മമ്മൂട്ടി - അമൽ നീരദ് ചിത്രം എറണാകുളത്ത്
മലയാളി ഏറ്റവുമധികം കാത്തിരിക്കുന്ന ചിത്രമായ ബിലാലിന് മുൻപേ മറ്റൊരു മാസ് പ്രഖ്യാപനവുമായി മമ്മൂട്ടി - അമൽ നീരദ് ടീം. ഇവരുടെ ആദ്യ ചിത്രമായ ബിഗ്- ബിയുടെ പതിനാലാം വാർഷികത്തിൽ ഭീഷ്മപർവ്വമെന്ന ചിത്രത്തിന് വേണ്ടിയാണ് ഇരുവരും ഒന്നിക്കുന്നത്. ബിഗ് ബിയുടെ തുടർച്ചയായി ബിലാൽ എന്ന പ്രോജക്ടാണ് നേരത്തെ അനൗൺസ് ചെയ്തിരുന്നതെങ്കിലും വിദേശ രാജ്യങ്ങളിലുൾപ്പെടെ ചിത്രീകരിക്കേണ്ടതിനാലാണ് ബിലാലിന്റെ ചിത്രീകരണം നീട്ടിവച്ചത്. ബിലാലിന് മുൻപേ അമൽ നീരദ് മമ്മൂട്ടിയെ നായകനാക്കി മറ്റൊരു ചിത്രമൊരുക്കുമെന്നും ഈ വർഷം മമ്മൂട്ടി അഭിനയിക്കുന്ന ആദ്യ ചിത്രം അമൽ നീരദിന്റേതായിരിക്കുമെന്നും നേരത്തേ കേരളകൗമുദി റിപ്പോർട്ട് ചെയ്തിരുന്നു.
എറണാകുളമാണ് ഭീഷ്മപർവ്വത്തിന്റെ പ്രധാന ലൊക്കേഷൻ. ചിത്രീകരണത്തീയതി തീരുമാനിച്ചിട്ടില്ല. അമൽ നീരദ് പ്രൊഡക്ഷൻസിന്റെ ബാനറിൽ അമൽ നീരദ് തന്നെയാണ് ഭീഷ്മപർവ്വം നിർമ്മിക്കുന്നത്. താരനിർണയം പൂർത്തിയായിവരുന്നു.കഴിഞ്ഞ ദിവസമാണ് ഭീഷ്മപർവത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്.മനോജ് കെ. ജയനും യുവതാരങ്ങളായ ദുൽഖർ സൽമാനും ആസിഫ് അലിയും, ജയസൂര്യയും, കുഞ്ചാക്കോ ബോബനും ഷൈൻ ടോം ചാക്കോയും, ഉണ്ണിമുകുന്ദനും, സണ്ണിവയ്നും സൗബിൻ ഷാഹിറും സിജുവിൽസണുമുൾപ്പെടെയുള്ളവർ സമൂഹ മാദ്ധ്യമങ്ങളിൽ പങ്കുവച്ച ഭീഷ്മപർവ്വത്തിന്റെ ഫസ്റ്റ് ലുക്ക് പോസ്റ്റർ സമൂഹമാദ്ധ്യമങ്ങളിൽ തരംഗമായിക്കഴിഞ്ഞു.