വണ്ടിപ്പെരിയാറില് ആറു വയസുകാരിയെ പീഡിപ്പിച്ച് കെട്ടിത്തൂക്കി കൊലപ്പെടുത്തിയ കേസിന്റെ കോടതി വിധിയിൽ പ്രതികരണവുമായി മുഖ്യമന്ത്രി പിണറായി വിജയൻ. വിധി പരിശോധിച്ച് തുടർനടപടി സ്വീകരിക്കുമെന്നും അപ്പീൽ നൽകാൻ തീരുമാനമെടുത്തെന്നും മുഖ്യമന്ത്രി അറിയിച്ചു. വിഷയം ഗൗരവമായി പരിശോധിക്കുമെന്നും സംസ്ഥാനത്തിന് അഭിമാനകരമായ കാര്യമല്ല സംഭവിച്ചതെന്നും മുഖ്യമന്ത്രി പറഞ്ഞു.
അതേ സമയം, വണ്ടിപ്പെരിയാർ പോക്സോ കേസില് തെളിവുകള് ശേഖരിക്കുന്നതില് വീഴ്ചയുണ്ടായിട്ടില്ലെന്നു അന്വേഷണ ഉദ്യോഗസ്ഥനായ ടിഡി സുനില് കുമാര് പറഞ്ഞു. ഫോറന്സിക് വിദഗ്ധരടക്കം സ്ഥലത്തെത്തി തെളിവുകള് ശേഖരിച്ചിരുന്നുവെന്നും അന്വേഷണത്തില് പൊലീസിന്റെ ഭാഗത്തുനിന്നും വീഴ്ചയുണ്ടായിട്ടില്ലെന്ന് 100ശതമാനം ഉറപ്പിച്ച് പറയാനാകുമെന്നും അദ്ദേഹം കൂട്ടിച്ചേർത്തു.