ദില്ലി: ലോക്സഭ തെരഞ്ഞെടുപ്പ് നേരത്തെയാക്കുമെന്ന അഭ്യൂഹങ്ങള്ക്കിടെ പാര്ലമെന്റിന്റെ പ്രത്യേക സമ്മേള്ളനം വിളിച്ച് കേന്ദ്ര സര്ക്കാര്. സെപ്റ്റംബര് 18 മുതല് 22 വരെയാണ് പാര്ലമെന്റ് സമ്മേളനം വിളിച്ചിരിക്കുന്നത്. കേന്ദ്ര പാര്ലമെന്ററികാര്യ മന്ത്രി പ്രള്ഹാദ് ജോഷിയാണ് തീരുമാനം അറിയിച്ചത്. സമ്മേള്ളനം ഫലപ്രദമായ ചര്ച്ചകള്ക്കായാണെന്ന് കേന്ദ്രമന്ത്രി പ്രള്ഹാദ് ജോഷി അറിയിച്ചു. രാജ്യം അമൃത്കാലത്തേക്ക് കടക്കുന്ന സമയത്ത് ഇന്ത്യയുടെ വികസനത്തിന് വേണ്ടിയുള്ള ചര്ച്ചകള് സമ്മേള്ളനത്തില് ഉണ്ടാകും എന്ന സൂചനയാണ് സര്ക്കാര് നല്കുന്നത്.
എന്നാല് എന്ത് തരത്തിലുള്ള ചര്ച്ചകളാണ് ഈ സമ്മേളനത്തില് ഉണ്ടാകുക എന്ന് മന്ത്രി വ്യക്തമാക്കുന്നില്ല. പലതരം അഭ്യൂഹങ്ങള്ക്കാണ് കേന്ദ്ര സര്ക്കാരിന്റെ ഈ തീരുമാനം തുടക്കം കുറിച്ചിരിക്കുന്നത്. അദ്യത്തെ അഭ്യൂഹം തെരഞ്ഞെടുപ്പ് നേരത്തെ നടത്തുമെന്ന സൂചനയാണ്. നേരത്തെ മമത ബാനര്ജി ഉള്പ്പടെയുള്ള നേതാക്കളും ഈ കാര്യം പറഞ്ഞിരുന്നു. രണ്ടാമതായി ഉയരുന്ന അഭ്യൂഹം ഒരു പ്രധാനപ്പെട്ട ബില്ല് സര്ക്കാര് കൊണ്ടുവരാന് ഉദ്ദേശിക്കുന്നു എന്നുള്ളതാണ്.
ഒരു പ്രധാനപ്പെട്ട ബില്ല് കൊണ്ടുവരുകയും അതിന്മേല് രാജ്യസഭയിലും ലോക്സഭയിലും ചര്ച്ച നടത്തുകയും ചെയ്യുകയെന്നതും കേന്ദ്ര സര്ക്കാര് ലക്ഷ്യമിടുന്ന കാര്യമാണ്. ഇനി വരാനിരിക്കുന്ന നിയമസഭകളിലേക്കുള്ള തെരഞ്ഞടുപ്പുകള് നടന്ന ശേഷമെ പാര്ലമെന്റ് സമ്മേള്ളനം വിളിക്കാന് കഴിയു എന്നുള്ളതാണ് കാരണം. നേരത്തെ ലോക്സഭാ തെരഞ്ഞെടുപ്പ് ബിജെപി ഈ ഡിസംബറില് തന്നെ നടത്താന് സാധ്യതയുണ്ടെന്ന് പശ്ചിമ ബംഗാള് മുഖ്യമന്ത്രി മമത ബാനര്ജി പറഞ്ഞിരുന്നു. തെരഞ്ഞെടുപ്പ് കമ്മീഷണറുടെ നിയമനം സംബന്ധിച്ച പുതിയ ബില് പരാമര്ശിച്ചായിരുന്നു മമതയുടെ പ്രതികരണം.