ന്യൂജേഴ്‌സി: ഫൈന്‍ ആര്‍ട്‌സ് മലയാളം കടല്‍ കടന്ന് മലേഷ്യയിലേക്കും സിംഗപ്പൂരിലേക്കും. പത്മഭൂഷന്‍ ഡോ. കെ.ജെ. യേശുദാസ് ഭദ്രദീപം കൊളുത്തി അമേരിക്കന്‍ മലയാളികള്‍ക്കിടയില്‍ പുതിയൊരു സാംസ്കാരിക അധ്യായത്തിന് തുടക്കമിട്ട ഫൈന്‍ ആര്‍ട്‌സിന്റെ വളര്‍ച്ചയിലെ മറ്റൊരു നാഴികകല്ലാവുകയാണ് മലേഷ്യയിലും സിംഗപ്പൂരിലും അരങ്ങേറുന്ന നാടകങ്ങള്‍.
ഏപ്രില്‍ 9 ശനിയാഴ്ച ക്വാലാലമ്പൂരിലും 10 ഞായറാഴ്ച സിംഗപ്പൂരിലും നടക്കുന്ന നാടകങ്ങളില്‍ പങ്കെടുക്കുന്ന 15 അംഗ ഫൈന്‍ ആര്‍ട്‌സ് ടീം ഏപ്രില്‍ 5ന് ന്യുയോര്‍ക്കില്‍ നിന്ന് യാത്ര തിരിക്കും. ക്വാലാലമ്പൂരില്‍ കൈരളി ആര്‍ട്‌സ് ക്ലബ്, സിംഗപ്പൂരില്‍ പ്രവാസി എക്‌സ്പ്രസ് പത്രം എന്നിവരുടെ സംയുക്താഭിമുഖ്യത്തിലാണ് നാടകം സംഘടിപ്പിക്കുന്നത്.
64 വര്‍ഷക്കാലം പ്രവാസി ആയി ജീവിക്കുകയും അതില്‍ 61 വര്‍ഷങ്ങള്‍ മലേഷ്യയില്‍ ചിലവിടുകയും ചെയ്ത രക്ഷാധികാരി കൂടിയായ പി.ടി. ചാക്കോ(മലേഷ്യ)യുടെ ദീര്‍ഘകാലസ്വപ്‌നം പൂവണിയുന്ന സംരംഭവുമാണിത്.
ആദ്യകാല പ്രതിസന്ധികളെല്ലാം അതിജീവിച്ച് അമേരിക്കയിലെ കലാരംഗത്ത് നിറസാന്നിദ്ധ്യമായി മാറി, മലയാളി മനസുകള്‍ കീഴടക്കി ഒന്നര ദശാബ്ദംകൊണ്ട് നോര്‍ത്ത് അമേരിക്ക ഒട്ടാകെ കലാരൂപങ്ങള്‍ അവതരിപ്പിച്ച ഫൈന്‍ ആര്‍ട്‌സ് അമേരിക്കന്‍ മലയാളികള്‍ക്കിടയിലെ ചരിത്രഗാഥ ആകുകയാണ്.
നിവിന്‍പോളി ചിത്രത്തില്‍ കേരളത്തില്‍ അഭിനയിച്ചുകൊണ്ടിരിക്കുന്ന ലീഡ് കഥാപാത്രവും ഫൈന്‍ ആര്‍ട്‌സ് പ്രസിഡന്റുമായ സജിനി സഖറിയ കേരളത്തില്‍ നിന്ന് മലേഷ്യയിലെത്തി നാടകട്രൂപ്പിനൊപ്പം ജോയിന്‍ ചെയ്യും. പ്രമുഖനടന്‍ ജോസ് കാഞ്ഞിരപ്പള്ളിയും കേരളത്തില്‍ നിന്നെത്തും. യാത്രയ്ക്കും നാടകാവതരണത്തിനുമായ ക്രമീകരണങ്ങള്‍ പൂര്‍ത്തിയായി വരുന്നുവെന്ന് സെക്രട്ടറി ഷിബു ഫിലിപ്പ് അറിയിച്ചു. ട്രഷറര്‍ എഡിസണ്‍ ഏബ്രഹാമിനൊപ്പം കമ്മിറ്റി അംഗങ്ങളായ സാമുവല്‍ പി ഏബ്രഹാം, ജിജി ഏബ്രഹാം, സണ്ണി റാന്നി, ജോര്‍ജ് തുമ്പയില്‍, റോയി മാത്യും എന്നിവര്‍ വ്യത്യസ്തങ്ങളായ ക്രമീകരണങ്ങള്‍ക്ക് നേതൃത്വം നല്കുന്നു.
അമേരിക്കന്‍ മലയാളികള്‍ നെഞ്ചിലേറ്റിയ “മഴവില്ല് പൂക്കുന്ന ആകാശമാണ്” വിദേശമണ്ണില്‍ ആദ്യമായി അവതരിപ്പിക്കുന്നത്. ആസുരമായ കാലത്ത് കൈമോശം വരുന്ന നന്മകള്‍ ജീവിത രീതി തന്നെയായി കലാരൂപങ്ങളില്‍ അവതരിപ്പിക്കപ്പെടുന്ന ഇക്കാലത്ത് മൂല്യങ്ങളുടെയും സ്‌നേഹത്തിന്റെയും ഇത്തിരി പ്രകാശം പരത്തുന്ന നാടകമാണ് “മഴവില്ല് പൂക്കുന്ന ആകാശം”. ആകാശവും മഴവില്ലും ഒരിക്കലും ഇല്ലാതാകില്ലെന്ന ഓര്‍മ്മപ്പെടുത്തലുകൂടി പ്രശസ്ത നാടകകൃത്ത് ഫ്രാന്‍സിസ് ടി. മാവേലിക്കര നാടകത്തിലൂടെ നല്കുന്നുണ്ട്.
ജോസ് കാഞ്ഞിരപ്പള്ളി, സജിനി സഖറിയ, സണ്ണി റാന്നി, റോയി മാത്യു, ജോര്‍ജ് തുമ്പയില്‍, മോളി ജേക്കബ്, ടീനോ തോമസ്, അഞ്ജലി ഫ്രാന്‍സിസ്, ഷൈനി ഏബ്രഹാം എന്നിവരാണ് കഥാപാത്രങ്ങള്‍ക്ക് ജീവന്‍ നല്കുന്നത്. നിര്‍മ്മാണ നിര്‍വ്വഹണം സണ്ണി റാന്നി, ലോജിസ്റ്റിക്‌സ് – ഷിബു ഫിലിപ്പ്, ലൈറ്റിംഗ്- ജിജി ഏബ്രഹാം, സംഗീത നിര്‍വ്വഹണം- എഡിസണ്‍ ഏബ്രഹാം, സ്റ്റേജ് മാനേജ്‌മെന്റ് – ഇന്ദിരാ തുമ്പയില്‍, സുമന്‍ തോമസ്, സംവിധാനം- റെഞ്ചി കൊച്ചുമ്മന്‍, ജോസ് കാഞ്ഞിരപ്പള്ളി.
അവതരണം -ഫൈന്‍ ആര്‍ട്‌സ് മലയാളത്തിന് വേണ്ടി പി.ടി. ചാക്കോ (മലേഷ്യ) ഏപ്രില്‍ 9ന് ബ്രിക്‌സ് ഫീല്‍ഡ്‌സിലുള്ള ടെംബിള്‍ ഓഫ് ഫൈന്‍ ആര്‍ട്‌സിന്റെ ശാന്താനന്ദ് ഓഡിറ്റോറിയത്തില്‍ നടക്കുന്ന നാടകാവതരണത്തിന്റെ വിവരങ്ങള്‍ക്ക് (മലേഷ്യയില്‍) ഡോ. സോമന്‍ 013-3904676, ശശികുമാര്‍ പൊതുവാള്‍ 012-2118020 (അമരിക്കയില്‍) പി.ടി. ചാക്കോ (201) 483-7151
