ന്യൂഡല്ഹി: രാജ്യ തലസ്ഥാനത്തെ ഞെട്ടിച്ച് വീണ്ടും കൂട്ട ബലാത്സംഗം. 21വയസുകാരിയെ തൊഴിലുടമ അടക്കം മൂന്നു പേര് ക്രൂരമായി ബലാത്സംഗം ചെയ്തുവെന്നാണ് റിപ്പോര്ട്ട്. ഡല്ഹിക്ക് വെളിയിലുള്ള ജിമ്മില് ജോലിചെയ്തിരുന്ന 21കാരിയാണ് പീഡിപ്പിക്കപ്പെട്ടത്. വ്യാഴാഴ്ച രാവിലെ ബുധ്വിഹാറിലാണ് സംഭവം ഉണ്ടായത്.
39കാരനായ ജിം ഉടമ, 35 വയസുള്ള ഫാക്ടറി ഉടമ എന്നിവര് പീഡിപ്പിച്ചവരാണെന്ന് പെണ്കുട്ടി തിരിച്ചറിഞ്ഞിട്ടുണ്ട്. കൂട്ട ബലാത്സംഗത്തിനും ലൈംഗിക പീഡനത്തിനും അനധികൃതമായ തടഞ്ഞുവെയ്ക്കല് അടക്കമുള്ള കുറ്റങ്ങളാണ് പ്രതികള്ക്കെതിരെ ചുമത്തിയിട്ടുണ്ട്. വിഷയം പൊലീസില് അറിയിച്ചതിന് പിന്നാലെ കൊലപാതക ഭീഷണി നേരിടുന്നതായും പെണ്കുട്ടി പൊലീസിനോട് പറഞ്ഞു.
ജിമ്മിലെ ജോലി പൂര്ത്തിയാക്കി മടങ്ങാന് ഒരുങ്ങവെ പെണ്കുട്ടിയെ തൊഴിലുടമ സുഹൃത്തിന്റെ ജിമ്മില് ചില ജോലികള് ഉണ്ടെന്ന് പറഞ്ഞ് വിളിച്ചു വരുത്തുകയായിരുന്നു. തുടര്ന്ന് ഇവിടെ വെച്ചാണ് പെണ്കുട്ടി പീഡനത്തിനിരയായത്. പെണ്കുട്ടി സ്ഥാപനത്തിലേക്ക് കയറിയതോടെ ഇവര് ജിം അകത്തുനിന്ന് പൂട്ടിയിടുകയായിരുന്നു. പെണ്കുട്ടി രക്ഷപ്പെടാന് ശ്രമിച്ചിട്ടും ഇവര് പീഡനം തുടരുകയായിരുന്നുവെന്നാണ് പരാതി വിശദമാക്കുന്നത്.