ക്വട്ടേഷൻ @ കണ്ണൂർ. കോം

രാജേഷ് തില്ലങ്കേരി

ബ്രണ്ണൻ കലാപത്തിന് ശേഷം സി പി എമ്മിന്  ശനിദശയാണെന്നാണ് ചിലരുടെ അടക്കം പറച്ചിൽ. വെറും ശനിയല്ലെന്ന്, കണ്ഠകശനിയാണത്രേ…. കണ്ഠകശനി കൊണ്ടേ പോവൂ എന്നൊരു വിശ്വാസവും നാട്ടിലുണ്ട്.

രാഷ്ട്രീയ എതിരാളികളെ ഉൻമൂലനം ചെയ്യുകയെന്ന ജോലിയായിരുന്നു കണ്ണൂരിലെ പാർട്ടി ഗുണ്ടകൾക്കുണ്ടായിരുന്നത്. യൂത്ത് കോൺഗ്രസ് നേതാവായിരുന്ന ്ചാലോട് സ്വദേശി ഷുഹൈബിന്റെ കൊലയോടെ സി പി എം പരിപാടി അവസാനിപ്പിച്ചു. പിന്നീട് കണ്ണൂരിൽ ഒരു രാഷ്ട്രീയ കൊല നടക്കുന്നത് 2021 ഏപ്രിൽ 6 നാണ്.  ഏതാണ്ട് രണ്ടര വർഷമായി കൊലപാതങ്ങളൊന്നുമില്ലാതെ വലിയ ടെൻഷനിലായിരുന്നു ക്രിമനൽ സംഘം. ഇടയ്ക്കിടെ ബോംബുണ്ടാക്കുക, അത് പൊട്ടിക്കുക, ഭീകരാന്തരീക്ഷം സൃഷ്ടിക്കുക…. ഇതിലൂടെ രാഷ്ട്രീയ പ്രതിയോഗികളെ ഭയപ്പെടുത്തി നിർത്തുക.

ഇതാണ് കണ്ണൂരിലെ പാർട്ടി ലൈൻ. എന്നാൽ പാർട്ടി കൊലപാതക രാഷ്ട്രീയത്തിന് ഇടവേള നൽൽകിയതോടെ  ആയുധങ്ങൾ ചോരകണ്ടിട്ട് കാലം കുറേയായി. ഫെയിസ് ബുക്കിൽ ഗുണ്ടായിസമുണ്ട്, പക്ഷേ,  അത് നേരിട്ടുള്ള പരിപാടിയല്ലല്ലോ. ഗുണ്ടകൾക്ക് എന്നും ചോരകാണണം, ചോരയുടെ മണമാണ് ഒരു ഗുണ്ടയെ ഗുണ്ടയായി നിലനിർത്താൻ പ്രേരിപ്പിക്കുന്ന ഘടകം. സൈബർ ഗുണ്ടായിസം ആർക്കും ചെയ്യാവുന്നതാണ്, ആയുധമെടുത്ത പോരാളിക്ക് അത് എന്നും കൊണ്ടുനടക്കാൻ പറ്റില്ലല്ലോ. പാർട്ടി ഗുണ്ടകൾ പിന്നീട് പ്രൊഷണൽ ഗുണ്ടകളായി മാറുന്നതും, ക്വട്ടേഷൻ സംഘമായി മാറുന്നതും പുതിയ സംഭവമല്ല.

കണ്ണൂരിലെ ക്വട്ടേഷൻ സംഘം, വടകരയിലെ ബലാൽസംഗം, വനിതാക്കമ്മീഷന്റെ രാജി ഇങ്ങനെ പോവുന്നു ആ പട്ടിക. പാർട്ടി പറഞ്ഞാൽ തല്ലും, കൊല്ലും…ചങ്ക് പറിച്ചുനൽകും… ഇതാണ് കണ്ണൂരിലെ പാർട്ടി ഗുണ്ടകളുടെ രീതി. യൗവനത്തിൽ തന്നെ ഗുണ്ടകളായി മാറുന്നവരാണ് ഇവർ. ആക്ഷനിൽ പങ്കെടുത്തുകഴിയുന്നതോടെ ഇവർ പ്രഖ്യാപിത പാർട്ടിഗുണ്ടകളായി മാറിക്കഴിയും. കാലം പിന്നെയും മുന്നോട്ട് പോവുമ്പോൾ ഈ ഗുണ്ടകൾ അനഭിമതരായി മാറും. ഇതോടെ പണത്തിനുവേണ്ടി ഇവർ വലിയ ക്രിമിനൽ സംഘമായി മാറും. അതെ,  പ്രൊഷഷണൽ  ക്വട്ടേഷൻ സംഘമായി പരിണമിക്കുന്ന പാർട്ടിഗുണ്ടകൾ….
 കണ്ണൂരിലെ സി പി എം കടുത്ത പ്രതിരോധത്തിലാണ്. സ്വർണക്കടത്തുമായി പാർട്ടി ഗുണ്ടകൾക്ക് ബന്ധമുണ്ടെന്ന ആരോപണമാണ് പാർട്ടിയെ വിവിാദങ്ങളിലേക്ക് നയിച്ചിരിക്കുന്നത്. അർജുൻ ആയങ്കി, ആകാശ് തുടങ്ങിയവരുടെ അധോലോക ബന്ധമാണ് പാർട്ടിയെ പിടിച്ചുലയ്ക്കുന്നത്.  

വി എസ് പക്ഷക്കാരിയായിരുന്നതിനാൽ ജോസഫൈൻ എന്നും അവഗണിക്കപ്പെട്ടു. ഒടുവിൽ കിട്ടിയ വനിതാ കമ്മീഷൻ അധ്യക്ഷയുടെ കസേരയാണെങ്കിൽ തലമുതിർന്ന നേതാവ് അത്രയങ്ങോട്ട് സഹിക്കാൻ പറ്റുന്നതായിരുന്നില്ല. ഇന്നലെ വന്നവർപോലും മന്ത്രിമാരായി വിലസുമ്പോൾ ഒരു വനിതാ കമ്മീഷൻ അധ്യക്ഷയായി ഒതുങ്ങേണ്ടിവന്നതിന്റെ വേദനയിലായിരുന്നു ജോസഫൈൻ.  

എന്തായാലും പരാതിയുമായി ആർക്കും അങ്ങോട്ട് കടന്നു ചെല്ലാൻ പറ്റാത്ത പരുവത്തിലാക്കി വനിതാ കമ്മീഷനെ മാറ്റിയെടുത്തതിന്റെ ക്രഡിറ്റ് ജോസഫൈനുതന്നെ. പലതവണ പരാതി വന്നപ്പോഴും മുഖ്യമന്ത്രി സഭയിൽ പറഞ്ഞത് , അസൂയയാണ് എന്നായിരുന്നു. ശരിയാണ് സാർ ആരും അസൂയപ്പെട്ടുപോവും. കമ്മീഷൻ അധ്യക്ഷയുടെ കാര്യത്തിൽ മാത്രമല്ല, കമ്മീഷൻ അംഗമായി എത്തിയ നവ കമ്യൂണിസ്റ്റായ ഷാഹിദ കമാലിന്റെ കാര്യത്തിലും അസൂയയുണ്ട് സാർ.

വിദ്യാർത്ഥി രാഷ്ട്രീയപ്രവർത്തനം തലയ്ക്ക് പിടിച്ചതിന്റെ പേരിൽ പഠനം മുടങ്ങിപ്പോയ ഷാഹിദാ കമാൽ മാഡം ഇപ്പോഴിതാ ബിരുദവും ബിരുദാനന്തര ബിരുദവും നേടിയിരിക്കുന്നു. അതു മാത്രമോ ഡോക്ടറേറ്റും കൈവശപ്പെടുത്തിയിരിക്കുന്നു. ഇത്തരം നേട്ടങ്ങളിൽ  ശരിക്കും ഷാഹിദാ മാഡത്തിനെ അഭിനന്ദിക്കണം, ആനന്ദിപ്പിൻ സഖാക്കളെ.

വെറും ഡിഗ്രി ഡ്രപ്പൗട്ടായിരുന്ന ഷാഹിദ മാഡം സി പി എമ്മിലെത്തിയതോടെ ആകെ മാറിയില്ലേ, വനിതാ കമ്മീഷൻ അംഗമായി, ഫെലോ ആയി…. അസൂയക്കാർ പലതും പറയും, ഏതോ ഡ്യൂപ്ലിക്കേറ്റ് സർവ്വകലാശാലയിൽ നിന്നും ഡോക്ടറേറ്റ് നേടിയെന്നൊക്കെ അപമാനിക്കും. മാഡം അതൊന്നും കേട്ട് ക്ഷുഭിതയാവരുത്. വനിതാ കമ്മീഷൻ അംഗമാണെന്ന് ഓർമ്മ വേണം.

 പടിയിറങ്ങുന്ന ലോക് നാഥ് ബഹറ

സംസ്ഥാന പൊലീസ് മേധാവി ലോക്‌നാഥ് ബഹറ സ്ഥാനമൊഴിയുകയാണ്. നിരവധി വിവാദങ്ങളാണ് ബഹറയുടെ കാലത്ത് പൊലീസിനെതിരെ ഉണ്ടായത്. രണ്ട് മാവോയിസ്റ്റ് വേട്ട മുതൽ രാഷ്ട്രീയ ആരോപണങ്ങൾവരെ ബഹറയ്ക്ക് നേരെ ഉയർന്നു. ബി ജെി പി യുമായുള്ള പാലമാണ് ബഹറയെന്നുവരെ ആരോപണമുയർന്നു. എന്നാൽ ആരോപണങ്ങളൊന്നും ശരിയല്ലെന്നാണ് ബഹറയുടെ വെളിപ്പെടുത്തൽ.