പ്രശസ്ത കവിയും തിരക്കഥാകൃത്തും നോവലിസ്റ്റുമായ ടി.പി. രാജീവന് അന്തരിച്ചു. 63 വയസായിരുന്നു. കോഴിക്കോട്ടെ സ്വകാര്യ ആശുപത്രിയില് ആയിരുന്നു അന്ത്യം. വൃക്ക, കരള് രോഗങ്ങള്ക്ക് ചികിത്സയിലായിരുന്നു. കേരള സാഹിത്യ അക്കാദമി പുരസ്കാരം അടക്കമുള്ള നിരവധി പുരസ്കാരങ്ങള്ക്ക് അര്ഹനായിട്ടുണ്ട്. കോഴിക്കോട് പാലേരി സ്വദേശിയാണ്. ഭാര്യ: പി.ആര്.സാധന. മക്കള്: ശ്രീദേവി, പാര്വ്വതി.
പാലേരി മാണിക്യം ഒരു പാതിരാ കൊലപാതകത്തിന്റെ കഥ, കെ.ടി.എന്. കോട്ടൂര് എഴുത്തും ജീവിതവും, ക്രിയാശേഷം, കുഞ്ഞാലി മരക്കാര് എന്നിവയാണ് പ്രധാനപ്പെട്ട നോവലുകള്. ഇതില് പാലേരി മാണിക്യം ഒരു പാതിരാ കൊലപാതകത്തിന്റെ കഥയും കെ.ടി.എന്. കോട്ടൂര് എഴുത്തും ജീവിതവും ചലചിത്രമായി ചിത്രീകരിച്ചിട്ടുണ്ട്.
കാലിക്കറ്റ് സര്വ്വകലാശാല പിആര്ഒ ആയിരുന്നു. കവിതകള്, യാത്രാ വിവരണങ്ങള്, ലേഖന സമാഹാരം, നോവല് എന്നിങ്ങനെ സാഹിത്യ മേഖലയില് നിരവധി സംഭാവനകള് ചെയ്തിട്ടുള്ള വ്യക്തിയാണ് ടി പി രാജീവന്. കെ.ടി.എന് കോട്ടൂര് എഴുത്തും ജീവിതവും എന്ന കൃതിക്ക് 2014ല് കേരള സാഹിത്യ അക്കാദമി പുരസ്കാരം നേടിയിരുന്നു. ഇംഗ്ലീഷ് കവി എന്ന നിലയില് വിദേശത്തടക്കം ഏറെ ശ്രദ്ധ നേടിയിരുന്നു. തച്ചംപൊയില് രാജീവന് എന്ന പേരിലായിരുന്നു ഇംഗ്ലീഷിലുള്ള രചനകള്.