മുസ്ലീംലീഗിന്റെ വേദിയിൽ ഹമാസ് തീവ്രവാദ സംഘടനയാണെന്ന പരാമർശത്തില് വിശദീകരണവുമായി ശശി തരൂർ എംപി. തന്റെ പ്രസംഗം ഇസ്രായേലിന് അനുകൂലമാക്കി ആരും വ്യാഖ്യാനിക്കേണ്ടെന്നും താൻ എന്നും പലസ്തീൻ ജനതയ്ക്ക് ഒപ്പമാണെന്നും ശശി തരൂർ പറഞ്ഞു. പ്രസംഗത്തിലെ ഒരു വാചകം മാത്രം അടർത്തിയെടുത്ത് നടത്തുന്ന പ്രചാരണങ്ങളോട് യോജിപ്പില്ലെന്നും ശശി തരൂർ കൂട്ടിച്ചേർത്തു.
ശശി തരൂരിന്റെ പരാമർശം ആയുധമാക്കുകയാണ് സിപിഎമ്മും സുന്നി അനുകൂലികളും. മുസ്ലീംലീഗിന്റെ നേതൃത്വത്തില് നടന്നത് ഇസ്രയേല് അനുകൂല സമ്മേളനമാണെന്ന് കെടി ജലീൽ പറഞ്ഞു. കോഴിക്കോട് കടപ്പുറത്ത് മുസ്ലിം ലീഗിന്റെ ചെലവിൽ ഡോ. ശശി തരൂർ ഇസ്രായേൽ ഐക്യദാർഢ്യ സമ്മേളനം നടത്തിയെന്നാണ് സ്വരാജ് ആരോപിച്ചത്. ഇസ്രയേല് ലക്ഷണമൊത്ത ഭീകര രാഷ്ട്രമാണെന്ന് പറയാന് കോണ്ഗ്രസ് നേതാവിന് ഇപ്പോഴും കഴിയുന്നില്ലെന്ന് സ്വരാജ് കുറ്റപ്പെടുത്തി. സമസ്ത പോഷക സംഘടനാ ഭാരവാഹികളും വിമർശനവുമായി രംഗത്തുവന്നു.