മാണ്ഡ്യ; കര്ണാടകയുടെ സ്വതന്ത്ര എം പിയും നടിയുമായ സുമലത ബി ജെ പിക്ക് പൂര്ണ പിന്തുണ പ്രഖ്യാപിച്ചു. മൈസൂരു-ബെംഗളൂരു എക്സ്പ്രസിന്റെ ഉദ്ഘാടനത്തിന് പ്രധാനമന്ത്രി നരേന്ദ്ര മോദി എത്തുന്നതിനു മുമ്പാണ് സുമലത രാഷ്ട്രീയ നിലപാട് അറിയിച്ചത്. ലോക്സഭയിലേക്ക് മാണ്ഡ്യ മണ്ഡലത്തില് നിന്നും തെരഞ്ഞെടുക്കപ്പെട്ട സുമലത ഇതുവരെയും നിക്ഷ്പക്ഷ നിലപാടാണ് സ്വീകരിച്ചിരുന്നത്.
സുമലത പറഞ്ഞത്: ലോകമെമ്പാടും പ്രശംസിക്കപ്പെടുന്ന നരേന്ദ്ര മോദിയുടെ നേതൃത്വത്തെ കണക്കിലെടുത്താണ് തീരുമാനമെന്നും നിലപാട് അഭ്യുദയകാംക്ഷികളോടും അനുഭാവികളോടും കൂടിയാലോചിച്ച ശേഷമാണ് പ്രഖ്യാപനമെന്നുമാണ്. സ്വതന്ത്ര എം പിയായി നാലു വര്ഷം പ്രവര്ത്തിച്ചു. നിരവധി വെല്ലുവിളികള് ഈ കാലയളവില് നേരിട്ടു.
പൊതുയോഗങ്ങള് നടത്തുന്നതിലും തടസ്സങ്ങള് നേരിട്ടിരുന്നു. ഇതോടെ ഒരു പിന്തുണ ആവശ്യമാണെന്ന് തിരിച്ചറിഞ്ഞു. മോദിയുടെ നേതൃത്വത്തില് വിശ്വാസമുണ്ടെന്നും സുമലത പറഞ്ഞു. മൈസൂരിവിലോ ബെംഗളൂരുവിലോ ഉദ്ഘാടനം ചെയ്യാന് പ്രധാനമന്ത്രിക്ക് പോകാമായിരുന്നു. എന്നാല് മാണ്ഡ്യയില് എത്തിയത് ജില്ലയുടെ വികസനം ലക്ഷ്യമിട്ടാണെന്നും എംപി വ്യക്തമാക്കി.