എലിയെ കൊല്ലാനായി ഇല്ലം ചുടുന്ന ചാണ്ടിത്തലയന്മാർ

രാജേഷ് തില്ലങ്കേരി


കോൺഗ്രസിൽ ഗ്രൂപ്പ് പോരാട്ടം ഒരിടവേളയ്ക്ക് ശേഷം ശക്തമായിരിക്കയാണ്. കെ സുധാകരന്റെ നേതൃത്വത്തിനെതിരെ ശക്തമായ നിലപാടാണ് മുൻ മുഖ്യമന്ത്രിയും മുതിർന്ന കോൺഗ്രസ് നേതാവുമായ ഉമ്മൻ ചാണ്ടി സ്വീകരിച്ചിരിക്കുന്നത്. തന്നോട് ആലോചിക്കാതെയാണ് കോൺഗ്രസ് നേതൃത്വം തീരുമാനങ്ങൾ കൈക്കൊള്ളുന്നതെന്നാണ് ഉമ്മൻ ചാണ്ടിയുടെ സ്ഥിരം പരാതി. ചാണ്ടിക്ക് കൂട്ടായി ചെന്നിത്തല ഗാന്ധിയുമുണ്ട്. മുഖ്യമന്ത്രിയാവാനായി കുപ്പായം തുന്നിയ മുൻ പ്രതിപക്ഷ നേതാവിന് ഇത് പകയാണ്. എന്നാൽ ഉമ്മൻ ചാണ്ടിക്ക് ഇത് ഗ്രൂപ്പാണ്. ഗ്രൂപ്പും ട്രൂപ്പും കളിച്ച് പരസ്പരം കാലുവാരിയും കാലുവെട്ടിയും ആണ് കോൺഗ്രസ് ഈ ഗതികേടിലെത്തിയതെന്ന് ഈ നേതാക്കൾക്കൊഴികെ മറ്റെല്ലാവർക്കും അറിയാവുന്നതാണ്. ശത്രുവെ ശത്രുവിനെ കൊണ്ട് നേരിടുന്ന ഡിങ്കന്റെ നയങ്ങളാണ് ഉമ്മൻ ചാണ്ടി നടപ്പാക്കുന്നത്. നേരത്തെ ബദ്ധവൈരിയായിരുന്ന രമേശ് ചെന്നിത്തലയെ കൂട്ടുപിടിച്ചാണ് ഉമ്മൻ ചാണ്ടി പോരാട്ടം നടത്തുന്നത്.

പുതിയ പ്രതിപക്ഷനേതാവിനെ പ്രഖ്യാപിച്ചതോടെയാണ് രമേശ് ചെന്നിത്തല ഇടഞ്ഞത്.  കെ പി സി സി ഭാരവാഹികളെ തീരുമാനിച്ചതോടെ ഉമ്മൻ ചാണ്ടിയും ഇടഞ്ഞു. ഇടഞ്ഞ കൊമ്പൻമാരെ തളയ്ക്കുകയെന്നതായി ഹൈക്കമാന്റിന്റെ ജോലി. പരാതിയോട് പരാതി. ഡി സി സി ഭാരവാഹികളെ പ്രഖ്യാപിച്ചപ്പോഴും അതു തുടർന്നു. ഇവിടെ ഒന്നും കിട്ടീല്ലാ…. എന്നാണ് ഇവരുടെ പരാതി.

കെ സുധാകരൻ നയിക്കുന്ന കെ പി സി സി യുമായി ഐക്യപ്പെടാൻ ഇരു നേതാക്കൾക്കും പറ്റുന്നില്ലത്രേ… ഇവർക്കു മാത്രമല്ല പ്രശ്‌നം. മുൻ കെ പി സി സി അധ്യക്ഷൻമാരായ വി എം സുധീരൻ, മുല്ലപ്പള്ളി രാമചന്ദ്രൻ മാർക്കും ഈ പ്രശ്‌നമുണ്ട്. എല്ലാ പദവികളും രാജിവച്ച് ബഹളമുണ്ടാക്കി നോക്കിയെങ്കിലും സുധീര ഗാന്ധിയെ ആരും അത്ര ഗൗനിച്ചില്ലത്രേ… പാവം.

 

വാക്‌സിൻ എടുക്കാത്തതിനായി പറയുന്ന ഒരു ന്യായമാണ് ആർക്കും മനസിലാവാത്തത്. മതപരമായ കാരണങ്ങളാൽ വാക്‌സിൻ എടുത്തില്ലെന്നത്. അലർജി, ആരോഗ്യ പ്രശ്‌നങ്ങൾ പോലെതന്നെയാണ് മതപരമായ കാരണങ്ങളാൽ എന്നു വിചാരിക്കാൻ കഴിയുമോ.

ഇവർക്കെതിരെ എന്തായാലും ശക്തമായ നടപടിയുണ്ടാവുമെന്നാണ് വകുപ്പ് മന്ത്രി പറയുന്നത്. ഇത്രയും ബുദ്ധിയില്ലാത്തവർ പഠിപ്പിക്കുന്ന വിദ്യാലയത്തിന്റെ അവസ്ഥ, ആ വിദ്യാർത്ഥികളുടെ അറിവ് ഒക്കെ പ്രശ്‌നമല്ലേ… സാർ…


മുല്ലപ്പെരിയാർ ജലബോംബാണെന്ന് എം എം മണി

അതാണ് ഇടുക്കിക്കാർക്ക് മണിയാശാനെ പണ്ടുമതലേ ഇഷ്ടം. എന്തും വെട്ടിത്തുറന്ന് പറയും, അതിൽ ഒരു ഭയവുമില്ല. വൺ ടൂ ത്രീ കേസും ഗുലുമാലും ഒക്കെ ഉണ്ടായത് ഈ നിഷ്‌ക്കളങ്കമായ രീതികൊണ്ടാണെന്നാണ് മണിയാശാൻ ഫാൻസുകാർ പറയുന്നത്. മൂന്നാർ കയ്യേറ്റവുമായി ബന്ധപ്പെട്ട് മണി ആശാൻ നടത്തിയ പദപ്രയോഗങ്ങളും ഏറെ വിവാദമായി. എന്നാൽ അതൊന്നും മണിയാശാന്റെ ജനപ്രീതിക്ക് കോട്ടമുണ്ടാക്കിയില്ലെന്ന് ആശാനു കിട്ടിയ വോട്ടുതന്നെ തെളിവായി.