![dileep22](https://i0.wp.com/keralatimes.com/wp-content/uploads/2022/07/dileep22.jpg?resize=696%2C387&ssl=1)
കൊച്ചിയില് നടി ആക്രമിക്കപ്പെട്ട കേസിൽ നടൻ ദിലീപിന് തിരിച്ചടി. നിര്ണായക ദൃശ്യങ്ങള് ചോര്ന്ന സംഭവത്തില് അന്വേഷണം നടത്തണമെന്ന് ഹൈക്കോടതി ഉത്തരവിട്ടു. മെമ്മറി കാര്ഡിന്റെ ഹാഷ് വാല്യൂ വിചാരണ കോടതിയുടെ കസ്റ്റഡിയിലിരിക്കെ മാറിയതുമായി ബന്ധപ്പെട്ട നടിയുടെ ആശങ്കകള് കോടതി ഗൗരവപൂര്വം പരിഗണിച്ചു. സ്വകാര്യ ദൃശ്യങ്ങള് അടക്കം പുറത്തുപോകുന്നത് തന്റെ സ്വകാര്യതയേയും നിലനില്പ്പനേയും ബാധിക്കുന്ന കാര്യമാണെന്ന നടിയുടെ വാദം കോടതി മുഖവിലയ്ക്കെടുത്തു. അതിനാൽ അന്വേഷണം ആവശ്യപ്പെട്ടുള്ള നടിയുടെ ഹര്ജി തള്ളണമെന്ന ദിലീപിന്റെ ആവശ്യം കോടതി അംഗീകരിച്ചില്ല. ഹൈക്കോടതി സിംഗിള് ജഡ്ജിന്റേതാണ് ഉത്തരവ്.
അന്വേഷണത്തെ എന്തിനാണ് എതിര്ക്കുന്നതെന്ന് കോടതി ദിലീപിനോട് ചോദിച്ചു. മെമ്മറി കാര്ഡ് പരിശോധിച്ചത് ആരാണെന്ന് കണ്ടെത്തണമെന്ന് ഉള്പ്പെടെ ഹര്ജിയിലൂടെ അതിജീവിത ആവശ്യപ്പെട്ടിരുന്നു. കേസുമായി ബന്ധപ്പെട്ട നിര്ണായക ദൃശ്യങ്ങള് ഉള്പ്പെട്ട മെമ്മറി കാര്ഡിന്റെ ഹാഷ് വാല്യൂ വിചാരണ കോടതിയുടെ കസ്റ്റഡിയിലിരിക്കെ മാറിയെന്ന ഫോറന്സിക് റിപ്പോര്ട്ടിന് പിന്നാലെയാണ് ഇതില് അന്വേഷണം ആവശ്യപ്പെട്ട് അതിജീവിത ഹൈക്കോടതിയെ സമീപിച്ചിരുന്നത്. ആവശ്യമെങ്കില് പൊലീസിന്റേയോ മറ്റ് ഏജന്സികളുടെയോ സഹായം തേടി ഒരു മാസത്തിനുള്ളില് അന്വേഷണം പൂര്ത്തിയാക്കാനാണ് കോടതിയുടെ നിര്ദേശം.