വാഷിങ്ടൺ: യുഎസ് പ്രസിഡന്റ് ഡോണൾഡ് ട്രംപ് പുതിയ ഒരു നിർണായക പ്രഖ്യാപനവുമായി. അമേരിക്കയിൽ നിക്ഷേപിക്കുന്ന വിദേശികൾക്ക് പൗരത്വം നൽകുന്ന ‘ഗോൾഡൻ കാർഡ്’ പദ്ധതി കൊണ്ടുവരാനാണ് അദ്ദേഹത്തിന്റെ തീരുമാനം. 50 ലക്ഷം യുഎസ് ഡോളർ നിക്ഷേപിക്കുന്നവർക്ക് ഈ കാർഡ് ലഭ്യമാകുമെന്ന് ട്രംപ് വ്യക്തമാക്കി.യുഎസ് പൗരത്വം നേടാൻ സഹായിക്കുന്ന ഒരു മാർഗമാണ് ഈ ഗോൾഡൻ കാർഡ്. ഗ്രീൻ കാർഡിന്റെ മാതൃകയിൽ തയ്യാറാക്കിയ ഈ പദ്ധതിയിലൂടെ നിക്ഷേപകരെ ആകർഷിക്കുകയാണ് ലക്ഷ്യം. പദ്ധതിയുടെ ഔദ്യോഗിക പ്രഖ്യാപനം അടുത്ത രണ്ടാഴ്ചയ്ക്കകം ഉണ്ടാകുമെന്നാണ് സൂചന.10 ലക്ഷം ഗോൾഡൻ കാർഡുകൾ വിതരണം ചെയ്യാനാണ് യുഎസ് ഭരണകൂടത്തിന്റെ പദ്ധതി. നിലവിൽ നിലവിലുണ്ടായിരുന്ന ‘ഇബി5’ നിക്ഷേപക വീസ റദ്ദാക്കുകയും അതിന് പകരം ഈ പുതിയ ഗോൾഡൻ കാർഡ് സംവിധാനം അവതരിപ്പിക്കുകയുമാണ് ചെയ്യുന്നത്.”രാജ്യത്തിൽ നിക്ഷേപം നടത്തുകയും തൊഴിലവസരങ്ങൾ സൃഷ്ടിക്കുകയും ചെയ്യുന്ന വിദേശികൾക്ക് പൗരത്വം നൽകാനുള്ള മാർഗമാണിത്,” എന്ന് ട്രംപ് വ്യക്തമാക്കി. റഷ്യയിലെ ശതകോടീശ്വരന്മാർ ഉൾപ്പെടെയുള്ള അതിസമ്പന്നർക്കു ഈ പദ്ധതി ഉപകാരപ്പെടുമെന്നും അദ്ദേഹം കൂട്ടിച്ചേർത്തു.ഇന്നത്തെ യുഎസ് കുടിയേറ്റ നയത്തിൽ വലിയ മാറ്റങ്ങളുണ്ടാക്കാനാണ് ട്രംപ് ശ്രമിക്കുന്നതെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. അതേസമയം, ഈ തീരുമാനം പുതിയ വിവാദങ്ങൾക്കും ഇടയാക്കും എന്നതിൽ സംശയമില്ല.
