ടെൻഷൻ കൂടുമ്പോൾ ഭക്ഷണം കഴിച്ച് ആശ്വസിക്കാൻ ശ്രമിക്കാറുണ്ടോ? എങ്കിൽ ഇമോഷണൽ ഈറ്റിംഗ് എന്ന ശീലമാണിത്. ഇങ്ങനെയുള്ള സാഹചര്യങ്ങളിൽ മസാലയും എരിവും കൂടുതലുള്ള ഫാസ്റ്റ് ഫുഡ്, ബേക്കറി സാധനങ്ങൾ, ചോക്ളേറ്റ് എന്നിവയാകും കൂടുതൽ പേരും കഴിക്കുന്നത്. ഇങ്ങനെ വാരിവലിച്ച് കഴിക്കുമ്പോൾ ടെൻഷൻ മാറിയെന്ന് തോന്നൽ തത്കാലത്തേക്ക് മാത്രമാണ്. വൈകാരികമായ ഈ ശീലം പതുക്കെ അനാരോഗ്യമാകും.
ടെൻഷന്റെ കാരണം കണ്ടെത്തി പരിഹരിക്കാൻ നോക്കണം. വിശപ്പില്ലാതെ ഭക്ഷണം കഴിക്കാൻ തോന്നുമ്പോൾ ഒന്നു വെറുതെ പുറത്തിറങ്ങി വരാം. മനസ് മറ്റു കാര്യങ്ങളിൽ വ്യാപൃതമാകുമ്പോൾ ഭക്ഷണം വീണ്ടും കഴിക്കാനുള്ള തോന്നൽ മാറും. എപ്പോഴും ബാഗിൽ ഒരു കുപ്പി വെള്ളം കരുതണം. വെറുതേ ഭക്ഷണം കഴിക്കാൻ തോന്നുമ്പോൾ വെള്ളം കുടിക്കാം.
