ഗ്രേറ്റർ ന്യൂയോർക്ക് കേരള സമാജം: 53-ാമത് പ്രവർത്തനവർഷത്തിന് മാതൃകാപരമായ തുടക്കം
ന്യൂയോർക്ക്: മലയാളികളുടെ സമാഗമപർവ്വമായി മാറിയ ഗ്രേറ്റർ ന്യൂയോർക്ക് കേരള സമാജത്തിന്റെ 2025-ലെ വാർഷിക പ്രവർത്തനോദ്ഘാടനവും വിഷു-ഈസ്റ്റർ ആഘോഷവും ഫ്ലോറൽ പാർക്കിലുള്ള ടൈസൺ സെന്റർ ഓഡിറ്റോറിയത്തിൽ നിറസാന്ദ്രമായ പരിപാടികളോടെ നടന്നു. സമാജം പ്രസിഡന്റ് സജി എബ്രഹാമിന്റെ നേതൃത്വത്തിൽ നടന്ന യോഗത്തിൽ മുൻ പ്രസിഡന്റുമാരും സാമൂഹിക-സാംസ്‌കാരിക രംഗത്തെ നിരവധി പ്രമുഖരും പങ്കെടുത്തു.
മുൻ പ്രസിഡന്റുമാരെ ഏകോപിപ്പിച്ച് രൂപീകരിച്ച പ്രസിഡന്റ്‌സ് ഫോറത്തിന്റെ ഉദ്ഘാടനം ചടങ്ങിന്റെ പ്രത്യേക ആകർഷണമായി. അഞ്ചു പതിറ്റാണ്ടിലധികം നീണ്ട സമാജത്തിന്റെ ചരിത്രത്തിൽ പ്രധാന പങ്കുവഹിച്ച മുൻ പ്രസിഡന്റുമാരെ ഓരോരുത്തരെയും ആദരിച്ചു. സമാജം സെക്രട്ടറി മാത്യുക്കുട്ടി ഈശോയുടെ സ്വാഗതം സംസാരിച്ചു.
സമാജത്തിന്റെ വിവിധ പദവികളിൽ സേവനം അനുഷ്ഠിച്ച് കാലത്തിനിടയിൽ വിടവാങ്ങിയ നേതാക്കളെയും, കശ്മീരിലെ ഭീകരാക്രമണത്തിൽ കൊല്ലപ്പെട്ട വിനോദ സഞ്ചാരികളെയും ഓർത്തും, മാർപാപ്പയുടെ ഓർമ്മകളോടെയും അനുശോചനമായി മൗനപ്രാർത്ഥന നടത്തപ്പെട്ടു.
പ്രസിഡന്റ് സജി എബ്രഹാം, ട്രസ്റ്റീ ബോർഡ് ചെയർമാൻ വിൻസെന്റ് സിറിയക്ക്, എക്സിക്യൂട്ടീവ് കമ്മറ്റിയുടെ പ്രതിനിധിയായി ലീലാ മാരേട്ട്, പ്രഥമ പ്രസിഡന്റ് പ്രൊഫ. ജോസഫ് ചെറുവേലിൽ, ഫൊക്കാന സെക്രട്ടറി ശ്രീകുമാർ ഉണ്ണിത്താൻ, ഫോമ ജോയിന്റ് സെക്രട്ടറി പോൾ പി ജോസ്, ഫാദർ യേശുദാസ്, ഡോ. മധു ഭാസ്കരൻ എന്നിവരുടെ സാന്നിധ്യത്തിൽ നിലവിളക്ക് തെളിയിച്ച് പ്രവർത്തനോദ്ഘാടനം ഔദ്യോഗികമായി പ്രഖ്യാപിക്കപ്പെട്ടു.
ഇസ്റ്റർ സന്ദേശം ഫാ. യേശുദാസ് നൽകി. വിഷു സന്ദേശം ഡോ. മധു ഭാസ്കരൻ പങ്കുവെച്ചു. കലാപരിപാടികളിൽ ഡോ. റിയ ജോൺ, കലാമണ്ഡലം മേരി ജോൺ എന്നിവരുടെ നൃത്തം, ഗായിക മഹിമ ജേക്കബ്ബിന്റെ ഗാനങ്ങൾ, ഗായകൻ പ്രേംകൃഷ്ണയുടെ നാടൻ പാട്ട് എന്നിവ ശ്രദ്ധേയമായി. ജിനു ആൻ മാത്യു അവതാരകയായി.
വിനോദ് കെയാർക്കേ മുൻ പ്രസിഡന്റുമാരെ വേദിയിലേക്ക് ക്ഷണിച്ചുകൊണ്ട് പ്രസിഡന്റ്‌സ് ഫോറം ഔദ്യോഗികമായി പ്രഖ്യാപിച്ചു. പ്രൊഫ. ജോസഫ് ചെറുവേലിൽ കൃതജ്ഞതാ പ്രഭാഷണത്തിനിടയിൽ അന്തരിച്ച മുൻ പ്രസിഡന്റുമാരുടെ പേരുകൾ വായിച്ച് ആദരാഞ്ജലികൾ അർപ്പിച്ചു. ഫോറം കോർഡിനേറ്റർ ഷാജു സാം മുഴുവൻ അംഗങ്ങൾക്കും നന്ദി രേഖപ്പെടുത്തി.
യുവതലമുറയെ അംഗത്വത്തിലേക്ക് സ്വാഗതം ചെയ്തുകൊണ്ട് ഐ.ടി. വിദഗ്ധനായ ടിക്കു മാമ്മന്‌ തന്റെ അഡ്‌മിഷൻ ഫോം പ്രഥമ പ്രസിഡന്റ് പ്രൊഫ. ചെറുവേലിലിന് കൈമാറി. ഈ വേളയിൽ പുതിയ തലമുറയെ സംഘടനയുടെ വളർച്ചയിലേക്ക് നയിക്കുന്നതിന്റെ പ്രതീകമായി ചടങ്ങ് മാറി.
സമാപനത്തിൽ ട്രഷറർ വിനോദ് കെയാർക്കേ എല്ലാവർക്കും നന്ദി രേഖപ്പെടുത്തി. അനുഗ്രഹപൂർവമായ സ്‌നേഹവിരുന്നോടെ ആഘോഷങ്ങൾ സമാപിച്ചു.
