ദോഹ: ഖത്തറിൽ എണ്ണവിലയിൽ മാറ്റമില്ലാത്ത പുതുവർഷത്തുടക്കം. ഡിസംബറിലെ അതേ നിരക്കിൽ തന്നെ ജനുവരിയിലും എണ്ണവില തുടരുമെന്ന് ഖത്തർ എനർജി അറിയിച്ചു. പ്രീമിയം പെട്രോളിന് രണ്ടു റിയാലും, സൂപ്പർ ഗ്രേഡ് പെട്രോളിന് 2.10 റിയാലും, ഡീസലിന് 2.05 റിയാലുമാണ് നിരക്ക്. നവംബറിലെ വിലയിൽ കാര്യമായ മാറ്റങ്ങളില്ലാതെയാണ് ജനുവരിയിലും വില നിശ്ചയിച്ചത്. ഒക്ടോബറിലെ വിലയിൽ നിന്നും നേരിയ വർധനയോടെയാണ് നവംബറിൽ നിരക്ക് പ്രഖ്യാപിച്ചത്. 10 ദിർഹം ഉയർന്ന് ഡീസലിന് നവംബറിൽ 2.05 റിയാലിലെത്തി. സൂപ്പർ ഗ്രേഡിന് അഞ്ചു ദിർഹമായിരുന്നു വർധന. എന്നാൽ, പ്രീമിയം പെട്രോളിന് തുടർച്ചയായി അഞ്ചാം മാസത്തിലും രണ്ട് റിയാൽ തന്നെയാണ് വില.