ചാലക്കുടി ഫെഡറൽ ബാങ്ക് ശാഖയിൽ മോഷണം: പ്രതിക്കായി എറണാകുളത്തും അന്വേഷണം

കൊച്ചി: ചാലക്കുടി ഫെഡറൽ ബാങ്ക് ശാഖയിൽ ഉണ്ടായ മോഷണത്തിൽ അന്വേഷണം എറണാകുളം ജില്ലയിലേക്കും വ്യാപിപ്പിച്ചു. അങ്കമാലിയിൽ നിന്ന് ലഭിച്ച സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ആരംഭിച്ചിട്ടുണ്ടെന്നും പ്രതി എറണാകുളം ഭാഗത്തേക്ക് കടന്നതായ സൂചനയുണ്ടെന്നും പൊലീസ് അറിയിച്ചു.

മോഷ്ടാവ് ഹിന്ദി സംസാരിച്ചതിനാൽ മലയാളി അല്ലെന്ന് നിശ്ചയിക്കാനാകില്ലെന്നും ഏകദേശം 10 ലക്ഷം രൂപ നഷ്ടപ്പെട്ടതായും മധ്യമേഖല ഡിഐജി ഹരിശങ്കർ അറിയിച്ചു. എടിഎമ്മിൽ നിന്ന് എടുത്ത പണം മാത്രമാണ് നഷ്ടമായതും, കൂടുതൽ പണം ഉണ്ടായിട്ടും അത് എടുത്തില്ലെന്നതും അന്വേഷണസംഘത്തിന് അത്യന്തം ശ്രദ്ധേയമായിരിക്കുന്നു.

ജീവനക്കാരുടെ സഹായം ഉണ്ടായോ എന്ന കാര്യം ഇപ്പോഴത്തെ ഘട്ടത്തിൽ നിഗമനത്തിലെത്താനാകില്ലെന്ന് ഡിഐജി വ്യക്തമാക്കി. എല്ലാ സാധ്യതകളും പരിശോധിക്കുന്നതായും, പ്രത്യേക അന്വേഷണ സംഘം രൂപീകരിച്ചിട്ടുണ്ടെന്നും അദ്ദേഹം അറിയിച്ചു.