പി പി ചെറിയാൻ
ഹ്യൂസ്റ്റൺ(ടെക്സസ്): ഹൂസ്റ്റണിന്റെ 63-ാമത് മേയറായി ജോൺ വിറ്റ്മയർ ഔദ്യോഗികമായി സത്യപ്രതിജ്ഞ ചെയ്തു. പൊതു സുരക്ഷയിലും അടിസ്ഥാന സൗകര്യങ്ങളിലുമാണ് താൻ ശ്രദ്ധ കേന്ദ്രീകരിക്കുന്നതെന്ന് അദ്ദേഹം പറഞ്ഞു. തിങ്കളാഴ്ച പുലർച്ചെ 12:01നു ബൈബിളിൽ കൈവെച്ചായിരുന്നു ജോൺ വിറ്റ്മയറുടെ സത്യപ്രതിജ്ഞ.
“ഇത് എന്റെ പൊതുസേവനത്തിന്റെ തുടർച്ചയായും ഒരു വിളിയായും ഞാൻ കാണുന്നു,” സത്യപ്രതിജ്ഞ ചെയ്തതിന് ശേഷം വിറ്റ്മയർ പറഞ്ഞു.74 കാരനായ അദ്ദേഹം കുടുംബാംഗങ്ങൾക്കും സുഹൃത്തുക്കൾക്കുമൊപ്പം സ്വകാര്യ ചടങ്ങ് നടത്തി.
1983-ൽ സംസ്ഥാന നിയമസഭയിലേക്ക് ആദ്യമായി തിരഞ്ഞെടുക്കപ്പെട്ട വിറ്റ്മയർ, ഇപ്പോൾ രാജ്യത്തെ നാലാമത്തെ വലിയ നഗരത്തിന്റെ നേതാവായി ഒരു പുതിയ ഉത്തരവാദിത്തത്തിലേക്ക് പ്രവേശിക്കുന്നു. കുറ്റകൃത്യങ്ങളുടെ കാര്യത്തിൽ കടുപ്പമേറിയതും മികച്ചതുമായ ഭരണം നടത്തുമെന്നും മറ്റ് പോലീസ് ഡിപ്പാർട്ട്മെന്റുകളുമായി മികച്ച രീതിയിൽ സഹകരിക്കുമെന്നും അദ്ദേഹം പറഞ്ഞു.
അക്രമാസക്തരായ കുറ്റവാളികൾക്കെതിരെ ആവശ്യമാണെങ്കിൽ പുതിയ നിയമങ്ങൾക്കായി മുന്നോട്ട് പോകുമെന്ന് അദ്ദേഹം പറഞ്ഞു. മറ്റ് മുനിസിപ്പാലിറ്റികളുമായി നന്നായി സഹകരിക്കുന്നതിന് കൂടുതൽ പോലീസിനെ വിന്യസിപ്പിക്കുമെന്നും വിറ്റ്മയർ കൂട്ടിച്ചേർത്തു.