അൽ ഐൻ: യു.എ.ഇ നാഷനൽ തർതീൽ ഞായറാഴ്ച അൽ ഐൻ വഫാ സ്ക്വയറിൽ നടക്കും. ‘വിശുദ്ധ റമളാൻ വിശുദ്ധ ഖുർആൻ’ എന്ന തലക്കെട്ടിൽ ആർ.എസ്.സി ഗൾഫിൽ നടത്തിവരുന്ന ഹോളി ഖുർആൻ പഠന പാരായണ മത്സരങ്ങളുടെ യു.എ.ഇ തല സമാപന മത്സരമാണ് ഞായറാഴ്ച രാവിലെ 12 മുതൽ രാത്രി ഏഴുവരെ വഫാ സ്ക്വയറിൽ അരങ്ങേറുക.
യു.എ.ഇയിലെ 286 യൂനിറ്റുകളിൽനിന്നും സെക്ടർ സെൻട്രൽ തലങ്ങളിൽനിന്നും മത്സരിച്ചു വിജയിച്ച പ്രതിഭകൾ ജൂനിയർ, സീനിയർ, സൂപ്പർ സീനിയർ വിഭാഗങ്ങളിൽ തിലാവത്, ഹിഫ്ള്, ക്വിസ് , ഖുർആൻ സെമിനാർ, രിഹാബുൽ ഖുർആൻ എന്നീ വിവിധ മത്സരയിനങ്ങളിൽ പങ്കെടുക്കും. വിജയികൾക്ക് പ്രത്യേകം തയാറാക്കിയ ട്രോഫിയും സർട്ടിഫിക്കറ്റും നൽകും.
രാത്രി ഏഴിന് നടക്കുന്ന സമാപന പൊതുസമ്മേളനത്തിൽ ആർ.എസ്.സി, ഐ.സി.എഫ് ജി.സി.സി, നാഷനൽ, സെൻട്രൽ നേതാക്കൾക്ക് പുറമെ അൽ ഐനിലെ സാമൂഹിക സാംസ്കാരിക പൊതുരംഗത്തെ പ്രമുഖ വ്യക്തികൾ സംബന്ധിക്കും. സ്വാഗതസംഘം യോഗത്തിൽ വൈസ് ചെയർമാൻ ഹംസ മുസ്ലിയാർ ഇരിങ്ങാവൂർ അധ്യക്ഷത വഹിച്ചു. ബദറുദ്ദീൻ സഖാഫി ഉദ്ഘാടനം ചെയ്തു. അബ്ദുസമദ് സഖാഫി, നൗഫൽ കുളത്തൂർ, പി.ടി. ഷമീർ, അഷ്കർ വാണിയമ്പലം എന്നിവർ ചർച്ചക്ക് നേതൃത്വം നൽകി. ഇക്ബാൽ താമരശ്ശേരി സ്വാഗതവും മുഹമ്മദ് അലി തിരൂർ നന്ദിയും പറഞ്ഞു.