രണ്ടുസ്‌പൂൺ ഒലിവെണ്ണയിൽ കലർത്തുക. കൈകൾ ഇളം ചൂട് വെള്ളത്തിൽ കഴുകി തയ്യാറാക്കി വച്ച മിശ്രിതം പുരട്ടുക. പതിനഞ്ചു മിനിട്ടിന് ശേഷം ഇളം ചൂട് വെള്ളത്തിൽ കഴുകി കളയാം. കൈ വിരലുകളിലെ ചുളിവുകൾ അകറ്റാൻ ഈ പ്രയോഗം നല്ലതാണ്.
* ഇളം ചൂട് വെള്ളം നിറച്ച ടബ്ബിൽ കാൽപാദങ്ങൾ ഇറക്കിവയ്‌ക്കുക. നന്നായി കഴുകി കഴിഞ്ഞാൽ വിരലുകൾക്കിടയിൽ നിന്ന് ഈർപ്പം ഒപ്പിയെടുക്കാൻ മറക്കരുത്. ഒലിവെണ്ണ അല്ലെങ്കിൽ ഉരുക്കുവെളിച്ചെണ്ണ കൊണ്ട് കണങ്കാലും പാദങ്ങളും ഉഴിയുക. അടുപ്പിച്ചിരിക്കുന്ന വിരലുകൾക്കിടയിൽ ടാൽക്കം പൗഡർ തൂകുന്നതും വിരലുകളെ സംരക്ഷിക്കാൻ സഹായിക്കും.
