തിരുവനന്തപുരം: ഇന്റര്‍നാഷണല്‍ വിമന്‍സ്‌ഡേ ആഘോഷങ്ങളോടനുബന്ധിച്ച് മലയാളത്തിലെ എഴുത്തുകാരികളുടെ വിവരങ്ങള്‍ ഉള്‍ക്കൊള്ളിച്ചുകൊണ്ടുള്ള പുതിയ വെബ്‌സൈറ്റ് കേരളാ ഗവര്‍ണര്‍ പി. സദാശിവം രാജ്ഭവനില്‍ ഉദ്ഘാടനം ചെയ്തു.
മലയാളസാഹിത്യത്തിലെ സ്ത്രീരചനകള്‍ കനപ്പെട്ടതാണെന്ന് പരക്കെ അംഗീകരിക്കുമ്പോഴും, ആ എഴുത്തുകാരികളെക്കുറിച്ച് വേണ്ടത്ര അറിവ് മലയാളക്കരയ്ക്ക് ഇല്ല. ആദ്യകാല എഴുത്തുകാരില്‍ പലരും ഒരു പേരോ, ഒരു കൃതിയോ ആയി മറവിയിലാണ്ടുപോകുകയും ചെയ്തിരിക്കുന്നു. ഈ തിരിച്ചറിവില്‍ നിന്നാണ് ആദ്യകാല എഴുത്തുകാരികളെക്കുറിച്ചുള്ള വിവരങ്ങള്‍വരെ ഉള്‍ക്കൊള്ളിച്ചുകൊണ്ടുള്ള ഒരു വെബ്‌സൈറ്റ് എന്ന ആശയം ഉരുത്തിരിഞ്ഞത്. മലയാളത്തിലെ എഴുത്തുകാരികളെ അറിയാനും അംഗീകരിക്കാനും വേദിയൊരുക്കുകയാണ് ഈ വെബ്‌സൈറ്റ്. മലയാളത്തിന്റെ സ്ത്രീ രചനയുടെ പൂര്‍ണ്ണമായ രേഖപ്പെടുത്തലാണ് ഇതിന്റെ ലക്ഷ്യം.
www.womenwritersofkerala.com എന്ന സൈറ്റ് ഭാഷാകുതുകികള്‍ക്കും സാഹിത്യവിദ്യാര്‍ത്ഥികള്‍ക്കും ഒരുപോലെ പ്രയോജനപ്പെടുന്നതാണ്. ഡോ. ശ്രീദേവി കെ. നായര്‍ (അസോ. പ്രൊഫസര് & ഹെഡ്, വിമന്‍സ് കോളജ്, നിറമണ്‍കര) എഡിറ്ററും, ഡോ. ജി.എസ് ജയശ്രീ (പ്രൊഫ. & ഹെഡ് ഇന്‍സ്റ്റിറ്റിയൂട്ട് ഓഫ് ഇംഗ്ലീഷ്, തിരുവനന്തപുരം) കണ്‍സള്‍ട്ടന്റ് എഡിറ്ററും ആയി പ്രൊജക്ട് നയിക്കുന്നു. ഡോ. മേരി നിര്‍മ്മല, ആയിഷ ശശിധരന്‍, ലൈല അലക്‌സ് എന്നിവര്‍ വിവര്‍ത്തകരായും പ്രവര്‍ത്തിക്കുന്നു.
