രാഹുൽ ഒരു വിനോദസഞ്ചാരിയാണ്, ശാന്തമായ കടൽ കണ്ടാൽ ടൂറിസ്റ്റുകൾ ചാടും…..ബംഗാൾ ഉൾക്കടലിലും ചാടും

അവിടെ കല്യാണം, ഇവിടെ പാലുകാച്ച് എന്നു പറഞ്ഞതുപോലെ, ബംഗാളിൽ കോൺഗ്രസും സി പി എമ്മും ഭായി ഭായിയായി നിൽക്കുമ്പോഴാണ്  രാഹുൽ ഗാന്ധിയെ ടൂറിസ്റ്റായി പിണറായി ആരോപിക്കുന്നത്.

ഇ എം സി സി ഉഡായിപ്പ് കമ്പനിയാണെന്നാണ് മേഴ്‌സിക്കുട്ടിയമ്മ പറയുന്നത്. എല്ലാം ഒരു ഉദ്യോഗസ്ഥന്റെ ചെയ്തികളാണെന്നാണ് പിണറായി വിജയനും പറയുന്നത്. ഇത്രയും വലിയൊരു കരാർ ഒരു ഐ എ എസുകാരൻ ഒറ്റയ്ക്ക് വിചാരിച്ചാൽ ഉണ്ടാക്കാൻ പറ്റുമോ എന്നാണ് ബാക്കിയാവുന്ന ചോദ്യം. പാവം കേരളത്തിന്റെ സ്വന്തം പടയാളികൾ… അവരിപ്പോൾ ആരെ വിശ്വസിക്കും. കടലിൽ ചാടിയ രാഹുലിന്റെ പാർട്ടിക്കാരെ വിശ്വസിക്കണോ, അതോ കരാർ ഉണ്ടാക്കി വിവാദത്തിൽ പെട്ടപ്പോൾ എല്ലാം റദ്ദാക്കിയ പിണറായി വിജയന്റെ പാർട്ടിയെ വിശ്വസിക്കണോ.

തിരുവമ്പാടിയിൽ സി പി ജോൺ, താമരശ്ശേരി ബിഷപ്പു ഹൗസിൽ യു ഡി എഫ് നേതാക്കൾ…

കെ വി തോമസ് തന്നെ  വർക്കിംഗ് പ്രസിഡന്റാക്കമെന്ന് ആവശ്യപ്പെട്ടത് എന്തിനാണെന്ന് ഇപ്പോഴെങ്കിലും കോൺഗ്രസ് തിരിച്ചറിയണം. താമരശ്ശേരി ബിഷപ്പിനെ കണ്ട് സഹായം അഭ്യർത്ഥിക്കാൻ തോമസ് മാഷ് പുലർച്ചെ താമരശേരിയിൽ എത്തി. ബിഷപ്പിനെ കണ്ടു, സ്ഥാനാർത്ഥി നിർണയത്തിലൊന്നും ഇടപെടില്ലെന്നും, ക്രിസ്ത്യാനിയായാൽ മുന്നണിക്ക് ഗുണമുണ്ടാവുമെന്നും ബിഷപ്പ് തോമസ് മാഷിന് മുന്നിൽ വച്ചു.  

സി എം പി നേതാവായ സി പി ജോണിന് ഇത്തവണ വിജയസാധ്യതയുള്ള സീറ്റ് നൽകാൻ യു ഡി എഫിൽ ധാരണയുണ്ടായിരുന്നു.

ദീപസ്തംഭം മഹാശ്ചര്യം, നമുക്കും കിട്ടണം ഒരു സീറ്റ്, എന്നാണ് ചെറുകക്ഷികളുടെയെല്ലാം ആഗ്രഹം. പാർട്ടി ചെറുതായിട്ടും നാല് സീറ്റിൽ മൽസരിച്ചു. ആദ്യം രണ്ട് സീറ്റ്. ഉപതെരഞ്ഞെടുപ്പിൽ ഒരു സീറ്റുകൂടി കിട്ടിയപ്പോൾ മൂന്ന് എം എൽ എമാർ. എൻ സി പി യിൽ ഒന്നിലേറെ എം എൽ എ മാരുണ്ടായാൽ വരുന്ന ബുദ്ധിമുട്ടുകൾ നന്നായി അറിയാവുന്നയാളാണ് എ കെ ശശീന്ദ്രൻ. അതിനാലാണ് മാണി സി കാപ്പനെ പാർട്ടിയിൽ നിന്നും ചാടിച്ചത്. എലത്തൂർ സീറ്റ് സുരക്ഷിതമാണല്ലോ. 

ഷിബുവിനെ ചവറയിൽ സ്ഥാനാർത്ഥിയാക്കി പ്രചാരണവും തുടങ്ങി

ചവറയിൽ തുടങ്ങി ചവറയിൽ അവസാനിക്കുന്നതാണ് ആർ എസ് പിയുടെ കേരളത്തിലെ ശക്തി. അതുകൊണ്ടുതന്നെ ചവറയിൽ ആരാണ് സ്ഥാനാർത്ഥിയെന്നൊന്നും തീരുമാനമായിട്ടില്ലെങ്കിലും

കേരളത്തിലെ വി ഐ പി മണ്ഡലമാണ് കണ്ണൂരിലെ ധർമ്മടം. മുഖ്യമന്ത്രി പിണറായി വിജയനാണ് ധർമ്മടത്തെ സ്ഥാനാർത്ഥി.  അതുകൊണ്ടുതന്നെ പിണറായിയെ നേരിടാൻ യു ഡി എഫിൽ നിന്നും ആരെത്തും എന്നാണ് സംസ്ഥാനം ഉറ്റുനോക്കുന്നത്. ആരാണ് സ്ഥാനാർത്ഥിയാവുകയെന്ന ചോദ്യത്തിന് മമ്പറം ദിവാകരൻ പറയുന്നു, ഞാനിപ്പണി നിർത്തിയെന്ന്.  

പത്ത് വർഷം മുൻപാണ് എടക്കാട് മണ്ഡലം ഇല്ലാതായി ധർമ്മടം മണ്ഡലം നിലവിൽ വന്നത്. സി പി എമ്മിലെ കെ നാരായണനാണ് ആദ്യമായി ധർമ്മടത്തു നിന്നും വിജയിച്ചത്. അന്നും മമ്പറം ദിവാകരനായിരുന്നു എതിരാളി. 2016 ൽ പിണറായി വിജയൻ മൽസരിക്കാൻ എത്തിയപ്പോഴും എതിരാളി മാറിയില്ല. എന്നാൽ തോൽക്കാനായി ജനിച്ചവനാകാൻ താനില്ല എന്നാണ് ദിവാകരന്റെ പ്രതികരണം.  മുഖ്യമന്ത്രിയാണ് എതിരാളിയെന്നതിനാൽ ഭയന്ന് പിൻമാറാൻ തയ്യാറല്ലെന്നാണ് കോൺഗ്രസിന്റെ നിലപാട്.  മത്സരിക്കുന്നതിന് അവസരം തന്നാൽ താൻ തയ്യാറാണെന്നാണ് ഡി സി സി സെക്രട്ടറിയായ രഘുനാഥ് പറയുന്നത്. എന്തായാലും മുഖ്യമന്ത്രിയോട് പോരാടാൻ അവസരം ആർക്കാണെന്ന് ഉടനറിയാം.

അച്ചുതൻ മാതൃക; ഇത് പലർക്കും തുടരാവുന്നതാണ്

തോറ്റാലും ജയിച്ചാലും തെരഞ്ഞെടുപ്പിൽ മൽസരിക്കുക, എങ്ങിനെയെങ്കിലും ഒരു സീറ്റ് ഒപ്പിച്ചെടുക്കുക, ഇതാണ് എല്ലാ നേതാക്കളുടെയും ആഗ്രഹം. എന്നാൽ പ്രായമായവർ മാറി നിൽക്കണമെന്നാണ് പാലക്കാട് ചിറ്റൂരിലെ കോൺഗ്രസ് നേതാവായ കെ അച്ചുതൻ പറയുന്നത്.

വിജയരാഘവീയം  ഏറ്റില്ലെന്ന്; ഇതിലും നല്ലത് കോടിയേരി തന്നെ...

വിജയരാഘവന് എന്തോ തെരഞ്ഞെടുപ്പ് കാലം കഷ്ടകാലമാണെന്നാണ് എല്ലാവരും പറയുന്നത്. നല്ല ലക്ഷ്യത്തിലാണ് എല്ലാ പ്രസ്താവനയും പക്ഷേ, ചക്കിന് വച്ചാൽ കൊക്കിന് കൊള്ളുന്ന അവസ്ഥയാണ് അദ്ദേഹത്തിന്. കഴിഞ്ഞ പാർലമെന്റ് കാലത്ത് തെരഞ്ഞെടുപ്പിൽ യു ഡി എഫ് സ്ഥാനാർത്ഥിയായ രമ്യാഹരിദാസിനെക്കുറിച്ച് നടത്തിയ പ്രസ്താവന വലിയ വിവാദങ്ങൾക്ക് വഴിവച്ചു. രമ്യയെ വലിയ വിജയത്തിലേക്ക് നയിച്ചതും വിജയരാഘവന്റെ വിവാദ പരാമർശമായിരുന്നല്ലോ.

ബി ജെ പി യിലെ ചില നേതാക്കൾ  ഞെട്ടലിൽ നിന്നും ഇതുവരെ മോചിതരായിട്ടില്ലപോലും. മുസ്ലിം ലീഗിനെ എൻ ഡി എ യിലേക്ക് ക്ഷണിച്ചുള്ള ശോഭാ സുരേന്ദ്രന്റെ പ്രസ്താവന സത്യമോ എന്നാണത്രെ ദേശീയ നേതാക്കളുടെ അന്വേഷണം.
ശോഭാ സുരേന്ദ്രനെ ഒതുക്കാൻ  എന്തെങ്കിലും കാരണം വീണുകിട്ടുമെന്ന് നേരത്തെതന്നെ പ്രതീക്ഷിച്ചുകഴിയുകയായിരുന്നു ഇവിടെ രണ്ടുപേർ. എന്നാൽ വഴിയൊന്നും തുറന്നു കിട്ടാത്തതിൽ കുണ്ഠിതപ്പെട്ടിരിക്കുകയായിരുന്ന നേരത്താണ് ഒരു വെളിപാടുപോലെ ശോഭാജിയുടെ പ്രസ്താവന വരുന്നത്.

പരാതികളില്ല, വിദ്വേഷമില്ല…. ഇത് കുഞ്ഞൂഞ്ഞിന്റെ പരാതിരഹിത ലോകം

ഉമ്മൻ ചാണ്ടിക്കെതിരെ കടുത്ത ഭാഷയിലാണ് പി സി ജോർജ് ആരോപണം ഉന്നയിച്ചത്. ഉമ്മൻ ചാണ്ടി രമേശ് ചെന്നിത്തലയെ മുഖ്യമന്ത്രിയാക്കാതിരിക്കാൻ ശ്രമിക്കുന്നു എന്നു തൊട്ട്, മുഖം മൂടി ധരിച്ച രാഷ്ട്രീയക്കാരനാണ് ഉമ്മൻ ചാണ്ടിയെന്നുപോലും പി സി പറഞ്ഞത് ഇക്കഴിഞ്ഞ ദിവസമാണ്. എന്നാൽ പി സിയോട് തനിക്ക് ഒരു വിരോധവുമില്ലെന്നാണ് സമാധാന പ്രീയനായ ഉമ്മൻ ചാണ്ടിയുടെ പ്രതികരണം. തന്നെ എന്തും പറയാനുള്ള അവകാശം പി സി ജോർജ്ജിനുണ്ടെന്നും ‘കുഞ്ഞൂഞ്ഞിയൻ’ സ്‌റ്റൈലിൽ പറഞ്ഞുകളഞ്ഞു.

വാൽക്കഷണം :

എന്തിനേറെ, തന്നെ കേസിൽ കുരുക്കുകയും, നാറ്റിച്ച് നാണംകെടുത്തി, മുഖ്യമന്ത്രി കസേരയിൽ നിന്നും കെട്ടുകെട്ടിച്ചതിനു പിന്നിൽ പ്രവർത്തിച്ച  സോളാർ നായികയോടും ഉമ്മൻ ചാണ്ടിക്ക് വിരോധമുണ്ടാവാൻ സാധ്യതയില്ല. സമാധാനമാണ് കുഞ്ഞൂഞ്ഞിന്റെ വഴി.  സമാധാനത്തിനുള്ള എന്തെങ്കിലും പുരസ്‌കാരം നൽകി ഉമ്മൻ ചാണ്ടിയെ ആദരിക്കേണ്ടതാണ്.