കേരളത്തിൽ യുവി ഇൻഡക്സ് ഉയർന്ന് അപകട നില; ജാഗ്രത നിർബന്ധം

കോട്ടയം ∙ സംസ്ഥാനത്ത് കനത്ത ചൂടിനൊപ്പം അന്തരീക്ഷത്തിലെ അൾട്രാവയലറ്റ് (യുവി) കിരണങ്ങളുടെ തോത് ഉയരുന്നത് ജനജീവിതത്തെ ദുർബലപ്പെടുത്തുന്നു. കഴിഞ്ഞ 24 മണിക്കൂറിനിടെ കൊല്ലം, ഇടുക്കി ജില്ലകളിൽ രേഖപ്പെടുത്തിയ യുവി ഇൻഡക്സ് 7 ആണ്. പത്തനംതിട്ട, ആലപ്പുഴ, കോട്ടയം ജില്ലകളിൽ 6, എറണാകുളം, തൃശൂർ, പാലക്കാട് ജില്ലകളിൽ 5 എന്നിങ്ങനെയാണ് ഉയർന്ന നിരക്കുകൾ.

സംസ്ഥാന ദുരന്ത നിവാരണ അതോറിറ്റിയുടെ നിർദേശപ്രകാരം, യുവി ഇൻഡക്സ് 5ന് മുകളിലേക്കു പോകുമ്പോൾ അപകടകരമാണെന്ന് കണക്കാക്കപ്പെടുന്നു. അതേസമയം, കാസർകോട്, കണ്ണൂർ ജില്ലകളിൽ 3, കോഴിക്കോട്, വയനാട് ജില്ലകളിൽ 2, മലപ്പുറത്ത് 0 എന്ന നിലയിലാണ് രേഖപ്പെടുത്തിയത്.

വെയിലിനൊപ്പം എത്തുന്ന അൾട്രാവയലറ്റ് കിരണങ്ങൾ ശരീരത്തിൽ വൈറ്റമിൻ ഡി നിർമ്മിക്കാൻ സഹായകരമായിരുന്നാലും അതിർത്തി കടന്നാൽ അതിനാൽ ഉണ്ടാകുന്ന ശാരീരിക ആഘാതങ്ങൾ ഗുരുതരമാകാൻ സാധ്യതയുണ്ട്. പ്രതിദിനം പകൽ 10 മുതൽ 3 മണിവരെയുള്ള സമയത്താണ് ഈ കിരണങ്ങളുടെ തീവ്രത ഏറ്റവും കൂടുന്നതെന്നും ആ സമയത്ത് നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കേണ്ടതുണ്ടെന്നും ദുരന്ത നിവാരണ അതോറിറ്റി മുന്നറിയിപ്പ് നൽകുന്നു.

പുറം ജോലികളിൽ ഏർപ്പെടുന്നവർ, കടലിലും ഉൾനാടൻ മൽസ്യബന്ധനത്തിലും ഏർപ്പെടുന്ന മത്സ്യത്തൊഴിലാളികൾ, ജലഗതാഗതത്തൊഴിലാളികൾ, ബൈക്ക് യാത്രക്കാർ, വിനോദ സഞ്ചാരികൾ, ചർമരോഗങ്ങളുള്ളവർ, നേത്രരോഗമുള്ളവർ, ക്യാൻസർ രോഗികൾ, രോഗപ്രതിരോധ ശേഷി കുറഞ്ഞവർ എന്നിവരുടെ ആരോഗ്യസുരക്ഷയ്ക്കായി പ്രത്യേകം ജാഗ്രത പാലിക്കണമെന്ന് നിർദേശമുണ്ട്.

സംസ്ഥാന ദുരന്ത നിവാരണ വിഭാഗത്തിന്റെ യുവി നിരീക്ഷണ സംവിധാനങ്ങൾ തിരുവനന്തപുരം ജില്ലയിൽ വിളപ്പിൽശാല, കൊല്ലം – കൊട്ടാരക്കര, പത്തനംതിട്ട – കോന്നി, ആലപ്പുഴ – ചെങ്ങന്നൂർ, കോട്ടയം – ചങ്ങനാശേരി, എറണാകുളം – കളമശേരി, തൃശൂർ – ഒല്ലൂർ, പാലക്കാട് – തൃത്താല, കോഴിക്കോട് – ബേപ്പൂർ, വയനാട് – മാനന്തവാടി, കണ്ണൂർ – ധർമടം, കാസർകോട് – ഉദുമ എന്നിവിടങ്ങളിലാണ് നിലവിലുള്ളത്.