വാങ്ങിയ കിറ്റിന് നന്ദി കാണിച്ച കേരളമേ….നന്ദി

രാജേഷ് തില്ലങ്കേരി


ഉണ്ടചോറിന് നന്ദി കാണിക്കണമെന്നൊരു ചൊല്ലുണ്ട്, കേരളീയർ അത് കാണിച്ചു.
കേരളത്തിലെ വാശിയേറിയ തെരഞ്ഞെടുപ്പിൽ യു ഡി എഫ് മൂക്കുംകുത്തി വീണു. പിണറായി വിജയൻ ചരിത്രം രചിച്ചുകൊണ്ട് നേടിയത് തുടർഭരണം. അഞ്ച് വർഷം  കൂടുമ്പോൾ ഭരണ മാറ്റം എന്ന കലാപരിപാടിക്ക് മാറ്റം വന്നിരിക്കുന്നു.

കിറ്റും, പെൻഷനും വാങ്ങിയ മലയാളികൾ വോട്ട് ചെയ്യണമെന്ന മുഖ്യമന്ത്രിയുടെ ആവശ്യം കേരളീയർ അംഗീകരിച്ചു. അവർ ഇടം വലം നോക്കാതെ ഇടതിന് വോട്ടു ചെയ്തു. അങ്ങിനെ കേരളം പുതുചരിത്രം രചിച്ചു,  
പാവം, കേരളത്തിന്റെ അടുത്ത മുഖ്യമന്ത്രിയാവാനായി ഇത്രയും കാലം വെള്ളം കോരുകയും വിറക് വെട്ടുകയും ചെയ്ത പാവം രമേശ് ചെന്നിത്തലയുടെ അദ്ധ്വാനമെല്ലാം വെറുതെയായി. ആ ഗാന്ധിശിഷ്യന്റെ വേദനകൾ ആരറിഞ്ഞു.

ബി ജെ പി വോട്ടുകൾ എങ്ങോട്ടുപോയി ?

കേരളത്തിൽ തെരെഞ്ഞെടുപ്പിൽ ഒട്ടേറെ താമരകൾ വിരിയുമെന്നായിരുന്നു ബി ജെ പി അവകാശപ്പെട്ടിരുന്നത്. താമരകൾ ഭരിക്കുന്ന ഒരു ദിനമാണ് വരാനിരിക്കുന്നതെന്നും താമരപ്പാർട്ടിയുടെ അധ്യക്ഷൻ പറഞ്ഞു കളഞ്ഞു. 140 സീറ്റുകളാണ് കേരളത്തിലുള്ളത്. 35 സീറ്റുകൾ കിട്ടിയാൽ കേരളത്തിൽ മന്ത്രിസഭയുണ്ടാക്കുമെന്നും താമരമാമൻ അവകാശപ്പെട്ടു. ഇതോടെ എല്ലാവരും കോൺഗ്രസിനെ സംശയിച്ചു. കോൺഗ്രസിനെ വിജയിപ്പിച്ചാൽ അത് ബി ജെ പി സർക്കാർ ഉണ്ടാക്കുമോ എന്നൊരു സംശയം ന്യൂനപക്ഷങ്ങൾക്കിടയിൽ ഉണ്ടായി, അതോടെ വോട്ടുകളെല്ലാം വഴിമാറി.

പാലക്കാട് മെട്രോമാനെ ബി ജെ പിയുടെ മുഖ്യമന്ത്രിയായി പ്രഖ്യാപിച്ച ആ ദിനത്തെക്കുറിച്ചാണ് ഇപ്പോൾ ഓർമ്മവരുന്നത്. പാവം ഇ ശ്രീധരൻ, എത്രയെത്ര പാലങ്ങൾ കെട്ടിയതാണ്. എല്ലാം അതിഗംഭീരമായിരുന്നു, പക്ഷേ, ഒടുവിൽ കെട്ടിയ മനക്കോട്ടകൾ തകർന്നടിഞ്ഞു. പാർട്ടി ആവശ്യപ്പെട്ടാൽ മുഖ്യമന്ത്രിയാവുമെന്നായിരുന്നു ശ്രീധരൻ സാറിന്റെ പ്രതികരണം. മെട്രോമാൻ ജിക്ക് വോട്ടു ചോദിക്കാൻ സാക്ഷാൽ മോദി ജി വരെ വന്നു. മോദി ശരിക്കും ആൾക്കൂട്ടം കണ്ട് ഞെട്ടുകയും ചെയ്തു. ഒരു മണ്ഡലത്തിൽ ഇതാണ് കഥയെങ്കിൽ കേരളം താമരകളാൽ സമ്പന്നമാവുമെന്ന് മോദിജി കരുതി. പക്ഷേ, എന്തു ചെയ്യാം, കോൺഗ്രസിലെ യുവ തുർക്കിയ്ക്ക് മുന്നിൽ മെട്രോമാൻ പാളം തെറ്റി വീഴുന്നതാണ് ഒടുവിൽ നാം കണ്ട കാഴ്ച.

പാലക്കാട് ഇതാണ് കഥയെങ്കിൽ അങ്ങ് നേമത്ത്, കുമ്മനം ജികേരളത്തിലെ  ഗുജറാത്തിൽ അടിപതറുന്ന കാഴ്ചയാണ് ഹൃദയം തകർത്തത്. വി ശിവൻകുട്ടിയെന്ന വിപ്ലവ പാർട്ടിയുടെ നേതാവ് നേമത്ത് വിജയിച്ചതോടെ നേമത്തിന്റെ ഗുജറാത്ത് പരിവേഷം അസ്തമിക്കുന്നതും നാം കാണേണ്ടിവന്നു. രാജഗോപാൽ ഒരിക്കൽ ജയിച്ചുകയറിയതാണ് നേമത്തെ ഗുജറാത്തായി കുമ്മനം രാജശേഖരന് തോന്നിയത്. നേമത്തിന്റെ എം എൽ എ യാവാൻ മാനസികമായി തയ്യാറാറെടുപ്പുകൾ നടത്തിയ കുമ്മനം ജീ പൊറുക്കുക.

കേരളം ആരു ഭരിക്കണമെന്ന് തീരുമാനിക്കുന്നത് ബി ജെ പി യായിരിക്കുമെന്ന് പ്രഖ്യാപിച്ചതിനു ശേഷം ഹെലികോപ്റ്ററിൽ യാത്ര ചെയ്ത് സംസ്ഥാനത്ത് നടപ്പാക്കേണ്ട വികസന പദ്ധതികൾ തയ്യാറാക്കുകയായിരുന്നു കെ സുരേന്ദ്രൻ. മഞ്ചേശ്വരത്തും കോന്നിയിലും ജയിച്ചാൽ ഏത് സീറ്റ് രാജിവെക്കണമെന്ന് ഓർത്ത് വേവലാതിപ്പെടുമ്പോഴാണ് എല്ലാം തീർന്നെന്ന വാർത്ത വരുന്നത്. സ്വാമിയേ ശരണമയ്യപ്പാ…. അറിവില്ലാ പൈതങ്ങളോട് പൊറുക്കണേ….
ശോഭാ സുരേന്ദ്രൻ അവതരിത്തതിന്റെ ഉദ്ദേശം തന്നെ കെ സുരേന്ദ്രനെ രാഷ്ട്രീയമായി ഇല്ലാതാക്കുകയെന്നതാണ്. ഇതാ സംഘാംഗങ്ങളെ ഉടൻ ആ ക്രീയയിലേക്ക് കടക്കും, കാത്തിരിപ്പിൻ.

മന്ത്രിയാവാൻ തയ്പ്പിച്ച കുപ്പായങ്ങൾ വിൽപ്പനയ്ക്ക്… വമ്പിച്ച ആദായ വിൽപ്പന

കുറഞ്ഞ വിലയ്ക്ക് കുറേയധികം മന്ത്രിക്കുപ്പായങ്ങൾ റിഡക്ഷൻ വിലയ്ക്ക് വിൽപ്പനയ്ക്ക് വച്ചിരിക്കയാണ്.