ന്യൂഡൽഹി: ബോളിവുഡ് നടൻ സോനു സൂദിന്റെ ഉടമസ്ഥതയിലുള്ള ആറ് സ്ഥലങ്ങളിൽ ആദായ നികുതി റെയ്ഡ്. എൻ.ഡി.ടി.വിയാണ് വാർത്ത റിപ്പോർട്ട് ചെയ്തത്. ഡൽഹി സർക്കാറിന്റെ സ്കൂൾ വിദ്യാർഥികൾക്കായുള്ള പരിപാടിയിൽ സോനു സൂദ് ബ്രാൻഡ് അംബാസിഡറായതിന് പിന്നാലെയാണ് ആദായ നികുതി വകുപ്പിന്റെ നടപടി.
എന്നാൽ, റെയ്ഡ് സംബന്ധിച്ച് കൂടുതൽ വിവരങ്ങൾ പുറത്ത് വന്നിട്ടില്ല. സോനു സൂദ് ഡൽഹി സർക്കാറിന്റെ ബ്രാൻഡ് അംബാസിഡറായതിന് പിന്നാലെ ആം ആദ്മി പാർട്ടിയിൽ ചേരുമെന്ന റിപ്പോർട്ടുകളും പുറത്ത് വന്നിരുന്നു. എന്നാൽ, ഇക്കാര്യത്തിൽ പ്രതികരണം നടത്താൻ ഇതുവരെ അദ്ദേഹം തയാറായിട്ടില്ല.
കോവിഡിനിടെ സോനു സൂദ് നടത്തിയ പ്രവർത്തനങ്ങൾ വലിയ രീതിയിൽ ജനശ്രദ്ധ പിടിച്ചു പറ്റിയിരുന്നു. ലോക്ഡൗണിൽ വിവിധ സ്ഥലങ്ങളിൽ കുടുങ്ങിയ അന്തർ സംസ്ഥാന തൊഴിലാളികൾക്ക് നാട്ടിലെത്താൻ അദ്ദേഹം സ്വന്തം ചെലവിൽ വിമാനം ഏർപ്പാടാക്കി നൽകിയിരുന്നു.