വാഷിംഗ്ടൺ ഡി.സിയിൽ മെയ് 24-ന് ആരംഭിക്കുന്ന ക്യാപിറ്റൽ കപ്പ് നോർത്ത് അമേരിക്കൻ സോക്കർ ടൂർണമെന്റിന് വിപുലമായ ഒരുക്കങ്ങളാണ് മേരിലാൻഡ് സ്ട്രൈക്കേഴ്സ് നടത്തിയത്. ടൂർണമെന്റ് രാവിലെ 10:30ന് ഫൊക്കാന വൈസ് പ്രസിഡന്റ് വിപിൻ രാജ് ഔപചാരികമായി ഉദ്ഘാടനം ചെയ്യും.
ഫൊക്കാന, ഫോമാ ഉൾപ്പെടെയുള്ള പ്രഥമനിര മലയാളി സംഘടനകളുടെ നേതാക്കളും, കേരളാ അസ്സോസിയേഷൻ ഓഫ് വാഷിംഗ്ടൺ, കേരളാ കൾച്ചറൽ സൊസൈറ്റി, കൈരളി തുടങ്ങിയ സംഘടനകളുടെ ഭാരവാഹികളും ഉദ്ഘാടനച്ചടങ്ങിൽ സന്നിഹിതരാകും.
അമേരിക്കയുടെയും കാനഡയുടെയും വിവിധ ഭാഗങ്ങളിൽ നിന്നുള്ള പതിനൊന്നു പരിശീലിത ടീമുകൾ ഇത്തവണ ടൂർണമെന്റിൽ മാറ്റുരയ്ക്കും. മത്സരങ്ങൾ മെരിലാന്റിലെ ഫ്രഡറിക്ക് കൗണ്ടിയിലെ ഓഥല്ലോ റീജണൽ പാർക്കിലെ ടർഫ് ഫീൽഡിലാണ് നടക്കുന്നത്.
സായാഹ്നത്തിൽ സംഘടിപ്പിക്കുന്ന ബാങ്ക്വറ്റ് പാർട്ടിയിലൂടെ ടൂർണമെന്റ് ആഘോഷപരമായി സമാപിക്കും. മലയാളി സമൂഹം ആകാംക്ഷയോടെ കാത്തിരിക്കുന്ന ഈ കായികമാമാങ്കം, ആഗോള മലയാളി കായിക പങ്കാളിത്തത്തിന്റെ പ്രതീകമായി മാറുകയാണ്.
