എല്ലാവരെയും സ്വാഗതംചെയ്ത് ആമുഖപ്രസംഗം നടത്തിയ മാര് നിക്കോളോവോസ്, കാതോലിക്കാദിന നിധി സമാഹരണത്തില് നീതിയുക്തമായ സമീപനം എടുക്കേണ്ടതിന്റെ ആവശ്യകത സൂചിപ്പിച്ചു. അമേരിക്കയിലെ മിനിമം വേതനത്തിലധിഷ്ഠിതമായി ടാര്ജറ്റ്ക്രമീകരിക്കേണ്ട സമയം അതിക്രമിച്ചിരിക്കുകയാണ്. യാഥാര്ഥ്യമല്ലാത്ത ഉയര്ന്ന ടാര്ജറ്റ് നിജപ്പെടുത്തുന്നതുവഴി ഈ കാതോലിക്കാദിന നിധി നിര്വഹണം സാധ്യമല്ലാത്തതായി തീരുകയാണ്. 25 ഡോളറില് നിന്ന് ഒറ്റയടിക്ക് 100 ഡോളര് ആക്കിയത് താങ്ങാനായില്ല. അതുകൊണ്ട് ടാര്ജറ്റ് കുറച്ചുതരണം. വ്യത്യസ്തമായ ഒരു ബിസിനസ് പ്ലാന് കണ്ടെത്തേണ്ടിയിരിക്കുന്നു, സഭയുടെ കൂട്ടുത്തരവാദിത്വമുള്ള മൂന്ന് ട്രസ്റ്റികളും ഇരിക്കെത്തന്നെ മാര് നിക്കോളോവോസ് യുക്തിസഹജമായി പ്രതിപാദിച്ചു.
അമേരിക്കന് ഭദ്രാസനത്തില് നിരവധി വര്ഷങ്ങളുടെ പ്രവര്ത്തനപരിചയമുള്ള മാര് നിക്കോദീമോസ് (അന്ന് എം ജോണ്സണ് അച്ചന്), ചരിത്രത്തിലൂടെ ഊളിയിട്ടു. 14 വര്ഷങ്ങള്ക്കുമുമ്പ് 11 വര്ഷങ്ങള് അമേരിക്കന് ഭദ്രാസന ഓഫീസില് ആയിരുന്ന സമയത്ത് ഇതുപോലുള്ള കാര്യങ്ങള് നടന്നിരുന്നില്ല. (കാതോലിക്കാദിന നിധി ഏറ്റുവാങ്ങാന് ഡെലിഗേഷന് എത്തുന്നതിനെ പരാമര്ശിച്ച്).
മലങ്കരസഭയ്ക്ക് മൊത്തമായി അഭിമാനിക്കുവാന് ഈ പശ്ചിമനാട്ടില് 316 ഏക്കര് സ്ഥലം വാങ്ങിയെന്നത് സന്തോഷകരമാണ്. നല്ലയൊരു അടിത്തറയില് തുടങ്ങിയ ഭദ്രാസനം ഇന്ന് കൈവരിച്ചിരിക്കുന്ന നിരവധിയായ പുരോഗതികളാല് ധന്യമാണ്. ഈ വളര്ച്ച കണ്ട് സന്തോഷിക്കുന്നവരില് ഒരാളാണ് താനും, മാര് നിക്കോദീമോസ് പറഞ്ഞു.
വൈദികട്രസ്റ്റി റവ. ഡോ എം ഒ ജോണും ചരിത്രം പറഞ്ഞാണ് തുടങ്ങിയത്. 160 വര്ഷങ്ങള്ക്കുമുമ്പ് കാലംചെയ്ത പിതാക്കന്മാരുടെ ഓര്മ്മപ്പെരുന്നാള് ആയിരുന്നു കഴിഞ്ഞയാഴ്ച. കുരിശുമാലയും സ്ലീബായും പണയം വച്ചാണ് അവര് സഭയെ നയിച്ചത്. അവിടെ നിന്നാണ് 10 കോടിയുടെ ബജറ്റുമായി സഭ ഇപ്പോള് നില്ക്കുന്നത്. അമേരിക്കന് ഭദ്രാസനത്തിന്റെ വളര്ച്ചയില് ഭാവുകങ്ങള് നേര്ന്നുകൊണ്ടാണ് എം ഒ ജോണച്ചന് അവസാനിപ്പിച്ചത്. അല്മായട്രസ്റ്റി ജോര്ജ് പോളും അമേരിക്കന് ഭദ്രാസനത്തിന്റെ അഭൂതപൂര്വമായ വളര്ച്ചയില് അഭിമാനം രേഖപ്പെടുത്തി. ഭദ്രാസനത്തിന്റെ നേതൃത്വനിരയുമായി അടുത്തിടപഴകുവാന് സാധിച്ചു. സഭയ്ക്കായി ഓരോ സഭാംഗവും ചെയ്യുന്ന നിസ്വാര്ഥമായ സേവനങ്ങളെ ഉത്സാഹപൂര്വമാണ് നോക്കിക്കാണുന്നത്. ആത്മീയമായി വളര്ച്ച പ്രാപിക്കുന്നതിനനുസരിച്ച്, അതിനുള്ള പാത സുഗമമാക്കുവാനുള്ള നിങ്ങളുടെ ശ്രമങ്ങളെ ശ്ലാഘിക്കേണ്ടിയിരിക്കുന്നു. മാര് നിക്കോളോവോസ് മെത്രാപ്പൊലീത്തയുടെ നേതൃത്വപാടവത്തെ വാനോളം പുകഴ്ത്തിയാണ് ജോര്ജ് പോള് അവസാനിപ്പിച്ചത്.
ഫെയര്ലെസ്സ് ഹില്സ് സെന്റ് ജോര്ജ് ഓര്ത്തഡോക്സ് ഇടവകയ്ക്കാണ് ഒന്നാം സമ്മാനം ലഭിച്ചത്. രണ്ടാം സമ്മാനം ബോസ്റ്റണ് സെന്റ് മേരീസ് ഓര്ത്തഡോക്സ് ഇടവകയ്ക്ക് ലഭിച്ചു. ഈ രണ്ട് ഇടവകകളും ടാര്ജറ്റില് കൂടിയ തുക സമാഹരിച്ചു.
ഭദ്രാസനസെക്രട്ടറി ഫാ. സുജിത് തോമസ് കൃതജ്ഞത പ്രകാശിപ്പിച്ചു. പരി. ബാവായുടെ ശ്ലൈഹിക സന്ദര്ശനം പ്രമാണിച്ച് മിഡ്ലാന്ഡ് പാര്ക്ക് സെന്റ് സ്റ്റീഫന്സ് ഇടവക വിപുലമായ പരിപാടികളാണ് ആസൂത്രണം ചെയ്തിരുന്നത്. പള്ളിയും പരിസരവും കൊടിതോരണങ്ങളാല് അലങ്കരിച്ചിരുന്നു.
പരി.ബാവായുടെ ശ്ലൈഹികവാഴ്വോടെ പരിപാടികള് സമാപിച്ചു.