ക്രിസ്മസ് ദിനത്തിൽ ക്രൈസ്തവ മതമേലധ്യക്ഷന്മാരുമായി പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തിയ സംഭവത്തെ പ്രതിരോധിച്ച് കോണ്ഗ്രസ്. മാര്പാപ്പയെ ഇന്ത്യയിലെത്തിക്കുമെന്ന മോദിയുടെ പ്രഖ്യാപനം തെരഞ്ഞെടുപ്പ് തന്ത്രം മാത്രമാണെന്നും മണിപ്പൂര് ചര്ച്ചയാകാത്തത് വലിയ പരാജയമാണെന്നും കോണ്ഗ്രസ് പറയുന്നു. അതേസമയം കേരളത്തിലെത്തി ക്രൈസ്തവ സഭ അധ്യക്ഷന്മാരെ വീണ്ടും കാണാനുള്ള നീക്കത്തിലാണ് പ്രധാനമന്ത്രി നരേന്ദ്രമോദി.
പ്രധാനമന്ത്രി ന്യൂനപക്ഷങ്ങളെ വേര്തിരിച്ച് ചര്ച്ച നടത്തിയത് വിഭജനത്തിനുള്ള ശ്രമമാണെന്ന് തുറന്ന് കാട്ടാനാണ് കോണ്ഗ്രസ് അടക്കം പാര്ട്ടികളുടെ ശ്രമം. ക്രൈസ്തവര്ക്ക് തുല്യം മുസ്ലീം സമുദായവും വെല്ലുവിളികള് നേരിടുന്നുണ്ട്. ഏകപക്ഷീയമായി ചര്ച്ച നടത്തിയത് ശരിയായില്ലെന്നും കോൺഗ്രസ് പറയുന്നു. മാര്പാപ്പയെ ഇന്ത്യയിലെത്തിക്കുമെന്ന ‘ഓഫര്’ മുന്പോട്ട് വയ്ക്കുന്നതും ആദ്യമായല്ല. ഗോവ തെരഞ്ഞെടുപ്പ് വേളയില് ഈ വാഗ്ദാനം നല്കി വോട്ട് നേടിയെങ്കിലും മാര്പാപ്പ ഇന്ത്യയിലെത്തിയില്ല. സംഘര്ഷം തുടരുന്ന മണിപ്പൂരിലേക്ക് ചര്ച്ചകള് കൊണ്ടുപോകാനും പ്രധാനമന്ത്രി തയ്യാറായില്ല. അതേ സമയം, കേരളമടക്കം സംസ്ഥാനങ്ങളില് ക്രൈസ്തവരെ ആകര്ഷിക്കാനുള്ള കൂടുതല് പദ്ധതികള് ബിജെപിയുടെ അണിയറയില് തയ്യാറാകുകയുമാണ്.