കൊൽക്കത്ത: പശ്ചിമബംഗാളിൽ കടപ്പുറത്ത് കൂറ്റൻ തിമിംഗലം അടിഞ്ഞു. 35 അടിയോളം വലിപ്പമുള്ള തിമിംഗലത്തിൻെറ ജഡമാണ് കരക്കടിഞ്ഞത്. കൊൽക്കത്തയിൽ നിന്ന് 150 കിലോമീറ്റർ അകലെ മന്ദർമാണി കടപ്പുറത്താണ് സംഭവം. പ്രദേശത്തെ ആദ്യ സംഭവമാണിതെന്ന് നാട്ടുകാർ പറയുന്നു.
തിമിംഗലത്തിൻെറ തലഭാഗം രക്തത്തിൽ കുളിച്ചു കിടക്കുകയായിരുന്നു. കൂടാതെ വാൽഭാഗത്ത് പരിക്കേറ്റ പാടുകളുമുണ്ടായിരുന്നു. ഇതെങ്ങനെയെന്ന് വ്യക്തമല്ല.
ഈസ്റ്റ് മിഡ്നാപുർ ജില്ല അധികൃതരും സ്ഥലത്തേക്കെത്തി. വനം വന്യജീവി വകുപ്പ്, മത്സ്യ വകുപ്പ് ഉദ്യോഗസ്ഥരും ഉണ്ടായിരുന്നു. ബംഗാൾ തീരത്തെ പ്രശസ്തമായ വിനോദ സഞ്ചാര കേന്ദ്രമാണ് മന്ദർമാണി കടപ്പുറം. കോവിഡ് മഹാമാരിയുടെ പശ്ചാത്തലത്തിൽ അടച്ചിട്ടിരിക്കുകയാണ് ഈ സ്ഥലം.
