ന്യൂഡൽഹി: സമൂഹമാധ്യമ പ്ലാറ്റ്ഫോമുകളായ വാട്സാപ്പ്, ഫേസ്ബുക്ക്, ട്വിറ്റർ, ഇൻസ്റ്റഗ്രാം എന്നിവക്ക് നാളെ മുതൽ വിലക്ക് വരുമോയെന്ന് ആശങ്ക. കേന്ദ്രസർക്കാർ കൊണ്ടുവന്ന പുതിയ ഐ.ടി നിയമങ്ങൾ സമൂഹമാധ്യമങ്ങൾ നടപ്പാക്കേണ്ട അവസാന തീയതിയാണ് മെയ് 25. കൂ ആപ് ഒഴികെയുള്ള ഇന്ത്യയിലെ മറ്റ് വമ്പൻമാരൊന്നും ഈ നിയമങ്ങൾ നടപ്പാക്കുന്നതിനുള്ള നടപടികൾ സ്വീകരിച്ചിട്ടില്ല.
പുതിയ നിയമങ്ങൾ കഴിഞ്ഞ ഫെബ്രുവരിയിലാണ് കേന്ദ്രസർക്കാർ കൊണ്ടു വന്നത്. ഇത് നടപ്പിലാക്കാൻ ആറ് മാസത്തെ സമയം കമ്പനികൾ തന്നെ കേന്ദ്രസർക്കാറിനോട് ചോദിക്കുകയായിരുന്നു. എന്നാൽ, ഇപ്പോഴും പൂർണമായി ഇത് നടപ്പിലാക്കാൻ സാധിച്ചിട്ടില്ലെന്നാണ് ഫേസ്ബുക്ക് വ്യക്തമാക്കുന്നത്.
പുതിയ ഐ.ടി നിയമങ്ങൾ നടപ്പിലാക്കാനുള്ള ശ്രമം തുടരുകയാണ്. ചില വിഷയങ്ങളിൽ കേന്ദ്രസർക്കാറുമായി ഇനിയും ചർച്ച വേണം. ജനങ്ങളുടെ സുരക്ഷക്ക് ഞങ്ങൾ വലിയ പ്രാധാന്യമാണ് നൽകുന്നതെന്നാണ് ഇക്കാര്യത്തിലെ ഫേസ്ബുക്ക് വിശദീകരണം. രാജ്യത്ത് 53 കോടി വാട്സാപ് ഉപയോക്താക്കളുണ്ട്. യൂട്യൂബിൽ 44.8 കോടി, ഫേസ്ബുക്ക് 41 കോടി, ഇൻസ്റ്റഗ്രാം 11 കോടി, ട്വിറ്റർ 1.75 കോടി എന്നിങ്ങനെയാണ് മറ്റുള്ളവയുടെ സാന്നിധ്യം.
