സ്റ്റാറ്റന്‍ ഐലന്റ്: സ്റ്റാറ്റന്‍ ഐലന്റിലെ വീടിനു സമീപം ശ്രീലങ്ക സ്വദേശി ഗീതാ ഹോവി (63)കുത്തേറ്റ് മരിച്ചു. സ്റ്റാറ്റന്‍ ഐലന്റിലെ ബീമെന്റ് അവന്യുവില്‍ ഇന്നലെഉച്ചയ്ക്കു ശേഷമാണ് അതിക്രൂരമായ കൊലപാതകം നടന്നത്.
ശരീരത്തില്‍ പതിനഞ്ചോളം കുത്തുകളേറ്റ ഗീതയെ റിച്ച്‌മോണ്ട് യൂണിവേഴ്‌സിറ്റി മെഡിക്കല്‍ സെന്ററില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല. ഒരു ബ്ലോക്കകലെ താമസിക്കുന്ന മാനസിക പ്രശ്‌നങ്ങളുള്ള ഡാന്റെ മൂറിനെ (27) പോലീസ് അറസ്റ്റ് ചെയ്തു.
ഗീതയെ ആഞ്ഞ് കുത്തുന്നതു കണ്ട് അയല്‍വാസിയായ 56കാരന്‍ ഓടിയെത്തി തടയാന്‍ ശ്രമിച്ചെങ്കിലും ഇദ്ദേഹത്തിനു നേരെയും അക്രമി കത്തിവീശി. ഭാഗ്യം കൊണ്ടാണ് നിസ്സാര പരിക്കുകളോടെ അയല്‍വാസി രക്ഷപ്പെട്ടത്.
കുതിച്ചെത്തിയ പൊലീസ്പ്രതിയെ അനിഷ്ഠസംഭവങ്ങള്‍ ഒന്നും ഇല്ലാതെ സംഭവ സ്ഥലത്തു നിന്നു കസ്റ്റഡിയിലെടുത്തു.
സംഭവം നടക്കുന്നതിനു മുമ്പ് ഗീത ബാങ്കില്‍ പോയിരുന്നതായി കുടുംബാംഗങ്ങള്‍ പറയുന്നു. പരാജയപ്പെട്ട കവര്‍ച്ചാശ്രമമാണ് കൊലപാതകത്തിലെത്തിയതെന്ന് കരുതപ്പെടുന്നു.
see also
