പി പി ചെറിയാന്‍
ന്യൂയോര്‍ക്ക്: ലോകത്തിലാദ്യമായി ബോസ്റ്റണിലെ ഡോക്ടര്‍മാര്‍ 62 വയസ്സുള്ള രോഗിക്ക് പന്നിയുടെ വൃക്ക മാറ്റിവച്ചു. ജനിതകമാറ്റം വരുത്തിയ പന്നിയുടെ വൃക്ക ജീവിച്ചിരിക്കുന്ന ഒരാളിലേക്ക് വിജയകരമായി മാറ്റിവെക്കുന്നത് ഇതാദ്യമാണെന്ന് വ്യാഴാഴ്ച മസാച്യുസെറ്റ്സ് ജനറല്‍ ആശുപത്രിയിലെ ശസ്ത്രക്രിയാ സംഘം വ്യാഴാഴ്ച അറിയിച്ചു.
ഈ മാസമാദ്യം നാലു മണിക്കൂര്‍ നീണ്ട ശസ്ത്രക്രിയയ്ക്കിടെ, മസാച്യുസെറ്റ്സ് ജനറല്‍ ഹോസ്പിറ്റലിലെ സര്‍ജന്മാര്‍ പന്നിയുടെ വൃക്കയുടെ രക്തക്കുഴലുകളും മൂത്രനാളിയും വൃക്കയില്‍ നിന്ന് മൂത്രാശയത്തിലേക്ക് മൂത്രം കൊണ്ടുപോകുന്ന നാളവും അവസാനഘട്ട വൃക്കരോഗവുമായി ജീവിക്കുന്ന 62 കാരനായ റിച്ചാര്‍ഡ് സ്ലേമാനിലേക്ക് മാറ്റി വെച്ചു. അദ്ദേഹം സുഖം പ്രാപിച്ചു വരുന്നതായി ആശുപത്രി അധികൃതര്‍ അറിയിച്ചു.
മുമ്പ്, മസ്തിഷ്‌ക മരണം സംഭവിച്ച ദാതാക്കളിലേക്ക് പന്നിയുടെ വൃക്കകള്‍ താല്‍ക്കാലികമായി മാറ്റിവച്ചിരുന്നു. കൂടാതെ, രണ്ട് പേര്‍ക്ക് പന്നികളില്‍ നിന്ന് ഹൃദയം മാറ്റിവയ്ക്കലും നടത്തി. എന്നിരുന്നാലും ഇരുവരും മാസങ്ങള്‍ക്കുള്ളില്‍ മരിച്ചു. മസാച്യുസെറ്റ്സിലെ വെയ്മൗത്തിലെ റിച്ചാര്‍ഡ് ‘റിക്ക്’ സ്ലേമാന്‍ എന്ന രോഗി കഴിഞ്ഞ ശനിയാഴ്ച ശസ്ത്രക്രിയയില്‍ നിന്ന് സുഖം പ്രാപിച്ചു വരികയാണെന്നും ഉടന്‍ ഡിസ്ചാര്‍ജ് ചെയ്യപ്പെടുമെന്നും ഡോക്ടര്‍മാര്‍ അറിയിച്ചു.
പന്നിയുടെ വൃക്ക കുറഞ്ഞത് രണ്ട് വര്‍ഷമെങ്കിലും പ്രവര്‍ത്തിക്കുമെന്ന് സംഘം വിശ്വസിക്കുന്നതായി ട്രാന്‍സ്പ്ലാന്റ് സര്‍ജന്‍ ഡോ. ടാറ്റ്‌സുവോ കവായ് പറഞ്ഞു. പരാജയപ്പെട്ടാല്‍, സ്ലേമാന്‍ വീണ്ടും ഡയാലിസിസിന് വിധേയനാകുമെന്ന് വൃക്കരോഗ വിദഗ്ധന്‍ ഡോ. വിന്‍ഫ്രെഡ് വില്യംസ് പറഞ്ഞു. വളരെ അസുഖമുള്ള പന്നി ഹൃദയ സ്വീകര്‍ത്താക്കളില്‍ നിന്ന് വ്യത്യസ്തമായി, സ്ലേമാന്‍ ‘യഥാര്‍ത്ഥത്തില്‍ വളരെ ശക്തനാണ്’ എന്ന് അദ്ദേഹം അഭിപ്രായപ്പെട്ടു.
‘പതിറ്റാണ്ടുകളായി ആയിരക്കണക്കിന് ശാസ്ത്രജ്ഞരും ഫിസിഷ്യന്‍മാരും നടത്തിയ പരിശ്രമത്തിന്റെ പരിസമാപ്തിയാണ് ഈ ട്രാന്‍സ്പ്ലാന്റിന്റെ വിജയം,’ ശസ്ത്രക്രിയാ സംഘത്തിലെ അംഗമായ ഡോ.തത്സുവോ കവായ് പറഞ്ഞു. ‘ഈ നാഴികക്കല്ലില്‍ നിര്‍ണായക പങ്ക് വഹിച്ചതില്‍ ഞങ്ങള്‍ക്ക് അഭിമാനമുണ്ട്. ലോകമെമ്പാടുമുള്ള വൃക്ക തകരാറിലായ ദശലക്ഷക്കണക്കിന് രോഗികള്‍ക്ക് ഈ ട്രാന്‍സ്പ്ലാന്റ് സമീപനം ഒരു ജീവനാഡി വാഗ്ദാനം ചെയ്യുമെന്നാണ് ഞങ്ങളുടെ പ്രതീക്ഷ.’ഡോക്ടര്‍ കൂട്ടിച്ചേര്‍ത്തു.
