തിരുവനന്തപുരം: കെഎസ്ആർടിസിയിൽ നിർബന്ധിതമായി വിആർഎസ് നടപ്പാക്കില്ലെന്ന് കെഎസ്ആർടിസി. നിർബന്ധിത വിആർഎസിനായി 7200 ഓളം പേരുടെ പട്ടിക തയാറാക്കിയെന്നുമുള്ള വാർത്തയ്ക്ക് അടിസ്ഥാനമില്ലെന്നും കെഎസ്ആർടിസി മാനേജ്മെന്‍റ് വ്യക്തമാക്കി.
കെഎസ്ആർടിസിയിൽ നിർബന്ധിത വിആർഎസ് നടപ്പിലാക്കുന്നുവെന്ന തരത്തിൽ മുൻപും വാർത്തകൾ മാധ്യമങ്ങളിൽ വന്നിരുന്നതാണ്. നിർബന്ധിത വിആർഎസ് എന്ന് പറയുന്നത് തന്നെ തെറ്റായ പ്രയോഗമാണ്. വിആർഎസ് എന്നാൽ വോളണ്ടറി റിട്ടേഡ്മെന്‍റ് സ്കീമാണ്. അത് പ്രകാരം താൽപര്യമുള്ളവർക്ക് സ്വയം വിരമിക്കാമെന്നാണ്. അല്ലാതെ നിർബന്ധിത വിആർഎസ് എന്നൊരു പ്രയോഗമേ ഇല്ല.
എന്നാൽ 1243 ഓളം ജീവനക്കാർ നിലവിൽ തന്നെ ജോലിക്ക് വരാത്തവരായി ഉണ്ട്. ഏതാണ്ട് 600 ഓളം ജീവനക്കാർക്ക് പലമാസങ്ങളിലും 16 ഡ്യൂട്ടി എന്ന നിബന്ധന ചെയ്യുന്നതുമില്ല. ഈ സാഹചര്യത്തിലാണ് രണ്ട് വർഷം മുൻപ് അങ്ങനെ വരാത്തവർക്ക് വേണ്ടി വിആർഎസ് സ്കീം നടപ്പാക്കാൻ സർക്കാരിനോട് 200 കോടി രൂപയുടെ ഒരു നിർദ്ദേശം സമർപ്പിച്ചതായും കെഎസ്ആർടിസി മാനേജ്മെന്‍റ് അറിയിച്ചു.
