രാവിലെ എഴുന്നേറ്റാലുടൻ വെറും വയറ്റിൽ ഒരു ഗ്ലാസ് കട്ടൻ കാപ്പി കുടിക്കുന്നത് പലരുടെയും ദിനചര്യയിലെ സ്ഥിരം ശീലമാണ്. ഈ ശീലം ശരീരത്തിന് പെട്ടെന്ന് ഊർജം നൽകുന്നതിന് പുറമെ നിരവധി ആരോഗ്യഗുണങ്ങൾ നൽകുന്നുവെന്ന് ആരോഗ്യ വിദഗ്ധർ പറയുന്നു. കഫീൻ ധാരാളമായി അടങ്ങിയ കട്ടൻ കാപ്പിയിൽ കാലറി വളരെ കുറവായതിനാൽ ശരീരഭാരം നിയന്ത്രിക്കാനും മെറ്റബോളിസം വർധിപ്പിക്കാനും ഇത് സഹായകമാണ്.
ആന്റിഓക്സിഡന്റുകൾ സമൃദ്ധമായ കട്ടൻ കാപ്പി കരളിന്റെ ആരോഗ്യത്തിന് ഗുണകരമാണെന്നാണ് പഠനങ്ങൾ സൂചിപ്പിക്കുന്നത്. പതിവായി കാപ്പി കുടിക്കുന്നവരിൽ ഫാറ്റിലിവർ, കരൾ സംബന്ധമായ രോഗങ്ങൾ, ലിവർ കാൻസർ എന്നിവയുടെ സാധ്യത കുറവായി കാണപ്പെടുന്നു. കൂടാതെ മലാശയ അർബുദം, കരളിലെ അർബുദം, എൻഡോമെട്രിയൽ കാൻസർ തുടങ്ങിയ ചില കാൻസറുകളുടെ സാധ്യതയും കാപ്പി ഉപയോഗത്തിലൂടെ കുറയാമെന്നാണ് വിലയിരുത്തൽ. ഫ്രീ റാഡിക്കലുകളുടെ ദോഷഫലങ്ങൾ തടഞ്ഞ് കോശങ്ങളെ സംരക്ഷിക്കുന്നതിലാണ് കാപ്പിയിലെ ആന്റിഓക്സിഡന്റുകളുടെ പ്രധാന പങ്ക്.
തലച്ചോറിന്റെ ആരോഗ്യത്തിനും കട്ടൻ കാപ്പി ഗുണം ചെയ്യുന്നു. ഓർമക്കുറവും അൽസ്ഹൈമേഴ്സ് പോലുള്ള രോഗങ്ങളും വരാനുള്ള സാധ്യത കുറയ്ക്കാൻ കാപ്പിയിലെ കഫീനും മറ്റ് സംയുക്തങ്ങളും സഹായിക്കുന്നതായി ആരോഗ്യപ്രവർത്തകർ വ്യക്തമാക്കുന്നു. പ്രായാധിക്യവുമായി ബന്ധപ്പെട്ട ഓർമശക്തി കുറയുന്നത് സാവധാനത്തിലാക്കാനും മാനസിക ജാഗ്രത വർധിപ്പിക്കാനും ഇത് സഹായകമാണ്.
ഹൃദയാരോഗ്യത്തിലും കട്ടൻ കാപ്പിക്ക് പങ്കുണ്ടെന്ന് പഠനങ്ങൾ സൂചിപ്പിക്കുന്നു. ശരീരത്തിലെ ഇൻഫ്ലമേഷൻ കുറയ്ക്കുന്ന ഗുണം ഹൃദ്രോഗവും പക്ഷാഘാതവും പോലുള്ള അപകടസാധ്യതകൾ കുറയ്ക്കാൻ സഹായിക്കുന്നു. രക്തസമ്മർദം നിയന്ത്രിക്കാനും ഹൃദയത്തിന്റെ പ്രവർത്തനം മെച്ചപ്പെടുത്താനും കാപ്പി സഹായകമാകാമെന്നാണ് വിലയിരുത്തൽ.
ദഹനപ്രക്രിയ മെച്ചപ്പെടുത്തുന്നതിനും കട്ടൻ കാപ്പി ഗുണം ചെയ്യുന്നു. ഉദരത്തിലെ ആസിഡുകളുടെ സ്രവം വർധിപ്പിച്ച് ദഹനം സുഗമമാക്കാനും ബവൽ മൂവ്മെന്റ് മെച്ചപ്പെടുത്താനും ഇത് സഹായിക്കുന്നു. ശരീരത്തിലെ വിഷാംശങ്ങൾ പുറന്തള്ളാനും ഉപദ്രവകാരികളായ ബാക്ടീരിയകളുടെ വളർച്ച കുറയ്ക്കാനും കാപ്പി സഹായിക്കുന്നതായി പറയുന്നു.
മനോനില മെച്ചപ്പെടുത്തുന്നതിലും കട്ടൻ കാപ്പിക്ക് പങ്കുണ്ട്. തലച്ചോറിലെ ഇൻഫ്ലമേഷൻ കുറയ്ക്കുന്നതിലൂടെ വിഷാദ സാധ്യത കുറയ്ക്കാനും ശ്രദ്ധയും ഏകാഗ്രതയും വർധിപ്പിക്കാനും കഫീൻ സഹായിക്കുന്നു.
അതേസമയം, കട്ടൻ കാപ്പിയുടെ അമിത ഉപയോഗം ചില പാർശ്വഫലങ്ങൾക്ക് കാരണമാകാമെന്നും വിദഗ്ധർ മുന്നറിയിപ്പ് നൽകുന്നു. ഹൃദയമിടിപ്പ് കൂടുക, ഉദര അസ്വസ്ഥത, ആസിഡ് റിഫ്ലക്സ്, ഉത്കണ്ഠ, ഉറക്കമില്ലായ്മ എന്നിവ അമിത കഫീൻ ഉപയോഗവുമായി ബന്ധപ്പെട്ട് ഉണ്ടാകാം. കഫീനോട് അതിയായ ആശ്രിതത്വമുള്ളവരിൽ ഉപയോഗം കുറച്ചാൽ പിൻവാങ്ങൽ ലക്ഷണങ്ങളും പ്രകടമാകാൻ സാധ്യതയുണ്ടെന്നും ആരോഗ്യവിദഗ്ധർ ചൂണ്ടിക്കാട്ടുന്നു.
