കോഴിക്കോട്: കപ്പൽ ബോട്ടിൽ ഇടിച്ച് രണ്ട് മത്സ്യത്തൊഴിലാളികൾ മരിച്ചു. 10 പേരെ കാണാതായി. രണ്ടുപേരെ രക്ഷപ്പെടുത്തി. ബേപ്പൂരിൽ നിന്ന് മത്സ്യബന്ധനത്തിന് പോയവരാണ് അപകടത്തിൽപ്പെട്ടത്. രണ്ടുപേർ മരിച്ചവിവരം മംഗളൂരു കോസ്റ്റൽപൊലീസ് സ്ഥിരീകരിച്ചിട്ടുണ്ട്. മംഗലാപുരം തീരത്തുനിന്ന് അറുപത് നോട്ടിക്കൽ മൈൽ മാറി പുറംകടലിലാണ് അപകടമുണ്ടായതെന്നാണ് ലഭിക്കുന്ന വിവരം. ബേപ്പൂർ സ്വദേശി ജാഫറിന്റെ ഉടമസ്ഥതയിലുള്ള ഐ എസ് ബി റബ്ബ എന്ന ബോട്ടാണ് അപകടത്തിൽപ്പെട്ടത്.
ഇത് പൂർണമായും തകർന്നിട്ടുണ്ട്. അപകടത്തിനിടയാക്കിയ കപ്പൽ ഇതുവരെ തിരിച്ചറിഞ്ഞിട്ടില്ല.കോസ്റ്റ് ഗാർഡിന്റെ കപ്പലായ രാജ്ദൂതും ഹെലികോപ്ടറും തിരച്ചിൽ ഊർജിതമാക്കിയിട്ടുണ്ട്. അപകടത്തിൽപെട്ട ബോട്ടിൽ 14 പേരാണ് ഉണ്ടായിരുന്നത്. ഇതിൽ ഏഴ് പേർ തമിഴ്നാട് സ്വദേശികളും ബാക്കിയുള്ളവർ ബംഗാൾ, ഒഡീഷ സ്വദേശികളുമാണ്. മലയാളികൾ ആരും ഇല്ലായിരുന്നുവെന്നാണ് അറിയുന്നത്. ഞായാറാഴ്ച രാത്രിയോടെയാണ് ബോട്ട് ബേപ്പൂരിൽ നിന്നും പോയത്. തിങ്കളാഴ്ച രാത്രിയായിരുന്നു അപകടം.
