കണ്ണൂർ മുൻ എഡിഎം നവീൻ ബാബു മരണത്തിൽ കലക്ടർ അരുൺ കെ. വിജയനെ അന്വേഷണ ചുമതലയിൽ നിന്ന് മാറ്റി

കണ്ണൂർ: മുൻ എഡിഎം നവീൻ ബാബുവിൻ്റെ മരണവുമായി ബന്ധപ്പെട്ട അന്വേഷണ ചുമതല ജില്ലാ കലക്ടർ അരുൺ കെ. വിജയനിൽ നിന്ന് ലാൻഡ് റവന്യൂ ജോയിൻ്റ് കമ്മീഷണർ എ. ഗീതയ്ക്കായി മാറ്റി. റവന്യൂ മന്ത്രി കെ. രാജന്റെ നിർദേശപ്രകാരമാണ് നടപടി.

അന്വേഷണത്തിൽ കലക്ടർ അരുൺ കെ. വിജയനെതിരെ നവീൻ ബാബുവിന്റെ ബന്ധുക്കൾ മൊഴി നൽകിയിരുന്നു. അവധിയും സ്ഥലംമാറ്റവും നൽകുന്നതിൽ കാലതാമസം ഉണ്ടാക്കിയതായി ആരോപണമുയർന്നിരുന്നു.

പി. പി. ദിവ്യയുടെ അഴിമതിയാരോപണങ്ങൾക്കു പിന്നാലെ നവീൻ ബാബുവിന്റെ മരണമുണ്ടായതായും, ദിവ്യയെ ബന്ധപ്പെട്ട യാത്രയയപ്പ് ചടങ്ങിൽ കലക്ടർ ക്ഷണിച്ചതായും മൊഴികളിൽ ആരോപണമുണ്ട്.

കലക്ടറേറ്റ് ജീവനക്കാർ ദിവ്യയെ ക്ഷണിച്ചതായി അറിയില്ലെന്നും, ദിവ്യ പരിപാടിയിൽ അപ്രതീക്ഷിതമായി എത്തിയതാണെന്നും മൊഴി നൽകിയിട്ടുണ്ട്.