‘എന്നെ ഇവിടെ മറന്നുകളയരുത്, ദയവ് ചെയ്ത് എന്നെയും കുടുംബത്തേയും ഇവിടെ നിന്ന് രക്ഷിക്കണം. പതിമൂന്ന് വര്ഷങ്ങള്ക്ക് മുന്പ് ഒരപകടത്തില് നിന്നും ജോ ബൈഡനെ രക്ഷപ്പെടുത്തിയ അഫ്ഗാന് സ്വദേശി മുഹമ്മദ് ഇന്ന് സ്വന്തം രക്ഷയ്ക്കായി ബൈഡനോട് നടത്തിയ അഭ്യര്ത്ഥനയാണിത്. വര്ഷങ്ങള്ക്ക് മുന്പ് ബൈഡനും സംഘവും സഞ്ചരിച്ചിരുന്ന ഹെലിക്കോപ്ടര് ശക്തമായ മഞ്ഞുകാറ്റിനെ തുടര്ന്ന് അഫ്ഗാനിസ്താനിലെ ഉള്പ്രദേശത്ത് അടിയന്തരമായി നിലത്തിറക്കിയപ്പോള് രക്ഷാപ്രവര്ത്തക സംഘത്തിലുണ്ടായിരുന്ന ആളായിരുന്നു മുഹമ്മദ്.
2008-ല് അന്ന് സെനറ്ററായിരുന്ന ബൈഡനെയും മുന് സെനറ്റര്മാരായിരുന്ന ചക്ക് ഹേഗല്, ജോണ് കെറി തുടങ്ങിയവരെ രക്ഷപ്പെടുത്തിയ സംഘത്തില് ഉള്പ്പെട്ടയാളാണ് മുഹമ്മദ്. അന്ന് യു.എസ്. സൈന്യത്തിനു വേണ്ടി ദ്വിഭാഷിയായി പ്രവര്ത്തിക്കുകയായിരുന്നു മുഹമ്മദ്. അമേരിക്കന് സൈന്യം അഫ്ഗാനില്നിന്ന് പൂര്ണമായി പിന്വാങ്ങിയ പശ്ചാത്തലത്തില് അവസാന ആശ്രയം എന്ന നിലയിലാണ് മുഹമ്മദ് ബൈഡനോട് സഹായം അഭ്യര്ഥിച്ചത്.
മുഹമ്മദിന്റെ അഭ്യര്ത്ഥന ശ്രദ്ധയില്പ്പെട്ട വൈറ്റ്ഹൗസ് പ്രതികരണമറിയിച്ചിട്ടുണ്ട്. ‘മുഹമ്മദിനെയും അദ്ദേഹത്തിന്റെ കുടുംബത്തെയും അഫ്ഗാനില്നിന്ന് പുറത്തുകൊണ്ടുവരാന് തങ്ങള് പ്രതിജ്ഞാബദ്ധരാണെന്ന് വൈറ്റ് ഹൗസ് പ്രസ് സെക്രട്ടറി ജെന് സാക്കി പറഞ്ഞു. ‘ഞങ്ങള് നിങ്ങളെ അവിടെനിന്ന് കൊണ്ടുവരും. നിങ്ങളുടെ സേവനത്തെ ഞങ്ങള് ബഹുമാനിക്കുമെന്നും’ സാക്കി കൂട്ടിച്ചേര്ത്തു.