ഏഷ്യയെ പിടിക്കാനായി ചൈന സൈന്യത്തെ ഉപയോഗിച്ചേക്കും; അമേരിക്ക മുന്നറിയിപ്പുമായി
സിംഗപ്പൂർ: ഏഷ്യയിൽ ആധിപത്യം ഉറപ്പിക്കാൻ ചൈന സൈനിക ശക്തി ഉപയോഗിക്കാൻ തയാറെടുക്കുകയാണെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് മുന്നറിയിപ്പ് നൽകി. ചൈന ഉയർത്തുന്ന ഭീഷണി യഥാർത്ഥവുമാണ്, അതിനാൽ ഗുരുതരമായി കാണേണ്ടിയിരിയ്ക്കുന്നു എന്നും അദ്ദേഹം പറഞ്ഞു.
സിംഗപ്പൂരിൽ നടന്ന അന്താരാഷ്ട്ര സുരക്ഷാസമ്മേളനായ ഷാങ്രി ലാ ഡയലോഗിൽ സംസാരിക്കുകയായിരുന്നു അദ്ദേഹം. ഇന്ത്യയും പസഫിക് രാജ്യങ്ങളും ഉൾപ്പെടുന്ന യുഎസ് സഖ്യകക്ഷികളോടൊപ്പം ശക്തമായി നിൽക്കുമെന്ന് ഹെഗ്സെത്ത് വ്യക്തമാക്കി.
ചൈന തായ്‌വാനെ പിടിക്കാനായി സൈനിക ശക്തി കൂടി കൂട്ടുകയാണ്. അതിനായി അവർ സ്ഥിരമായി പരിശീലനവും തുടരുകയാണ്. കമ്മ്യൂണിസ്റ്റ് ചൈനയുടെ സൈനിക നീക്കങ്ങൾ തടയാൻ അമേരിക്ക തങ്ങളുടെ തന്ത്രങ്ങൾ വീണ്ടും പരിശോധിച്ചു ക്രമീകരിക്കുകയാണ്.
ചൈനയുടെ നടപടികളെ മുന്നറിയിപ്പായി കാണണമെന്ന് പീറ്റ് ഹെഗ്സെത്ത് പറഞ്ഞു. സൈബർ ആക്രമണങ്ങൾ, അയൽരാജ്യങ്ങളെ ഭീഷണിപ്പെടുത്തൽ, ദക്ഷിണ ചൈനാ കടലിൽ നിയമവിരുദ്ധമായ സൈനിക കയ്യേറ്റങ്ങൾ തുടങ്ങിയ പ്രവർത്തനങ്ങൾ ചൈന തുടരുകയാണെന്ന് അദ്ദേഹം കുറ്റപ്പെടുത്തി.
വ്യാപാരവും സാങ്കേതികവിദ്യയും ഉൾപ്പെടെ പല വിഷയങ്ങളിലും അമേരിക്കയും ചൈനയും തമ്മിലുള്ള ബന്ധം ഇപ്പോൾ ഉരുണ്ടുനിൽക്കുന്ന സാഹചര്യത്തിലാണ് ഈ മുന്നറിയിപ്പ് വന്നിരിക്കുന്നത്.
ഏഷ്യയിലെ അമേരിക്കയുടെ സഖ്യ രാജ്യങ്ങൾ അതിന് അനുസൃതമായി അവരുടെ പ്രതിരോധശേഷി ശക്തമാക്കേണ്ടത് അനിവാര്യമാണെന്ന് ഹെഗ്സെത്ത് പറഞ്ഞു.
