*സംസ്ഥാനത്ത് മഴ കനക്കും; മലയോരമേഖലകളിൽ ജാഗ്രത, ജില്ലകളിൽ യെല്ലോ അലർട്ട്*
സംസ്ഥാനത്ത് തിങ്കളാഴ്ചയും കനത്ത മഴക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ആലപ്പുഴയിലും എറണാകുളത്തും യെല്ലോ അലർട്ട് പ്രഖ്യാപിച്ചിട്ടുണ്ട്. തെക്കൻ- മധ്യ കേരളത്തിലെ ജില്ലകളിലാണ് മഴ ശക്തമാവുക. മലയോരമേഖലകളിൽ ജാഗ്രത തുടരണമെന്നും അധികൃത‍ര്‍ മുന്നറിയിപ്പ് നൽകി. വരും ദിവസങ്ങളിലും കാലവർഷം സജീവമായി തുടരും. വടക്ക് പടിഞ്ഞാറൻ ബംഗാൾ ഉൾക്കടലിലെ ചക്രവാതച്ചുഴി ചൊവ്വാഴ്ചയോടെ ന്യൂനമർദ്ദമായി മാറുമെന്നും ഇതും മഴയുടെ വ്യാപ്തി കൂട്ടുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
ഇന്ന് രാവിലെ പത്ത് മണി വരെയുള്ള സമയത്ത് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ ഒറ്റപ്പെട്ടയിടങ്ങളിൽ മിതമായ മഴക്കും മറ്റെല്ലാ ജില്ലകളിലും നേരിയ മഴക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. വടക്ക് കിഴക്കൻ ബംഗാൾ ഉൾക്കടലിൽ രൂപപ്പെട്ട ചക്രവാതച്ചുഴി വടക്ക് പടിഞ്ഞാറൻ ബംഗാൾ ഉൾക്കടലിനും മധ്യ പടിഞ്ഞാറൻ ബംഗാൾ ഉൾക്കടലിനും മുകളിലായി ന്യൂനമർദമായി ശക്തിപ്പെടാൻ സാധ്യതയുണ്ട്. ഏഴാം തീയതി വരെ കേരളത്തിൽ ഒറ്റപ്പെട്ടയിടങ്ങളിൽ ഇടിമിന്നലോടുകൂടിയ മഴക്ക് സാധ്യതയുണ്ട്.
