ചെറുപുഷ്പ മിഷൻ ലീഗ് സ്ഥാപകന്റെ ജന്മശതാബ്‌ദി: അന്താരാഷ്ട്ര ഓൺലൈൻ അനുസ്മരണം മാർച്ച് 22ന്
കാക്കനാട്: ചെറുപുഷ്പ മിഷൻ ലീഗ് (CML) സ്ഥാപകൻ പി. സി. അബ്രഹം പല്ലാട്ടുകുന്നേൽ (മിഷൻ ലീഗ് കുഞ്ഞേട്ടൻ)യുടെ ജന്മശതാബ്‌ദി അന്തർദേശീയ തലത്തിൽ ആചരിക്കുന്നു. മാർച്ച് 22 ശനിയാഴ്ച ഇന്ത്യൻ സമയം രാത്രി 8:30ന് സംഘടിപ്പിക്കുന്ന ഓൺലൈൻ സമ്മേളനത്തിൽ വിശിഷ്ട വ്യക്തികളും വിവിധ രാജ്യങ്ങളിൽ നിന്നുമുള്ള പ്രതിനിധികളും പങ്കെടുക്കും.
കർദിനാൾ മാർ ജോർജ് അലഞ്ചേരി സമ്മേളനം ഉദ്ഘാടനം ചെയ്യും. മിഷൻ ലീഗ് അന്തർദേശീയ പ്രസിഡന്റ് ഡേവിസ് വല്ലൂരൻ അധ്യക്ഷത വഹിക്കും. സിറോ മലബാർ സഭയുടെ ദൈവവിളി കമ്മീഷൻ ചെയർമാനും മിഷൻ ലീഗിന്റെ സഹ രക്ഷാധികാരിയുമായ ബിഷപ്പ് മാർ ജോസഫ് അരുമച്ചാടത്ത് മുഖ്യപ്രഭാഷണം നടത്തും.
ദൈവവിളി കമ്മീഷൻ സെക്രട്ടറി ഫാ. തോമസ് മേൽവെട്ടത്ത്, മിഷൻ ലീഗ് അന്തർദേശീയ ഡയറക്ടർ ഫാ. ജെയിംസ് പുന്നപ്ലാക്കൽ, ജനറൽ സെക്രട്ടറി ബിനോയ് പള്ളിപ്പറമ്പിൽ, ഇന്ത്യൻ നാഷണൽ ഡയറക്ടർ ഫാ. ജോസഫ് മറ്റം, ഇന്ത്യൻ നാഷണൽ പ്രസിഡന്റ് സുജി പുല്ലുകാട്ട്, അമേരിക്കൻ നാഷണൽ പ്രസിഡന്റ് സിജോയ് സിറിയക് പറപ്പള്ളിൽ, യു. കെ നാഷണൽ പ്രസിഡന്റ് ജെൻതിൻ ജെയിംസ്, അയർലണ്ട് നാഷണൽ പ്രസിഡന്റ് ജിൻസി ജോസഫ്, കേരളാ സംസ്ഥാന ഡയറക്ടർ ഫാ. ഷിജു ഐക്കരക്കാനയിൽ, കേരളാ സംസ്ഥാന പ്രസിഡന്റ് രഞ്ജിത് മൂതുപ്ലാക്കൽ എന്നിവർ അനുസ്മരണ പ്രഭാഷണം നടത്തും.
1925 മാർച്ച് 19-ന് കേരളത്തിലെ ഭരണങ്ങാനത്തിന് സമീപം ചെമ്മലമറ്റം എന്ന ഗ്രാമത്തിൽ ജനിച്ച കുഞ്ഞേട്ടൻ, വിശുദ്ധ അൽഫോൻസാമ്മയിൽ നിന്ന് പ്രചോദനം ഉൾക്കൊണ്ടായിരുന്നു സഭയുടെ പ്രേഷിത പ്രവൃത്തനങ്ങളെ സഹായിക്കാൻ 1947-ൽ ചെറുപുഷ്പ മിഷൻ ലീഗ് സ്ഥാപിച്ചത്. ഏഴ് അംഗങ്ങളുമായി ആരംഭിച്ച ഈ സംഘടന പിന്നീട് കേരളത്തിലും ഇന്ത്യയിലും വിപുലമായി വ്യാപിച്ചു. ഇന്ത്യയ്ക്ക് പുറത്തും അമേരിക്ക, കാനഡ, യു.കെ, അയർലണ്ട്, ഇറ്റലി, ജർമ്മനി, ഓസ്ട്രേലിയ, ഖത്തർ തുടങ്ങിയ രാജ്യങ്ങളിൽ മിഷൻ ലീഗ് സജീവമായി പ്രവർത്തിച്ചു വരുന്നു.
മിഷണറി സേവനത്തിന് പതിനായിരക്കണക്കിന് യുവാക്കളെ പ്രചോദിപ്പിച്ച വ്യക്തിയായി കുഞ്ഞേട്ടൻ പരിഗണിക്കപ്പെടുന്നു. സഭാ സംഘടനകളും മതമൗലിക്യങ്ങളും അംഗീകരിച്ച നിരവധി ബഹുമതികൾ അദ്ദേഹത്തിന് ലഭിച്ചിരുന്നു. 2008 ഓഗസ്റ്റ് 11-ന് അദ്ദേഹം അന്തരിച്ചു.
