തിരുവനന്തപുരം : സംസ്ഥാനത്ത് കോവിഡ് രോഗികളുടെ എണ്ണം ദിനംപ്രതി കൂടിവരുന്ന സാഹചര്യമാണെങ്കിലും വാരാല്ത്യ ലോക്ഡൗണ് നടപ്പിലാക്കില്ലെന്ന് സര്ക്കാര്. എന്നാല് ടെസ്റ്റ് പോസിറ്റിവിറ്റി കൂടിയ പ്രദേശങ്ങളിലെ എല്ലാവര്ക്കും കോവിഡ് പരിശോധന നിര്ബന്ധമാക്കും. ജില്ലാ ശരാശരിയെക്കാള് ഇരട്ടിയലധികം ടെസ്റ്റ പോസിറ്റിവിറ്റി നിരക്കുള്ള പഞ്ചായത്തുകളിലും പരിശോധന നടത്തുമെന്നും ചീഫ് സെക്രട്ടറിയുടെ അധ്യക്ഷതയില് ചേര്ന്ന ഉന്നതതല യോഗത്തില് തീരുമാനമായി.
ഇതോടൊപ്പം രണ്ടാം തരംഗത്തില് കേരളത്തില് കൊവിഡ് വൈറസിനുണ്ടായ രൂപാന്തരത്തെ കുറിച്ചും ശാസ്ത്രീയമായ പഠനം നടത്താനും തീരുമാനിച്ചിട്ടുണ്ട്. വൈറസിന്റെ ജനതികമാറ്റം പഠിക്കാന് ജീനോം പഠനം നടത്താനാണ് യോഗത്തിലെ തീരുമാനം. കോവിഡ് രോഗികളുടെ എണ്ണം ഈ ദിവസങ്ങളില് കുതിച്ചുയര്ന്നുവെങ്കിലും സംസ്ഥാനത്തെ ഐസിയു, വെന്റിലേറ്റര് സൗകര്യങ്ങള് അടിയന്തര സാഹചര്യം നേരിടാന് തക്കവണ്ണം സജ്ജമാണെന്ന വിലയിരുത്തലും ഇന്നത്തെ യോഗത്തില് തീരുമാനമായി.
സംസ്ഥാന വ്യാപകമായി പരിശോധന നടത്തി ടെസ്റ്റ് പോസിറ്റിവിറ്റി റേറ്റ് മൂന്ന് ശതമാനത്തിലേക്കെത്തിക്കാനാകുമെന്ന പ്രതീക്ഷയിലാണ് സര്ക്കാര്. ഇന്ന് മുതല് നിലവില് വരുന്ന രാത്രികാല കര്ഫ്യുവിനെ തുടര്ന്ന് പരിശോധന ശക്തമാക്കാന് പൊലീസിന് കര്ശന നിര്ദ്ദേശം നല്കിയിട്ടുണ്ട്.