‘യുവാക്കളുടെ ഭാവി തകർത്തത് നിങ്ങളാണ്’; മോദിക്കെതിരെ രാഹുൽ ഗാന്ധി, മൂന്ന് ആവശ്യങ്ങൾ വീണ്ടും ആവർത്തിച്ചു
ന്യൂഡൽഹി: ചോദ്യപേപ്പർ ചോർച്ച കേസുകൾ വേഗത്തിൽ തീർപ്പാക്കാൻ അതിവേഗ (ഫാസ്റ്റ് ട്രാക്ക്) കോടതികൾ സ്ഥാപിക്കുമെന്ന പ്രധാനമന്ത്രി നരേന്ദ്ര മോദിയുടെ പ്രഖ്യാപനത്തിന് പിന്നാലെ രൂക്ഷ വിമർശനവുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി. വിദ്യാർത്ഥികളുടെ താൽപര്യം സംരക്ഷിക്കുകയാണെന്ന പ്രധാനമന്ത്രിയുടെ അവകാശവാദം തള്ളിക്കളഞ്ഞ രാഹുൽ, “രാജ്യത്തെ യുവാക്കളുടെ ഭാവി ഏറ്റവും കൂടുതൽ തകർത്തത് നിങ്ങളാണ്” എന്ന് എക്സിൽ കുറിച്ചു.
രാജ്യത്തെ വിദ്യാഭ്യാസ സംവിധാനത്തെ തകർക്കാൻ കേന്ദ്ര സർക്കാർ അവസരമൊരുക്കുകയും അതിന് ഉത്തരവാദികളായവരെ സംരക്ഷിക്കുകയും ചെയ്തുവെന്ന് രാഹുൽ ഗാന്ധി ആരോപിച്ചു. വിദ്യാഭ്യാസ മേഖലയിലെ നിലവിലെ പ്രതിസന്ധിക്ക് കേന്ദ്ര സർക്കാരിനാണ് പൂർണ ഉത്തരവാദിത്വമെന്നും അദ്ദേഹം വിമർശിച്ചു.
വിദ്യാർത്ഥി പ്രതിഷേധക്കാർ മുന്നോട്ടുവച്ച മൂന്ന് പ്രധാന ആവശ്യങ്ങളും രാഹുൽ ഗാന്ധി വീണ്ടും ഉന്നയിച്ചു. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനെ സ്ഥാനത്ത് നിന്ന് നീക്കുക, വിദ്യാർത്ഥികളോട് കേന്ദ്ര സർക്കാർ പരസ്യമായി മാപ്പ് പറയുക, പ്രതിഷേധത്തിനിടെ വിദ്യാർത്ഥികളെ മർദിച്ചവർക്കെതിരെ നടപടി സ്വീകരിക്കുക എന്നിവയാണ് അദ്ദേഹം ആവശ്യപ്പെട്ടത്.
ചോദ്യപേപ്പർ ചോർച്ചയിൽ ഉൾപ്പെട്ടവർക്ക് വേഗത്തിലും കർശനവുമായ ശിക്ഷ ഉറപ്പാക്കുന്നതിനായി ഫാസ്റ്റ് ട്രാക്ക് കോടതികൾ സ്ഥാപിക്കുമെന്ന് പ്രധാനമന്ത്രി നരേന്ദ്ര മോദി നേരത്തെ എക്സിലൂടെ പ്രഖ്യാപിച്ചിരുന്നു. വിദ്യാർത്ഥികളുടെ താൽപര്യം സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കാൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും, യുവാക്കളുടെ ഭാവി തകർക്കാൻ ശ്രമിക്കുന്നവരെ വെറുതെ വിടില്ലെന്നും അദ്ദേഹം വ്യക്തമാക്കിയിരുന്നു.
അതേസമയം, പ്രധാനമന്ത്രിയുടെ പ്രഖ്യാപനത്തെ കോൺഗ്രസ് ജനറൽ സെക്രട്ടറി ജയറാം രമേശും വിമർശിച്ചു. നീറ്റ് ചോദ്യപേപ്പർ ചോർച്ച വിഷയത്തിൽ പാർലമെന്റിൽ ചർച്ച നടത്താൻ പ്രധാനമന്ത്രി തയ്യാറാകുന്നില്ലെന്നും, രാജ്യവ്യാപകമായി ശക്തമായ വിദ്യാർത്ഥി പ്രതിഷേധം ഉയർന്ന സാഹചര്യത്തിലാണ് ഈ പ്രഖ്യാപനമെന്നും അദ്ദേഹം ആരോപിച്ചു. “വോട്ട് ചോരണം, സീറ്റ് ചോരണം, ഫണ്ട് ചോരണം, പരീക്ഷാ പേപ്പർ ചോരണം… പട്ടിക നീളുകയാണ്,” എന്നായിരുന്നു ജയറാം രമേശിന്റെ പ്രതികരണം.
നീറ്റ് ചോദ്യപേപ്പർ ചോർച്ച വിവാദത്തെ തുടർന്ന് ഡൽഹി ഉൾപ്പെടെ രാജ്യത്തിന്റെ വിവിധ ഭാഗങ്ങളിൽ വിദ്യാർത്ഥി പ്രതിഷേധം തുടരുകയാണ്. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി, പേപ്പർ ചോർച്ചയ്ക്ക് ഉത്തരവാദികളായവർക്കെതിരെ കർശന നടപടി, വിഷയത്തിൽ കേന്ദ്ര സർക്കാരിന്റെ വ്യക്തമായ ഇടപെടൽ എന്നിവ ആവശ്യപ്പെട്ടാണ് പ്രതിഷേധം ശക്തമാകുന്നത്.
