അമ്മമാരെ ആദരിച്ചുകൊണ്ട് മാതൃദിനം ആഘോഷമായി: സെന്റ് അല്‍ഫോന്‍സാ ദേവാലയത്തിലെ ഹൃദയസ്പര്‍ശിയായ നിമിഷങ്ങള്‍
ഡാലസ്: കൊപ്പേല്‍ സെന്റ് അല്‍ഫോന്‍സാ സിറോ മലബാര്‍ കത്തോലിക്കാ ദേവാലയത്തില്‍ മാതൃദിനം ഹൃദയസ്പര്‍ശിയായി ആഘോഷിച്ചു. മേയ് 11-ന് ദേവാലയത്തില്‍ സംഘടിപ്പിച്ച പരിപാടിയില്‍ ഇടവക വികാരി ഫാ. ജിമ്മി ഇടക്കുളത്തില്‍ അമ്മമാരെ അനുമോദിച്ചു. അമ്മമാരുടെ ത്യാഗവും സ്‌നേഹവും ഓര്‍മ്മപ്പെടുത്തി അദ്ദേഹം വചനപ്രഭാഷണത്തിലൂടെ മനസ്സിനെ സ്പര്‍ശിച്ചുവെന്ന് പങ്കെടുത്തവര്‍ പറഞ്ഞു.
ഗായക സംഘം അമ്മമാര്‍ക്കായി അവതരിപ്പിച്ച ഗാനമാല അന്നു സദസ്സില്‍ സ്നേഹത്തിന്റെ സ്പന്ദനം വിതറി. തുടര്‍ന്ന് എല്ലാവര്‍ക്കും റോസാപൂവ് കൈമാറിയതോടെ മനോഹരമായ ആദരവിന്റെ ശില്‍പമാകുകയായിരുന്നു ആ നിമിഷങ്ങള്‍. പിന്നീട്, ഓഡിറ്റോറിയത്തില്‍ ഒത്തുകൂടിയ അമ്മമാര്‍ ആഹ്ലാദത്തോടെ ഗ്രൂപ്പ് ഫോട്ടോയ്ക്ക് പോസ് ചെയ്തു; സന്തോഷത്തിന്റെ നിറം നിറഞ്ഞ മാതൃദിനം അങ്ങനെ എല്ലാ ഹൃദയങ്ങളിലും മുദ്ര പതിപ്പിച്ചു.
മാതൃദിനാഘോഷ പരിപാടികള്‍ക്ക് കൈക്കാരന്മാരായ ജോഷി കുര്യാക്കോസ്, രജ്ജിത്ത് തലക്കോട്ടൂര്‍, റോബിന്‍ ജേക്കബ്, റോബിന്‍ കുര്യന്‍ തുടങ്ങിയവര്‍ നേതൃത്വം നല്‍കി. എല്ലാവരും ഒരുമിച്ച് ചേര്‍ന്ന് അമ്മമാരെ ആദരിച്ച ഈ ദിനം, പ്രാര്‍ത്ഥനയുടെയും സ്‌നേഹത്തിന്റെയും മധുര സ്മരണയായി ഇടവകയിലെല്ലാവര്‍ക്കും ആവേശം പകരുന്ന ദിനമായിത്തീര്‍ന്നു.
