മുഖം മാത്രമല്ല, സൗന്ദര്യത്തിന്റെ അളവുകോൽ. മുടിയും കൈകാലുകളും രൂപഭംഗിയുമൊക്കെ അഴകിന് പ്രധാനം തന്നെയാണ്. മനസ് വച്ചാൽ ആർക്കും സുന്ദരികളാകാവുന്നതേയുള്ളൂ. ശരീരത്തിന്റെ ഓരോ ഭാഗത്തിനും വേണ്ട പരിചരണങ്ങൾ പ്രത്യേകം മനസിലാക്കി അത് പിന്തുടർന്നാൽ മാത്രം മതി. സൗന്ദര്യം കൂടെപ്പോരും!
മുഖത്തിന് തിളക്കം നൽകാൻ ഏറ്റവും മികച്ച മാർഗം ഫേസ്പാക്കുകൾ മുഖത്തിന് നൽകുക എന്നതാണ്. ഒരു ടീസ്പൂൺ ഓറഞ്ച് നീര്, ഒരു ടീസ്പൂൺ കാരറ്റ് നീര്, കാൽ ടീസ്പൂൺ നാരങ്ങനീര്, ഒരു ടീസ്പൂൺ മാതളനാരങ്ങ, ഒരു ടീസ്പൂൺ വെള്ളരിക്കാ നീര്, ഒരു ടീസ്പൂൺ ഒലീവ് ഓയിൽ, ഒരു ടീസ്പൂൺ കട്ടത്തൈര് എന്നിവ കുഴമ്പ് രൂപത്തിലാക്കി മുഖത്ത് പുരട്ടുക. ഇരുപത് മിനിട്ടിനു ശേഷം ചെറുചൂടുവെള്ളത്തിലും പിന്നീട് തണുത്ത വെള്ളത്തിലും കഴുകി വെള്ളം ഒപ്പിയെടുക്കുക. മുഖത്തിന് ഫ്രെഷ്നസ് ലഭിക്കുന്നതിനോടൊപ്പം ചർമ്മവും നന്നാവും. കൈകളിലെ ചർമ്മത്തിന് ചുളിവ് വീഴാതിരിക്കാൻ ഒലിവ് ഓയിലോ വെളിച്ചെണ്ണയോ പുരട്ടുന്നത് നല്ലതാണ്. കൈകളിൽ ഗ്ളിസറിനും പഞ്ചസാരയും ഇട്ട് അൽപസമയം ഉരച്ചതിന് ശേഷം കഴുകുന്നത് ഉത്തമം. പുറത്തു പോകുമ്പോൾ മേക്കപ്പ് അണിയുന്നതിലും ശ്രദ്ധ വേണം. മിനിമൽ മേക്കപ്പാണ് ഇപ്പോഴത്തെ ഫാഷൻ. അതുകൊണ്ട് തന്നെ പുട്ടിയടിച്ച പോലുള്ള മേക്കപ്പുകൾ ഒഴിവാക്കുക. കണ്ണെഴുതാം, ലിപസ്റ്റിക് ഇടാം. ഇത്രയും മതിയാകും മികച്ച ലുക്കിന്. ഉറങ്ങും മുമ്പ് മേക്കപ്പ് റിമൂവർ കൊണ്ട് മേക്കപ്പ് നീക്കം ചെയ്യാൻ മറക്കരുത്. ദിവസവും രാവിലെയും വൈകിട്ടും പാദം വൃത്തിയാക്കി മോയിസ്ചറൈസർ പുരട്ടുക. പ്രത്യേകിച്ച് കാലിൽ വിണ്ടുകീറൽ ബാധിച്ചിട്ടുണ്ടെങ്കിൽ.
ചെറുചൂടുവെള്ളത്തിൽ ഉപ്പിട്ട് പാദങ്ങൾ അതിൽ മുക്കിവയ്ക്കണം. എന്നിട്ട് പ്യുമിക് സ്റ്റോൺ ഉപയോഗിച്ച് പാദങ്ങൾ ഉരച്ചു കഴുകുക. അതിനുശേഷം ഉപ്പു വെള്ളം മാറ്റി തണുത്ത വെള്ളത്തിൽ കാൽ കഴുകി വൃത്തിയായി തുടച്ച് ഒലിവ് ഓയിൽ പുരട്ടുക. കാലിൽ നനവില്ലാതിരിക്കാൻ പ്രത്യേകം ശ്രദ്ധിക്കണം.
മുടിയഴകിന് ആഴ്ചയിലൊരിക്കൽ ഹോട്ട് ഓയിൽ മസാജിംഗ് ചെയ്യാൻ ശ്രദ്ധിക്കണം. മുടിക്ക് യോജിച്ച ഷാംപൂ ഉപയോഗിച്ച് മുടിയിലെ പൊടിയും അഴുക്കും കഴുകിക്കളയണം. പ്രൊട്ടക്ടീവ് സിറം പുറത്തുപോകുംമുമ്പ് ഉപയോഗിക്കാനും ശ്രദ്ധിക്കണം. നനഞ്ഞ മുടി ഒരിക്കലും കെട്ടി വയ്ക്കാൻ പാടില്ല. നനവ് സ്വാഭാവികമായി മാറുന്നതുവരെ മുടി അഴിച്ചു തന്നെയിടുക. മുടി കെട്ടിവെക്കുന്നതുമൂലം ചീത്തമണവും മുടിയിൽ കെട്ടുകൾ രൂപപ്പെടുകയും ചെയ്യും.