ന്യൂയോര്‍ക്ക്: മലങ്കര ഓര്‍ത്തഡോക്‌സ് സുറിയാനി സഭയുടെ നോര്‍ത്ത് ഈസ്റ്റ് അമേരിക്കന്‍ ഭദ്രാസനത്തിന്റെ ചിരകാല അഭിലാഷം പൂര്‍ത്തീകരിച്ച് പെന്‍സില്‍വേനിയ ഡാല്‍ട്ടണിലെ ഫാത്തിമ സെന്ററില്‍ തയാറാവുന്ന ട്രാന്‍സ്ഫിഗറേഷന്‍ റിട്രീറ്റ് സെന്റര്‍ പരി. കാതോലിക്കാ ബാവാ സന്ദര്‍ശിച്ചു. ഓഗസ്റ്റ് 31 ന് രാവിലെ പരി. ബാവാ നടത്തിയ സന്ദര്‍ശനത്തില്‍ ഭദ്രാസന മെത്രാപ്പൊലീത്ത സഖറിയ മാര്‍ നിക്കോളോവോസും സന്നിഹിതനായിരുന്നു. ശാരീരികമായ രോഗാവസ്ഥകളെ പരിഗണിക്കാതെ പരി. ബാവാ സെന്ററിലെ ഓരോ മുറിയും ഒരു കൊച്ചുകുട്ടിയുടെ താല്‍പര്യത്തോടെ നോക്കിക്കണ്ടു. ചാപ്പലിലേക്കാണ് ബാവാ ആദ്യം പോയത്, അവിടെ ബാവാ അല്‍പസമയം പ്രാര്‍ഥനയില്‍ മുഴുകി. സെന്റര്‍ സന്ദര്‍ശിച്ച് പരി. ബാവാ നല്‍കിയ സന്ദേശത്തില്‍ നിന്ന്:
“മലങ്കരസഭ ഒരു ഗ്ലോബല്‍ സഭ എന്നു പറയത്തക്കവണ്ണം എല്ലാ ഭൂഖണ്ഡങ്ങളിലും സഭാ വിശ്വാസികള്‍ ഒന്നിച്ചുകൂടുകയും ദേവാലയങ്ങള്‍ പടുത്തുയര്‍ത്തുകയും ആരാധന നടത്തുകയും ചെയ്തുവരുന്നു. നോര്‍ത്ത് ഈസ്റ്റ് അമേരിക്കന്‍ ഭദ്രാസനത്തില്‍ ഇന്ന് ഒരു പുതിയ പദ്ധതി ആവിഷ്കരിച്ച് നടപ്പിലാക്കാന്‍ ശ്രമിക്കുന്നതിന്റെ ഭാഗമായാണ് ഈ പദ്ധതി പ്രദേശത്തേക്ക് നമുക്ക് കടന്നുവരുവാന്‍ സാധിച്ചതും ഈ പരിശുദ്ധ ദേവാലയത്തില്‍ പ്രാര്‍ഥിക്കുവാനും ഇവിടെയുള്ള ഭൂപ്രദേശം നോക്കിക്കാണുവാനും സാധിച്ചത്. മലങ്കരസഭയുടെ ചരിത്രത്തിലെ നാള്‍വഴികളില്‍ എഴുതിച്ചേര്‍ക്കുവാന്‍ തക്ക ഒരു പദ്ധതിയാണ് ഇവിടെ ആവിഷ്കരിച്ചിരിക്കുന്നത്. ഇത് പൂര്‍ത്തീകരിക്കപ്പെടണം, അതിന് ആസ്ഥാനം ആവശ്യമുണ്ട്, ദൈവകൃപ ആവശ്യമുണ്ട്, ധനം ആവശ്യമുണ്ട്, എല്ലാവരുടെയും ബുദ്ധിയും സഹകരണവും ആവശ്യമുണ്ട്. ദൈവനിശ്ചയമായിട്ടാണ് നാം ഈ പദ്ധതിയെ കാണുന്നത്. ട്രാന്‍സ്ഫിഗറേഷന്‍ റിട്രീറ്റ് സെന്റര്‍ എന്ന നാമത്തിലറിയപ്പെടുന്ന ഈ പ്രസ്ഥാനം മലങ്കരസഭയ്ക്കും ഇവിടെയുള്ള മലങ്കരയുടെ മക്കള്‍ക്കും, അതുപോലെ ഈ സ്ഥാപനം ഉപയോഗപ്പെടുത്തുവാന്‍ ആഗ്രഹിക്കുന്ന മറ്റ് അനേകര്‍ക്കും ഇത് പ്രയോജനപ്പെടും. ദൈവനിശ്ചയമെന്ന് മാത്രമേ ഇതിനെകുറിച്ച് നമുക്ക് പറയുവാനുള്ളൂ. ഈ പദ്ധതി ഏറ്റെടുക്കുന്ന ഭദ്രാസനം, അധ്യക്ഷന്‍ നിക്കോളോവോസ് തിരുമേനി, തിരുമേനിയുടെ കൂടെ പ്രവര്‍ത്തിക്കുന്ന ഭദ്രാസന കൗണ്‍സില്‍, വൈദികര്‍, അതുപോലെ ഇതിനുവേണ്ടി പ്രവര്‍ത്തിക്കുന്ന മറ്റനേകര്‍ ഇവരെയെല്ലാം ദൈവം തന്റെ ഉപകരണങ്ങളാക്കി ഉപയോഗിക്കുകയാണ്.
അതിമനോഹരമായ ഒരിടമായിട്ടാണ് ഇതിനെ നാം കാണുന്നത്. ഒരു വിധത്തില്‍ പറഞ്ഞാല്‍ പകല്‍സമയങ്ങളില്‍ നമ്മുടെ കര്‍ത്താവ് ധാരാളം പഠനങ്ങളും പ്രവര്‍ത്തനങ്ങളും പൂര്‍ത്തീകരിച്ച് സന്ധ്യയാകുമ്പോള്‍ പ്രാര്‍ഥിക്കാനൊരിടം എന്ന നിലയില്‍ പര്‍വതശിഖരങ്ങളിലേക്ക് പോകുന്നു എന്ന് ദൈവ വചനത്തില്‍ നിന്നും നാം വായിച്ച് മനസിലാക്കിയിട്ടുണ്ട്.
പര്‍വതശിഖരമായി ഈ ഇടത്തെ കാണുന്നില്ലെങ്കിലും ദൈവസാന്നിധ്യം ഇവിടെ ഉണ്ടെന്നുള്ളത് ഒരു വസ്തുതയാണ്. നിശബ്ദത, പ്രകൃതിരമണീയത, നല്ല അന്തരീക്ഷം, വൃക്ഷലതാദികള്‍, നല്ല വായു, അങ്ങിനെ ഒരുപാട് നന്‍മകളുടെ ഉറവിടമായിട്ടാണ് ഈ ഇടത്തെ കാണുന്നത്. അപ്പോള്‍ ഇവിടെ കടന്നുവരുന്ന ഓരോരുത്തര്‍ക്കും ഈ അന്തരീക്ഷവും, ഈ പ്രസ്ഥാനത്തിന്റെ പ്രവര്‍ത്തനശൈലിയും, ട്രാന്‍സ്ഫിഗറേഷന്‍ എന്ന ആശയത്തിന്റെ പൊരുളും ഉള്‍ക്കൊണ്ട് ആദ്ധ്യാത്മികമായ വലിയ നേട്ടങ്ങള്‍ കൈവരിക്കുവാന്‍ സാധിക്കും. അതുകൊണ്ട് ഇത് മലങ്കരസഭയ്ക്ക് തികച്ചും അഭിമാനകരമാണ്. അടുത്ത കാലങ്ങളിലൊന്നും, ഒരു ആറു വര്‍ഷങ്ങളുടെ ചരിത്രം പരിശോധിക്കുമ്പോള്‍ ഇത്രയ്ക്ക് ബൃഹത്തായ ഒരു പദ്ധതി ഉണ്ടായിട്ടില്ല. കാലാകാലങ്ങളായി സഭയ്ക്ക് ആവശ്യമുള്ളത് എന്തെന്ന് ദൈവം ആഗ്രഹിക്കുകയും, ആഗ്രഹം പൂര്‍ത്തിയാക്കുന്നതിന് ചിലരെ ഉപയോഗപ്പെടുത്തുകയും ചെയ്യും. ദൈവത്താല്‍ അസാധ്യമായത് ഒന്നുമില്ലല്ലോ. സദുദ്ദേശ്യത്തോടുകൂടി സഭയുടെ ഉയര്‍ച്ചയ്ക്കും വളര്‍ച്ചയ്ക്കും അനിവാര്യമായ നിലയിലുള്ള പ്രവര്‍ത്തനങ്ങളും പ്രസ്ഥാനങ്ങളും വിജയിക്കട്ടെ എന്നും, ഇത് മുഖാന്തിരമായിട്ട് സഭയുടെ ശക്തി -വളര്‍ച്ച- കൂടുതല്‍ കൂടുതല്‍ ബലപ്പെടട്ടെ എന്നാശംസിക്കുന്നു. അഭിവന്ദ്യ നിക്കോളോവോസ് തിരുമേനിക്കും കൗണ്‍സില്‍ അംഗങ്ങള്‍ക്കും വൈദികര്‍ക്കും ഇടവകജനങ്ങള്‍ക്കും തിരുമേനിയോടൊപ്പം പ്രവര്‍ത്തിക്കുന്ന എല്ലാവര്‍ക്കും സ്വന്തം നിലയിലും, സഭയുടെ പ്രധാന മേലധ്യക്ഷന്‍ എന്ന നിലയിലും പ്രാര്‍ഥനാ നിര്‍ഭരമായ ആശംസകളും മംഗളങ്ങളും നേരുകയാണ്.” പരി. ബാവാ ആശംസിച്ചു.
ഭദ്രാസന മെത്രാപ്പൊലീത്ത സഖറിയാ മാര്‍ നിക്കോളോവോസും പ്രവര്‍ത്തനങ്ങള്‍ ഊര്‍ജിതപ്പെടുത്തേണ്ടതിന്റെ ആവശ്യകത ചൂണ്ടിക്കാട്ടി സംസാരിച്ചു.
“”നോര്‍ത്ത് ഈസ്റ്റ് അമേരിക്കന്‍ ഭദ്രാസനം ആരംഭിച്ചിരിക്കുന്ന ഒരു പുതിയ ശുശ്രൂഷയാണ് ട്രാന്‍സ്ഫിഗറേഷന്‍ റിട്രീറ്റ് സെന്റര്‍. ഇവിടെ 300 ഏക്കറില്‍ ഒരുലക്ഷം ചതുരശ്ര അടി വലിപ്പമുള്ള ഒരു കെട്ടിടസമുച്ചയത്തോടുകൂടി കരസ്ഥമാക്കുവാനുള്ള ശ്രമത്തിലാണ്. ഇന്ന് പരി. ബാവാ തിരുമേനിയോടൊപ്പം ഇവിടം സന്ദര്‍ശിക്കുകയും ഈ സ്ഥലം പരി. ബാവാ തിരുമേനിയെ കാണിച്ച് ഈ സ്ഥലത്തെ കുറിച്ചുള്ള അഭിപ്രായം തേടുകയുമായിരുന്നു. പരി. ബാവാ തിരുമേനിയുടെ അനുഗ്രഹാശിസുകളോടുകൂടി, കൂടുതല്‍ ഊര്‍ജസ്വലതയോടുകൂടി പ്രവര്‍ത്തനങ്ങള്‍ വ്യാപിപ്പിക്കേണ്ടിയിരിക്കുന്നു. അതിനുള്ള പണവും അധ്വാനവും ഈ ഭദ്രാസനജനങ്ങളെ കൊണ്ട് സാധ്യമായതാണ്. മനുഷ്യന്റെ ബലഹീനതക്കോ ശക്തിക്കോ മുന്നില്‍ പലതും അപ്രാപ്യമെന്ന് തോന്നുമെങ്കിലും ദൈവസാന്നിധ്യത്തില്‍, ദൈവാശ്രയബോധത്തില്‍, മുന്നോട്ട് പോകുമ്പോള്‍, ദൈവം മുന്നില്‍ കൊണ്ടുതന്ന ഈ പദ്ധതി ഗൗരവകരമായും വിജയകരമായും പൂര്‍ത്തീകരിക്കുവാന്‍ നമുക്ക് സാധിക്കും.” മാര്‍ നിക്കോളോവോസ് പറഞ്ഞു.
ബാബു പാറയ്ക്കല്‍, ഫാ. ജിസ് ജോണ്‍സണ്‍, സഭാ മാനേജിംഗ് കമ്മിറ്റി അംഗം പോള്‍ കറുകപ്പിള്ളില്‍, ഭദ്രാസന കൗണ്‍സില്‍ അംഗം ഷാജി വര്‍ഗീസ്, സ്ക്രാന്റണ്‍ ഭദ്രാസന പ്രതിനിധികള്‍ തുടങ്ങിയവരും സന്നിഹിതരായിരുന്നു. പ്രോജക്ട് സംബന്ധിച്ച ആശയങ്ങള്‍ പങ്കുവച്ച പരി. ബാവ മലങ്കരസഭയില്‍ ഇതു പോലൊരു പ്രോജക്ട് ഉണ്ടായിട്ടില്ലന്നും ഇത് വളരെ പ്രാധാന്യമര്‍ഹിക്കുന്നതാണന്നും പറഞ്ഞു.
2016 മെയില്‍ സഫേണില്‍ ചേര്‍ന്ന ഭദ്രാസന പൊതുയോഗത്തിലാണ് ഫാത്തിമ റിന്യൂവല്‍ സെന്റര്‍ വാങ്ങാന്‍ തീരുമാനിച്ചത്. സ്ക്രാന്റണ്‍ ഡൗണ്‍ടൗണില്‍ നിന്നും മിനിറ്റുകളുടെ ഡ്രൈവ് മാത്രമേ പെന്‍സില്‍വേനിയയിലെ ഡാല്‍റ്റണ്‍ ട്രാന്‍സ്ഫിഗറേഷന്‍ റിട്രീറ്റ് സെന്ററിലേക്കുള്ളു. പെന്‍സില്‍വേനിയ സ്ക്രാന്റണ്‍ റോമന്‍ കത്തോലിക്ക രൂപതയുടെ കീഴിലുണ്ടായിരുന്ന സെന്റ് പയസ് ടെന്‍ത് റോമന്‍ കാതലിക്ക് സെമിനാരിയാണ് റിട്രീറ്റ് സെന്ററായി മാറുന്നത്. ഔട്ട്‌ഡോര്‍ മെഡിറ്റേഷന് പറ്റിയ അന്തരീക്ഷമാണ് ഇവിടെയുള്ളത്. 300 ഏക്കര്‍ വിസ്തൃതിയില്‍ പരന്നു കിടക്കുന്ന ഇവിടെ മനോഹരമായ ഒരു തടാകവും അതിനോടു ചേര്‍ന്ന് മൊട്ടക്കുന്നുകളും ഒപ്പം മരങ്ങളും ചെറിയ ചെടികളുടെയുമൊക്കെ ഒരു വലിയ കേദാരമുണ്ട്. ആരുടെയും മനസ്സ് ആകര്‍ഷിക്കുന്ന വിധത്തില്‍ പ്രകൃതിരമണീയമായ അന്തരീക്ഷമാണ് ഇവിടുത്തേത്.
ചാപ്പല്‍, ലൈബ്രറി, കോണ്‍ഫറന്‍സ് മുറികള്‍, ക്ലാസ്മുറികള്‍, ഓഫീസുകള്‍ എന്നിവയെല്ലാം റിട്രീറ്റ് സെന്ററിലുണ്ട്. ഇരുനൂറോളം അതിഥികളെ താമസിപ്പിക്കാന്‍ കഴിയുന്ന വിധത്തിലുള്ള രണ്ട് ഡോര്‍മെറ്ററികള്‍, ജിംനേഷ്യം, 800 പേര്‍ക്ക് ഇരിപ്പിടമൊരുക്കുന്ന വിശാലമായ ഓഡിറ്റോറിയം എന്നിവയെല്ലാം തന്നെ ഇവിടെയുണ്ട്. 4.50 മില്യണ്‍ ഡോളറിനാണ് റിട്രീറ്റ് സെന്റര്‍ ഭദ്രാസനം സ്വന്തമാക്കുന്നത്. ഇതില്‍ ഒരു മില്യണ്‍ പുനര്‍നിര്‍മ്മാണത്തിനു മാത്രമായി കണക്കാക്കുന്നു.
