കൊവിഡ് പ്രോട്ടോക്കോൾ പുല്ലാണ്, റവന്യൂ വകുപ്പിന്റെ ഉത്തരവും നമുക്ക് പുല്ലാണ്……..

രാജേഷ് തില്ലങ്കേരി


രാജ്യത്ത് കൊവിഡ് വ്യാപനം ശക്തമാണ്. കൊവിഡ് പ്രതിരോധത്തിൽ ലോകത്തിന് മാതൃകയായിരുന്ന കേരളം ഇന്ന് കൊവിഡ് വ്യാപനത്തിൽ ലോകത്തിന് അത്ഭുതമായി തീർന്നിരിക്കയാണ്. കേരളത്തിൽ കൊവിഡ് വ്യാപനം അതിശക്തമാണ്. ആരോഗ്യവകുപ്പിന് കൊവിഡ് വ്യാപനം തടയുന്നതിൽ വലിയ വീഴ്ചയാണ് സംഭവിച്ചിരിക്കുന്നത്. 

വി എസ് അച്യുതാനന്ദൻ മുഖ്യമന്ത്രിയായിരുന്നപ്പോൾ ചില പൂച്ചകളുടെ അകമ്പടിയോടെ മൂന്നാറിലെ കയ്യേറ്റ ഭൂമി പിടിച്ചെടുക്കാൻ ഒരു നീക്കം നടത്തി. എന്നാൽ പാതിവഴിക്കുവച്ച് മൂന്നാർ ദൗത്യം മതിയാക്കി വി എസിന് പിൻവാങ്ങേണ്ടിയും വന്നു. സി പി എം നേതാക്കളുടെ ശക്തമായി എതിർപ്പായിരുന്നു മൂന്നാർ ദൗത്യം പരാജയപ്പെടാൻ കാരണം. ഇടുക്കി രാജ്യത്തെ രാജാവായിരുന്ന എം എം മണി അന്ന് വി എസിനെതിരെ തിരിഞ്ഞു. വി എസിനെ വെല്ലുവിളിച്ചു. കാലം ഏറെ പിന്നിട്ടു. എം എം മണി പിന്നീട് മന്ത്രിയായി. രണ്ടാമതും എം എം മണി ജനപ്രതിനിധിയായി. കഴിഞ്ഞ ദിവസം റവന്യൂവകുപ്പ് ഒരു ഉത്തരവ് പുറപ്പെടുവിച്ചിരുന്നു. അത് രവീന്ദ്രൻ പട്ടയം റദ്ദാക്കാനുള്ളതായിരുന്നു.

ദേവികളും താലൂക്കിലെ വിവിധ വില്ലേജുകളിലായി കിടക്കുന്ന 532 രവീന്ദ്രൻ പട്ടയം റദ്ദാക്കാനായിരുന്നു ആ ഉത്തരവ്. ഉത്തരവ് കണ്ട് എം എം മണിക്ക് ഹാലിളകി. അദ്ദേഹം ആദ്യം കാർക്കിച്ചു തുപ്പി, എന്നിട്ട് ഒരു പുല്ലനും ഉത്തരുമായി വരേണ്ടതില്ലെന്ന് പ്രഖ്യാപിച്ചു. മണിയാശാന്റെ ഈ ചൂടിനുള്ള കാരണം അധികമൊന്നും തിരക്കേണ്ട കാര്യമില്ല. സി പി എം ഓഫീസ് പ്രവർത്തിക്കുന്നത് രവീന്ദ്രൻ പട്ടയഭൂമിയിലാണ്. മാത്രവുമല്ല, മണിയാശാന്റെ പേരിലാണേത്രേ  ആ പട്ടയം. 

ആശാനും കുടുംബവും താമസിക്കുന്നുഎന്ന രേഖയുണ്ടാക്കിയാണ് രവീന്ദ്രനെ സ്വാധീനിച്ച് പട്ടയം നേടിയത്. രവീന്ദ്രൻ അതി ബുദ്ധിമാനായിരുന്നു, അതിനാലാണ് സി പി എം ഓപീസിനും പട്ടയം നൽകിയത്. പാർട്ടി പിന്നീട് ആ പട്ടയം സംരക്ഷിക്കുമെന്നാണ് രവീന്ദ്രനെന്ന ബു്ദ്ധിമാന് അറിയാമായിരുന്നു. ഇതാ എം എം മണി കട്ടക്ക് നിൽക്കയാണ് രവീന്ദ്രനെ സംരക്ഷിക്കാനായി. കാർഷിക ഭൂമിക്ക് മാത്രമാണ് പട്ടയം. അത് അട്ടിമറിച്ചാണ് വല്യേട്ടനും കുഞ്ഞേട്ടനും പട്ടയം സംഘടിപ്പിച്ചത്. എന്തായാലും പോരാട്ടത്തിലാണ് ഇടുക്കിയിലെ രാഷ്ട്രീയ നേതാക്കൾ. സി പി എം- സി പി ഐ പോരാട്ടത്തിലാണ് രവീ്ന്ദ്രൻ പട്ടയം.

അന്വേഷണ ഉദ്യോഗസ്ഥരെ അപായപ്പെടുത്താൻ ഗൂഢാലോചന; ദിലീപ്  കുരുക്കിലേക്ക്

നടൻ ദിലീപിനെതിരെ കൊലപാതകത്തിനുള്ള വകുപ്പ് കൂടി ചേർത്തിരിക്കയാണ്.  കൊലപാതകം നടത്തുന്നതിനുള്ള ഗൂഡാലോചന കുറ്റമാണ് ചുമത്തിയത്. നേരത്തെ ഗൂഢാലോചന കുറ്റത്തിനുള്ള 120 ബി ആണ് ചുമത്തിയിരുന്നു. ഇതിന് ഒപ്പം ആണ് കൊലപാതകത്തിനുള്ള 302 വകുപ്പ് കൂടി ചേർത്തത്.
നേരത്തെ ചുമത്തിയ വകുപ്പുകളിൽ മാറ്റം വരുത്തി അന്വേഷണ ഉദ്യോഗസ്ഥൻ കോടതിയിൽ റിപോർട്ട് നൽകി. ഈ കേസിൽ ദിലീപിന്റെ മുൻകൂർ ജാമ്യാപേക്ഷ ഹൈക്കോടതി ് പരിഗണിക്കാനിരിക്കെയാണ് അന്വേഷണ സംഘത്തിന്റെ ഈ നീക്കം. ദീലീപിന് ജാമ്യം നൽകുന്നത് നേരത്തെ പ്രോസിക്യൂഷൻ എതിർത്തിരുന്നു. ഒന്നാം പ്രതി ദിലീപിനൊപ്പം സഹോദരൻ അനൂപ്, സഹോദരി ഭർത്താവ് സുരാജ്, സുഹൃത്ത് ശരത് അടക്കമുളള പ്രതികൾ സമാന ഹർജി നൽകിയിട്ടുണ്ട്

ഇത് അസാധാരണമായ കേസാണെന്നും, ലൈംഗികപീഡനത്തിന് ക്രിമിനലുകൾക്ക് ക്വട്ടേഷൻ നൽകിയത് നീതിന്യായവ്യവസ്ഥയുടെ ചരിത്രത്തിൽത്തന്നെ ആദ്യമാണെന്നും, സമൂഹത്തിൽ വലിയ സ്വാധീനമുള്ള ദിലീപിന് മുൻകൂർ ജാമ്യം നൽകുന്നത് കേസിനെത്തന്നെ ബാധിക്കുമെന്നുമാണ് പ്രോസിക്യൂഷൻ നിലപാട്. സത്യം പുറത്തുവരാൻ ദിലീപിനെ കസ്റ്റഡിയിലെടുത്ത് ചോദ്യം ചെയ്യണമെന്നും പ്രോസിക്യൂഷൻ ആവശ്യപ്പെടുന്നുണ്ട്.

ക്രിമിനൽ കേസിലെ പ്രതി അന്വേഷണ ഉദ്യോഗസ്ഥരെ അപായപ്പെടുത്താൻ ശ്രമിക്കുന്നത് കേട്ടുകേൾവിയില്ലാത്തതാണെന്ന് പ്രോസിക്യൂഷൻ ചൂണ്ടിക്കാട്ടുന്നു. കേസിലെ മുഖ്യസൂത്രധാരൻ ദിലീപ് തന്നെയാണെന്നാണ് പ്രോസിക്യൂഷൻ പറയുന്നത്. കേസിലിതുവരെ 20 സാക്ഷികളാണ് കൂറുമാറിയത്. ഇതെല്ലാം ദിലീപിൻറെ സ്വാധീനത്തോടെയാണ്. അസാധാരണമായ ഒരു കേസാണിത്. നടിയെ ആക്രമിച്ച കേസുമായി ബന്ധപ്പെട്ട അന്വേഷണ ഉദ്യോഗസ്ഥരെ അപായപ്പെടുത്താൻ ദിലീപും കൂട്ടുപ്രതികളും ഗൂഢാലോചന നടത്തിയത് സംബന്ധിച്ച് വിശദമായ അന്വേഷണം നടക്കുകയാണ്. നിരവധി തെളിവുകളും ഇത് വരെ ശേഖരിച്ചിട്ടുണ്ട് – പ്രോസിക്യൂഷൻ ചൂണ്ടിക്കാട്ടുന്നു.

നടിയെ ആക്രമിച്ച കേസിൽ പ്രതിയായത് മുതൽ നിയമത്തിൻറെ പിടിയിൽ നിന്ന് വഴുതിമാറാനുള്ള സകല നീക്കങ്ങളും ദിലീപ് നടത്തുകയാണെന്ന് പ്രോസിക്യൂഷൻ ആരോപിക്കുന്നു. ഗൂഢാലോചനക്കേസ് ഗുരുതരസ്വഭാവമുള്ളതാണ്. ബാലചന്ദ്രകുമാർ കൈമാറിയ ശബ്ദസാമ്പിളുകളും പ്രതികളുടെ ശബ്ദവും ഫൊറൻസിക് പരിശോധന നടത്തണം.

അന്വേഷണത്തെ തടസ്സപ്പെടുത്താനാണ് ദിലീപ് ശ്രമിക്കുന്നത്. വലിയ സ്വാധീനമുള്ള വ്യക്തിയാണ് ദിലീപ്. അതിനാൽ എട്ടാം പ്രതിയായ ദിലീപിന് മുൻകൂർ ജാമ്യം നൽകിയാൽ അത് കേസിൻറെ അന്വേഷണത്തെത്തന്നെ പ്രതികൂലമായി ബാധിക്കും. അതിനാൽ ഒരു കാരണവശാലും ദിലീപിന് മുൻകൂർ ജാമ്യം നൽകരുതെന്നും സത്യം പുറത്തുവരാൻ ദിലീപിനെ കസ്റ്റഡിയിലെടുത്ത് ചോദ്യം ചെയ്യേണ്ടതുണ്ടെന്നും പ്രോസിക്യൂഷൻ കഴിഞ്ഞ തവണ കേസ് പരിഗണിക്കവെ കോടതിയെ അറിയിച്ചിരിക്കുകയാണ് . ദിലീപിനിത് എന്തായാലും നല്ല കാലമല്ലെന്ന് വ്യക്തം.


സിൽവർ ലൈൻ- പ്രതിഷേധം ശക്തമാവുന്നു


കെ റെയിൽ പദ്ധതി എന്തുവന്നാലും നടപ്പാക്കുമെന്നായിരുന്നു മുഖ്യമന്ത്രി പിണറായി വിജയന്റെ പ്രഖ്യാപനം. കെ-റെയിൽ പദ്ധതി നടപ്പാക്കാനായി കേരളത്തിലെ വിവിധ കേന്ദ്രങ്ങളിൽ പൗരപ്രമുഖരെ വിളിച്ചു ചേർത്തുകൊണ്ടാണ് ജനപിന്തുണയുണ്ടെന്നും കെ-റെയിൽ സ്ഥാപിക്കുന്നതോടെ കേരളത്തിനുണ്ടാവുന്ന ഗുണഗണങ്ങളെകുറിച്ചുള്ള വീരഗാഥകൾ പാടിപ്പുകഴ്ത്തിയത്. പാണന്മാർ ഇനി കെ റെയിലിന്റെ മഹത്വഗാഥകൾ നാട്ടിലുടനീളം പാടിനടക്കുമെന്നും പിണറായി പ്രയഖ്യാപിച്ചു. പൗരപ്രമുഖർ ഇതെല്ലാം കയ്യടിച്ച് അംഗീകരിച്ചു. പൗര പ്രമുഖരായി പിണറായി നൽകിയ അംഗീകാരത്തിന്റെ ആവേശത്തിലായിരുന്നല്ലോ അവരൊക്കെ.

സമര പ്രഖ്യാപനവുമായി കെ റെയിൽ വിരുദ്ധ സമിതിയും സജീവമായി രംഗത്തുണ്ട്. മാടായിപ്പാറയിലും, അങ്കമാലിയിലും സർവ്വേക്കുറ്റികൾ പിഴുത് റീത്ത് വച്ചു. സർവ്വേ നടത്താനുള്ള ശ്രമത്തെയും തടഞ്ഞതോടെയാണ് വിശദീകരണ യോഗവുമായി മന്ത്രിമാർ രംഗത്തെത്തിയത്. കണ്ണൂരിൽ മന്ത്രി എം വി ഗോവിന്ദന്റെ വിശദീകരണ യോഗത്തിലേക്ക് കോൺഗ്രസ് പ്രവർത്തകർ ഇടിച്ചുകയറിയതോടെ സംഘർഷമായി. കേരളം കൂടുതൽ സമരമുഖത്തേക്ക് അടുക്കുകയാണ് എന്ന് വ്യക്തം.