ചോറിനൊപ്പവും കപ്പ പുഴുങ്ങിയതോടൊപ്പവും മറ്റും മീൻ വറുത്തത് കഴിക്കാൻ ഇഷ്ടമില്ലാത്തവർ വളരെ കുറവായിരിക്കും. എന്നാൽ മീൻ വറുക്കുന്നതിന് നിറയെ എണ്ണ ആവശ്യമായതിനാൽ മിക്ക വീടുകളിലും ആഴ്ചയിൽ രണ്ടോ മൂന്നോ തവണ മാത്രമായിരിക്കും മീൻ വറുക്കുക. മാത്രമല്ല, വീട്ടിൽ എണ്ണ ഇല്ലെങ്കിൽ മീൻ വറുക്കൽ ഉപേക്ഷിക്കുകയേ തരമുള്ളൂ. എന്നാൽ എണ്ണ ഇല്ലെങ്കിലും മീൻ വറുക്കാൻ പറ്റിയാലോ. വീട്ടിൽ തേങ്ങ ഉണ്ടെങ്കിൽ എണ്ണയുടെ ആവശ്യമേ വരില്ല, നല്ല അസൽ മീൻ വറുത്തത് തയ്യാറാക്കാം.
ആദ്യം ഒരു കപ്പ് തേങ്ങ ചിരകിയതിലേയ്ക്ക് അൽപ്പം വെള്ളം ഒഴിച്ച് അരച്ചെടുക്കണം. ഈ തേങ്ങാപ്പാലിലേയ്ക്ക് മീൻ വറുക്കാൻ ആവശ്യമായ മസാലകൾ ചേർക്കാം. വെളുത്തുള്ളി പേസ്റ്റ്, കാൽ ടീ സ്‌പൂൺ മഞ്ഞൾപ്പൊടി അര ടീ സ്‌പൂൺ കാശ്മീരി മുളക് പൊടി, ആവശ്യത്തിന് കുരുമുളക് പൊടി, ഒരു ടീ സ്‌പൂൺ മല്ലിപ്പൊടി, ഒരു നുള്ള് കായപ്പൊടി, ഒരു നുള്ള് ഉലുവ പൊടി, ആവശ്യത്തിന് ഉപ്പ്, അര നാരങ്ങയുടെ നീര്, കുറച്ച് കറിവേപ്പില എന്നിവ തേങ്ങാപ്പാലിലേയ്ക്ക് ചേർക്കണം. ഇത് നന്നായി ഇളക്കി യോജിപ്പിച്ചതിനുശേഷം കഴുകി വൃത്തിയാക്കി കഷ്ണങ്ങളാക്കിയ മീനിലേയ്ക്ക് മസാലക്കൂട്ട് ചേർത്തുകൊടുക്കാം. ഇനി ഇത് ഒരു മണിക്കൂർ മാറ്റിവയ്ക്കണം.
ശേഷം ഒരു ചീനച്ചട്ടിയിൽ മീൻ കഷ്ണങ്ങളിട്ട് എണ്ണ ഒരു തുള്ളി പോലും ചേർക്കാതെ വറുത്തെടുക്കാം. എണ്ണയിൽ വറുത്തതിനേക്കാൾ സ്വാദോടെ മീൻ വറുത്തത് ചോറിനൊപ്പവും മറ്റും കഴിക്കാം.
