തിരുവനന്തപുരം: സംസ്ഥാനത്ത് തെരുനായ ആക്രമണം രൂക്ഷമാകുന്നതിനിടെ തെരുവു നായ്ക്കളെ ഉപദ്രവിച്ചാൽ നിയമ നടപടി സ്വീകരിക്കുമെന്ന മുന്നറിയിപ്പുമായി മൃഗസ്‌നേഹികളുടെ സംഘടനയായ ‘പീപ്പിൾ ഫോർ ആനിമൽസ്’ (പിഎഫ്എ). തെരുവുനായ്ക്കളെ ആരെങ്കിലും ഉപദ്രവിച്ചാൽ അവരുടെ വിവരങ്ങൾ തങ്ങൾക്ക് അയച്ചു നൽകണമെന്നും അത്തരക്കാർക്കെതിരെ നിയമ നടപടി സ്വീകരിക്കുമെന്നുമാണ് പിഎഫ്എ മുന്നറിയിപ്പ് നൽകുന്നത്.
‘തെരുവു നായ്ക്കളെ ആരെങ്കിലും ഉപദ്രവിക്കുകയോ കൊല്ലുന്നതോ ശ്രദ്ധയിൽ പെട്ടാൽ ചെയ്ത വ്യക്തിയുടെ വിവരം, സ്ഥല വിവരം, ഫോട്ടോ തെളിവുണ്ടെങ്കിൽ അത്, പോലീസ് സ്റ്റേഷൻ ഏരിയ എന്നിവ pfatvm7700@gmail.com എന്ന മെയിൽ വിലാസത്തിൽ അയച്ചു നൽകണം. അയച്ചു നൽകുന്നയാളുടെ വിവരങ്ങൾ രഹസ്യമായി സൂക്ഷിക്കും.’ സംഘടന മുന്നറിയിപ്പ് നൽകുന്നു. കൂടാതെ, തെരുവു നായ്ക്കളെ ഉപദ്രവിക്കുന്നതും കൊല്ലുന്നതും തടവ് കിട്ടാവുന്ന ശിക്ഷയാണെന്നും സംഘടന ഓർമ്മിപ്പിക്കുന്നു.
തെരുവുനായ ശല്യം നിയന്ത്രണാതീതമായ സാഹചര്യത്തിൽ പൊതുജനങ്ങൾക്കിടയിൽ കനത്ത അമർഷമുണ്ട്. കൂടാതെ മൃഗസംരക്ഷണ സംഘടനയുടെ മുന്നറിയിപ്പിനെ സഹിഷ്ണുതയോടെയല്ല സോഷ്യൽ മീഡിയ കാണുന്നതും. സ്‌കൂളിൽ പോകുന്ന കുട്ടികളെ തെരുവുനായ ആക്രമിച്ചാൽ എന്തു ചെയ്യണം? നായ കടി ഏൽക്കാതിരിക്കാൻ എന്തെല്ലാം ശ്രദ്ധിക്കണം? തുടങ്ങിയ വൈകാരികമായ ചോദ്യങ്ങളാണ് നായ് പ്രമികളുടെ സംഘടനയോട് സോഷ്യൽ മീഡിയ ഉയർത്തുന്നത്.
സംസ്ഥാനത്തെ വിവിധയിടങ്ങളിൽ തെരുവു നായ്ക്കളുടെ ശല്യം മൂലം ജനങ്ങൾ പുറത്തിറങ്ങാൻ ഭയക്കുന്ന സാഹചര്യമാണ് നിലവിലുള്ളത്. കുട്ടികളെ ഒറ്റയ്ക്ക് പുറത്തയയ്ക്കാൻ മാതാപിതാക്കൾ മടിക്കുന്ന സാഹചര്യവുമുണ്ട്. തെരുവുനായ്ക്കൾക്ക് വാക്‌സിനേഷൻ നൽകിയും മാലിന്യ പ്രശ്‌നങ്ങൾ പരിഹരിച്ചും പ്രശ്‌നത്തിന് പരിഹാരം ഉണ്ടാക്കാനാണ് സർക്കാരിന്റെ ശ്രമം. പേവിഷബാധ നിയന്ത്രിക്കുന്നതിന്റെ ഭാഗമായി സെപ്റ്റംബർ 20 മുതൽ ഒരു മാസം നീളുന്ന വാക്‌സിനേഷൻ യജ്ഞം നടപ്പാക്കും. കൂടാതെ തെരുനായ്ക്കളെ പൊതു സ്ഥലത്തു നിന്നും നീക്കുന്നതിനായി ഷെൽട്ടറുകൾ തുറക്കാനും സർക്കാർ തലത്തിൽ നീക്കമുണ്ട്.
സംസ്ഥാനത്ത് ഇന്നും പരക്കെ തെരുനായ ആക്രമണം റിപ്പോർട്ട് ചെയ്തിട്ടുണ്ട്. പാലക്കാട് ജില്ലാ ആശുപത്രിയിൽ മാത്രം തെരുവു നായ്ക്കളുടെ കടിയേറ്റ് ചികിത്സ തേടിയത് 26 പേരാന്ന്. രാവിലെ ആറര മുതൽ ഉച്ചയ്ക്ക് പന്ത്രണ്ടര വരെയുള്ള കണക്കാണിത്. ഇതിൽ തെരുവുനായ ആക്രമണത്തിൽ നിന്നും കുട്ടികളെ രക്ഷിക്കാൻ പോയ ആളും ഉൾപ്പെടുന്നു. പാലക്കാടിനു സമാനമായി കൊല്ലം, കണ്ണൂർ, അടക്കമുള്ള ജില്ലകളിലും ഇന്ന് തെരുവുനായ ആക്രമണം റിപ്പോർട്ട് ചെയ്തിട്ടുണ്ട്.
