ഭാര്യമാർ വാഴ്ക വാഴ്ക…. ഭാര്യാ മത്സരത്തിനെതിരെ പ്രതിഷേധവുമായി ടി എൻ സീമ

ഇപ്പോഴിതാ നേതാക്കളുടെ ഭാര്യമാർക്ക് നിയമസഭയിലേക്ക് സീറ്റൊപ്പിക്കുന്ന തിരക്കിലാണ് നേതാക്കൾ. ജോലിയുള്ള ഭാര്യമാരും. ജോലിയിൽ നിന്നും വിരമിച്ച ഭാര്യമാരും തെരഞ്ഞെടുപ്പിൽ സീറ്റുകൾ നേടിക്കൊണ്ടിരിക്കയാണ്… മാർച്ചിൽ പങ്കെടുത്തവരെയും, നിരവധി പോരാട്ടങ്ങളിൽ പങ്കെടുത്തവരൊന്നും പട്ടികയിൽ ഇല്ലെന്നാണ് വിവരം.

നിയമ മന്ത്രിയായ ബാലേട്ടൻ വളരെ നിയമപരമായി മാത്രം നീങ്ങുന്നയാളാണ്. പ്രായോഗിക രാഷ്ട്രീയം കൈമുതലായുള്ള നേതാവ്. രണ്ടിൽ കൂടുതൽ തവണ മത്സരിച്ച എം എൽ എ മാർ വീണ്ടും മത്സരിക്കേണ്ടതില്ലെന്നാണ് സി പി എമ്മിന്റെ തീരുമാനം. അതോടെ മന്ത്രിമാരായ എ കെ ബാലൻ, ഇ പി ജയരാജൻ, ഡോ തോമസ് ഐസക്, ജി സുധാകരൻ, സി രവീന്ദ്രനാഥ്  തുടങ്ങിയ മന്ത്രിമാർക്കും, സ്പീക്കർ ശിവരാമകൃഷ്ണനുമാണ് സീറ്റ് നഷ്ടപ്പെട്ടത്.

മത്സരിക്കാൻ ഇനിയൊരു അവസരമുണ്ടാവില്ലെന്ന് നേരത്തെ അറിയാമായിരുന്നു എ കെ ബാലന്, അതിനാൽ തന്റെ ഭാര്യയെ ആ സീറ്റിലേക്ക് കൊണ്ടുവരാനുള്ള നീക്കം ബാലൻ നേരത്തെ നടത്തിയിരുന്നു. ഭാര്യയെ മത്സരിപ്പിക്കാൻ നീക്കമെന്ന് വാർത്ത വന്നപ്പോൾ ബാലൻ ആ വാർത്തയെ നിശിതമായി വിമർശിച്ച് രംഗത്തെത്തിയിരുന്നു. എന്നാൽ പട്ടിക വന്നപ്പോൾ ഇതാ കിടക്കുന്നു ബാലപത്‌നി തരൂരിൽ.

ആക്ടിംഗ് സെക്രട്ടറിയായതിനാൽ മത്സരിക്കാനൊന്നും സമയമില്ല എ വിജയരാഘവന്. ഈ ആക്ടിംഗ് എന്നു അവസാനിക്കുമെന്ന് ചോദിച്ചാൽ ഉടൻ അവസാനിക്കുമെന്നാണ് അദ്ദേഹത്തിന്റെ പക്ഷം. കാരണം ഇപ്പോൾ തന്നെ തന്റെ അഭിനയം പലർക്കും താല്പര്യമില്ലാതായിട്ടുണ്ടെന്ന് അദ്ദേഹം തിരിച്ചറിഞ്ഞിരിക്കുന്നു. അപ്പോൾ പകരം ഭാര്യയെ മത്സരിപ്പിക്കാൻ നീക്കങ്ങൾ ആരംഭിച്ചു. ഇരിഞ്ഞാലക്കുടയിൽ സീറ്റും തരപ്പെടുത്തി.
അങ്ങിനെ രണ്ടു ഭാര്യമാർ മത്സരിക്കാൻ തയ്യറായിരിക്കയാണ്.  
സർവ്വീസ് മേഖലയിൽ വളരെ സജീവമായിരുന്നു ഡോ ജമീലയെന്നും, പാർട്ടിക്കാരുടെ ഭാര്യ ആയിപ്പോയി എന്നത് മത്സരിക്കാൻ അയോഗ്യതയാണോ എന്നാണ് ബാലൻ അനുകൂലികളുടെ ചോദ്യം. ഡോ ബിന്ദു വിജയരാഘവന്റെ ഭാര്യയാണെങ്കിലും, അവരും പാർട്ടി പ്രവർത്തകയാണെന്നും, കോളജിലാണ് ജോലിയെങ്കിലും സജീവ രാഷ്ട്രീയ രംഗത്തുള്ളയാളാണെന്നും  നേതാക്കളുടെ ന്യായവാദം പുറത്തു വന്നിരിക്കയാണ്.

 രണ്ട് നേതാക്കളുടെ ഭാര്യമാർക്ക് സീറ്റു നൽകാനുള്ള തീരുമാനത്തിനെതിരെ   പ്രതിഷേധവുമായി മഹിളാ അസോസിയേഷൻ നേതാവ് ടി എൻ സീമ രംഗത്തെത്തിയിരിക്കയാണ്.  സി പി എം സംസ്ഥാന സെക്രട്ടറി എ വിജയരാഘവന്റെ ഭാര്യ ഡോ ആർ ബിന്ദുവിനും, മന്ത്രി എ കെ ബാലന്റെ ഭാര്യ ഡോ  ജമീലയുമാണ് ഇത്തവണ മത്സരിക്കാനെത്തുന്നതിനെതിരെയാണ് ടി എൻ സീമ പ്രതിഷേധിച്ചത്. 10 വനിതാ നേതാക്കളാണ് മത്സരിക്കാനെത്തുന്നത്. കഴിഞ്ഞ തവണ 12 പേരുണ്ടായിരുന്നു,

മത്സരിക്കാൻ കൂടുതൽ വനിതകൾക്ക് അവസരം ഉണ്ടാക്കുകയെന്ന നയത്തിന്റെ ഭാഗമായല്ല ഈ രണ്ടു വനിതകളും സീറ്റെന്നും, നേതാക്കളുടെ ഭാര്യമാരായതുകൊണ്ടുമാത്രമാണെന്നുമാണ് ഡോ. ടി എൻ സീമയുടെ ആരോപണം.
കൂടുതൽ വനിതാ നേതാക്കൾക്ക് അവസരം നൽകുമെന്നാണ് പാർട്ടി പറയുന്നത്. എന്നാൽ കൊട്ടാരക്കരയിൽ അയിഷ പോറ്റി മാറിയപ്പോൾ കെ എൻ ബാലഗോപാലാണ് വരുന്നത്. തിരുവനന്തപുരത്തും, കൊല്ലത്തും, കോട്ടയത്തും സി പി എമ്മിന് വനിതാ സ്ഥാനാർത്ഥികളില്ല. ആലപ്പുഴയിൽ ദലീമയെ മത്സരിപ്പിക്കാൻ തീരുമാനിച്ചിരിക്കുന്നു.
എന്തായാലും ടി എൻ സീമയുടെ കഷ്ടകാലം എന്നു പറയാം. ഭാര്യമാർ വരും അവർ ജയിക്കും, ചിലപ്പോൾ മന്ത്രിയുമാവും. അത്  ഉറപ്പാണ്.  

തെറ്റുകാരനല്ലെന്ന് എത്ര തവണ ആവർത്തിച്ചതാണ്, എന്നിട്ടും കസ്റ്റംസ് വിടുന്ന ലക്ഷണമില്ലത്രേ… സ്പീക്കർ ശ്രീരാമകൃഷ്ണന് കസ്റ്റംസ് നോട്ടീസ് അയച്ചിരിക്കയാണത്രേ… മാർച്ച് 12 ന് കൊച്ചിയിലെ ഓഫീസിൽ നേരിട്ട് ഹാജരാവണമെന്നാണ് കസ്റ്റംസിന്റെ ആവശ്യം. കേന്ദ്ര സർക്കാർ വിവിധ ഏജൻസികളെ ഉപയോഗിച്ച് രാഷ്ട്രീയമായി ഇല്ലാതാക്കാൻ നീക്കം നടത്തുന്നുവെന്ന മുഖ്യമന്ത്രിയുടെ പ്രസംഗം കേട്ടാണ് കസ്റ്റംസ് വീണ്ടും സടകുടഞ്ഞെഴുന്നേറ്റതത്രെ…

ഡോളർകടത്ത്, സ്വർണകടത്ത്, ഇനി ചെമ്മീൻ കടത്തെന്ന് പറഞ്ഞ് ചോദ്യം ചെയ്യാൻ വരുമോ എന്നാണ് ഡി വൈ എഫ് ഐ നേതാവ് റഹിമിന്റെ പരിഹാസ ചോദ്യം. ഇന്നു വൈകിട്ടത്തെ ഫേസ് ബുക്ക് പോസ്റ്റ് വായിച്ച് ചിരിച്ച നേതാക്കളെല്ലാം അൽപ്പം പരിഭ്രാന്തിയിലാണ്. അപ്പോ മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറിയായ സി എം രവീന്ദ്രനെയും ചോദ്യം ചെയ്യുമോ…. ഹേയ്… ഇല്ലായിരിക്കും.

എന്തായാലും കേസ് ഒടുവിൽ മുഖ്യമന്ത്രിയിലേക്ക് അടുക്കുകയാണ്. സോളാർ കേസിൽ സരിതാ നായർ ആദ്യം മുഖ്യമന്ത്രി ഉമ്മൻ ചാണ്ടിയെ രക്ഷിക്കാൻ ശ്രമിച്ചതും, പിന്നീട് എതിരാളിയായതും കേരള ജനത കണ്ടതാണ്. ചരിത്രം ആവർത്തിക്കുന്നു. പേരുകൾ മാത്രം മാറുന്നു എന്നുമാത്രം. ബോംബുകൾ ഇനിയും പൊട്ടുമായിരിക്കും. പ്രതിപക്ഷത്തിന്റെ
പ്രതീക്ഷകൾ വാനോളം ഉയരട്ടെ…

പാവം ശ്രീധരൻമാമയോടിത് വേണ്ടായിരുന്നു

മുഖ്യമന്ത്രി സ്ഥാനാർത്ഥിയായി ഇങ്ങനെ നിൽക്കുകയായിരുന്നു മെട്രോമാൻ. കേരളത്തിൽ ഉറപ്പായും ബി ജെ പി അധികാരക്കിൽ വരുമെന്ന് വിശ്വസിച്ചിരുന്ന ഏക വ്യക്തി മെട്രോമാൻ ഇ ശ്രീധരനായിരുന്നു. അധികാരത്തോടുള്ള ആർത്തിയോ, പണമോ ഒന്നുമായിരുന്നില്ല ഇ. ശ്രീധരന് മുഖ്യമന്ത്രി പദവി. കേരളത്തിന് വേണ്ടി എന്തെങ്കിലും ചെയ്യണമെന്ന അതിയായ ആഗ്രഹം.

തിരെഞ്ഞെടുപ്പിന് ഞങ്ങൾ പൂർണ സജ്ജമാണെന്നായിരുന്നു യു ഡി എഫിന്റെ നേതാക്കൾ പറഞ്ഞിരുന്നത്. മാർച്ച് മൂന്നാം തീയതി സ്ഥാനാർത്ഥികളെ പ്രഖ്യാപിക്കും, സീറ്റുവിഭജനം ഇതാ പൂർത്തിയായി എന്നൊക്കെ തട്ടിവിട്ട യു ഡി എഫ് കോട്ടയത്തുനിന്നും ഒരടി മുന്നോട്ട് പോയിട്ടില്ലത്രേ.

ഏതൊക്കെ മണ്ഡലത്തിൽ, ആരോക്കെ  മത്സരിക്കുമെന്ന് ഇതുവരെ പറയാൻ പോലും കോൺഗ്രസിന് പറ്റിയിട്ടുമില്ല.

പി ജെ ജോസഫിന്റെ പാർട്ടിയുമായുള്ള സീറ്റ് ചർച്ചയാണ് കോൺഗ്രസിന്റെ ഇപ്പോഴത്തെ പ്രധാന വിനോദ പരിപാടി. പി ജെ ജോസഫിന്റെ പാർട്ടിയിലെ കിങ്കരന്മാർ എല്ലാദിവസവും ചർച്ചയ്ക്കുവരും. കോട്ടയം ജില്ലയിലെ ചില സീറ്റുകളെ കുറിച്ച് സംസാരിക്കും, കോൺഗ്രസ് മത്സരിക്കാനായി തീരുമാനിച്ചിരിക്കുന്ന സീറ്റുകൾ വേണമെന്നാണ് പി ജെ യുടെ ആവശ്യം. തരില്ലെന്ന് കോൺഗ്രസ് നേതാക്കൾ പറയും. അവർ കൊട്ടിവന്ന ചെണ്ട തിരികെ കൊട്ടി മൂവാറ്റുപുഴയിലേക്ക് പോവും. അവിടെ ചെണ്ടകൊട്ടി കോട്ടയത്തുണ്ടായ കാര്യങ്ങൾ പറയും.
രോഗബാധിച്ച് ചികിത്സയിലായതിനാൽ പി ജെ നേരിട്ട് ചർച്ചയിൽ പങ്കെടുക്കുന്നില്ല. മറ്റാർക്കും തീരുമാനം എടുക്കാനും പറ്റില്ല. കോൺഗ്രസ് ഈ വിനോദം തുടരട്ടെ….ചെണ്ടയ്ക്ക് പകരം ഇനി പെറുമ്പറ മുഴക്കേണ്ടിവരും കാര്യങ്ങളിൽ തീരുമാനമാവാൻ.

പി സി യെ പൂട്ടാനായി ജോസ് മോൻ ….

ജോസ് കെ മാണിയെ തോൽപ്പിക്കാൻ പി സി കച്ചകെട്ടിയിറങ്ങിയിരിക്കയാണ്. മാണി സി കാപ്പനെ ജയിപ്പിച്ചേ അടങ്ങൂ എന്നാണ് പി സിയുടെ പ്രഖ്യാപനം. ഈ തെരഞ്ഞെടുപ്പോടെ ജോസ് കെ മാണിയുടെ കേരളാ കോൺഗ്രസ് നിലംപരിശാവുമെന്നാണ് പി സി യുടെ പ്രഖ്യാപനം. പി സി പറഞ്ഞാൽ പറഞ്ഞതാ….

മൂന്ന് കേന്ദ്ര ഏജൻസികളെ ഉപയോഗിച്ച് കുരുക്കാൻ നോക്കിയിട്ടും, ഒരു രോമത്തിൽ പോലും തൊടാൻ പറ്റിയിട്ടില്ലെന്ന് മന്ത്രി കെ ടി ജലീൽ. എളാപ്പയിങ്ങനെയാ… വെറുതെ വെല്ലുവിളിക്കും. പൊന്നാനിയിൽ ശ്രീരാമകൃഷ്ണന് സീറ്റില്ലാതെ വന്നതും, കെ ടി ജലീൽ വീണ്ടും മത്സരത്തിനറങ്ങുന്നതും എല്ലാം രോമസ്പർശനവുമായി ബന്ധമുണ്ട്.

മുഖ്യമന്ത്രി രാജിവെക്കണമെന്നാണ് രമേശ് ചെന്നിത്തല പറയുന്നത്. കുറച്ചു ദിവസം കൂടി ക്ഷമിക്കണം രമേശ് ജീ…